Almaty qalalyq sotynyń málimetinshe, belgili vaınerler Qylmystyq kodekstiń 217-baby «Qarjylyq (ınvestısııalyq) pıramıdany qurý jáne oǵan basshylyq etý» boıynsha aıyptalǵan. Naqtylap aıtqanda, osy baptyń 3-bóliginiń 2-tarmaǵyna sáıkes qylmystyq iske kúdikti retinde ustalǵan. Al bul zań normasynda «asa iri mólsherde aqsha nemese ózge múlikti tarta otyryp» qylmys jasaý týraly aıtylady. Eger 3-tarmaqta kózdelgen jaǵdaılar óz dálelin tapsa, áleýmettik jeli «juldyzdarynyń» bar dúnıe-múlki tárkilenip, ózderi jeti jylǵa deıin bas bostandyqtarynan aıyrylýlary ábden múmkin. Bir aıta keterligi, kodekste «Qarjylyq pıramıdany qurýǵa dem berýshilik nemese oǵan nemese onyń qurylymdyq bólimshesine basshylyq etý týraly óz erkimen málimdegen, sondaı-aq onyń qyzmetin ashýǵa nemese jolyn kesýge belsendi túrde yqpal etken, qarjylyq pıramıdany uıymdastyrýshydan basqa adam, eger onyń áreketterinde ózge qylmys quramy bolmasa, qylmystyq jaýaptylyqtan bosatylatyndyǵy» jóninde de eskertiledi.
Almatynyń tergeý soty úsh kúdiktige qatysty bultartpaý sharasyn sanksııalaǵan. Qazirgi tańda M.Tórebaev pen M.Shernııazov 1000 aılyq eseptik kórsetkish, ıaǵnı 3 063 000 teńge kepilmen bosatylsa, A.Saıdbaevty polısııanyń áli taba almaǵany ǵana belgili. Alaıda sońǵysy sot sanksııasymen syrttaı eki aı merzimge qamaýǵa alyndy. Tergeý málimetterine qaraǵanda, vaınerler Mudarabah Capital kompanııasynyń jarnamasyn jasaǵan jáne ony basqarady degen kúdikke ilinip otyr. Esterińizde bolsa, ótken jyldyń qazan aıynan bastap osy kompanııanyń birneshe laýazymdy adamy, sonyń ishinde bas dırektor Rýslan Burqanov qamaýǵa alynǵan bolatyn. Tergeý kompanııa memlekettik satyp alýǵa qatysý úshin qarjy pıramıdasynyń qaǵıdaty boıynsha azamattar men fırmalardyń qarajatyn tartyp otyrǵan dep sanaıdy.
2019 jyldyń aqpan aıynan bastap 2021 jyldyń qańtaryna deıin Mudarabah Capital pen Astex kompanııalarynyń basshylary zańdy jáne jeke tulǵalarmen memlekettik satyp alýǵa qatysý úshin qajetti qarjy tartýǵa qatysty sharttar jasasqan. Bul qujat boıynsha fırmalar aı saıyn ár salymshyǵa salym somasynyń 20 paıyzyn tólep otyrýǵa tıis bolǵan. Osy ýaqyt aralyǵynda 160-tan astam salymshy Mudarabah capital arqyly Astex-ke
2 mlrd teńgeden astam qarjy quıǵan. Al kompanııalardyń jarnamasyn elge tanymal vaınerler men akterler, sonyń ishinde Meıirjan Tórebaev pen Meıirhan Shernııazov jasaǵan bolatyn. Jarnamada «juldyzdar» kompanııa tenderlerdegi aqshany «aınaldyrý» arqyly aı saıyn joǵary paıyzda qarjy tabýdy kózdeıtinin aıtyp, kópshilikti qyzyqtyrǵan edi. Vaınerlerdiń jarnamasyna senip, qomaqty aqshalarynan aıyrylyp qalǵanyn kesh túsingen salymshylar aqyr sońy aryzdaryn arqalap polısııaǵa júgingen.
IIM Tergeý departamentiniń basshysy Sanjar Ádilovtiń habarlaýynsha, búginde elimizde qarjy pıramıdalary qurbandarynyń sany 30 myńnan asyp ketken. Osynshama halyq 54 mlrd teńgeden astam qarjysynan aıyrylyp qalǵan. Bir ǵana Meıirjan Tórebaevtyń Instagram paraqshasyna 4 mıllıonǵa jýyq adamnyń jazylǵanyn eskersek, ádette tez baıý men ońaı oljaǵa kenelýdi jarnamalaıtyn «juldyzdardyń» áli qansha jandy jarǵa jyǵaryn shamalaı berýge bolady.
