Qazaqstan Prezıdenti Nursultan Nazarbaev Nıderland Koroldiginiń Premer-Mınıstri Mark Rıýttemen kezdesti.
Kezdesý barysynda ekijaqty yntymaqtastyqtyń keń aýqymdaǵy máseleleri qozǵaldy. Buǵan qosa, halyqaralyq kún tártibiniń negizgi jaıttary, sonyń ishinde Ýkraınadaǵy jaǵdaı qaraldy. Taraptar basty nazardy ıadrolyq qarýsyzdaný men ıadrolyq qaýipsizdik máselelerine, sondaı-aq, saýda-ekonomıkalyq, ınvestısııalyq, ǵylymı-tehnıkalyq jáne energetıkalyq yntymaqtastyq aıasyn keńeıtý baǵyttaryna aýdardy. Sondaı-aq, taraptar Gaaga qalasynda ótedi dep josparlanǵan Iаdrolyq qaýipsizdik jónindegi jahandyq sammıt baǵdarlamasyn talqylady.
Nursultan Nazarbaev Nıderland Qazaqstan úshin Eýropalyq Odaqtaǵy negizgi jáne perspektıvaly seriktesiniń biri ekenine toqtalyp ótti. Onyń aıshyqty aıǵaǵy – eki eldiń túrli salalardaǵy belsendi saýda-ınvestısııalyq yntymaqtastyǵy. Nıderland elimizdiń ekonomıkasyna salynǵan ınvestısııa kólemi jóninen birinshi jáne saýda seriktesterimiz arasynda jetekshi oryn alady, Qazaqstanda Gollandııa kapıtaly salynǵan 800-ge jýyq kompanııa óz qyzmetin júzege asyrýda.
Memleket basshysy aýyl sharýashylyǵy men ınnovasııalyq saladaǵy ekijaqty ózara yqpaldastyqtyń mańyzdylyǵyn atap ótti, sondaı-aq, Gollandııa kompanııalaryn Astanadaǵy EKSPO-2017 dúnıejúzilik kórmesiniń jumysyna belsene qatysýǵa shaqyrdy.
Sonymen qatar, taraptar sý resýrstaryn tıimdi basqarý jáne ekologııa, eki eldiń tranzıt-kólik áleýeti men logıstıkalyq ınfraqurylymyn damytý máselelerin talqylady.
Nursultan Nazarbaev Qytaı Halyq Respýblıkasynyń Tóraǵasy Sı Szınpınmen kezdesti.
Eki memleket basshylary ekijaqty yntymaqtastyqty damytýdyń negizgi baǵyttaryn, sondaı-aq, Sı Szınpınniń Qazaqstanǵa memlekettik sapary qorytyndysynda qol jetkizilgen kelisimderdiń iske asyrylýy barysyn qarastyrdy. Sonymen qatar, taraptar halyqaralyq kún tártibindegi negizgi jaıttardy, atap aıtqanda, Shanhaıda ótetin AО́SShK-niń aldaǵy sammıtin jáne Ýkraınadaǵy jaǵdaıdy talqylady. Kólik-tranzıt jáne sý-energetıka salalaryndaǵy baılanystardy nyǵaıtý máselelerine de basa nazar aýdaryldy.
Qazaqstan Prezıdenti Nursultan Nazarbaev Nıderland Koroli Vıllem-Aleksandrmen kezdesti.
Kezdesýde Qazaqstan men Nıderland arasyndaǵy ekijaqty yntymaqtastyqty, sonyń ishinde mádenı-gýmanıtarlyq ózara yqpaldastyq aıasyn keńeıtý perspektıvalary talqylandy. Nıderland Koroli Qazaqstannyń jáne Nursultan Nazarbaevtyń jahandyq ıadrolyq qaýipsizdikti nyǵaıtýǵa zor úles qosqanyna toqtaldy. Joǵary deńgeıdegi turaqty kezdesýler eki el arasyndaǵy qarym-qatynastardyń odan ári damýyna septigin tıgizetini atap ótildi.
Qazaqstan Prezıdenti Nursultan Nazarbaev Japonııa Premer-Mınıstri Sındzo Abemen kezdesti.
Kezdesý barysynda ekijaqty saýda-ekonomıkalyq, ǵylymı-tehnıkalyq jáne ınvestısııalyq yntymaqtastyqtyń keń aýqymdaǵy máseleleri qozǵaldy. Nursultan Nazarbaev pen Sındzo Abe ózara yqpaldastyq aıasyn, atap aıtqanda, eki eldiń birqatar kompanııalary arasyndaǵy ózara is-qımyldy odan ári jandandyra túsý úshin perspektıvalar bar ekenin atap ótti.
Qazaqstan Prezıdenti elimizdiń seriktestikti damytýǵa degen múddeliligi joǵary ekenine toqtaldy.
– Men Japonııada saparmen eki ret boldym. Biz Ortalyq Azııa elderimen yntymaqtastyqty nyǵaıtý týraly sizdiń ıdeıańyzdy qoldaımyz. Japonııa – álemdegi ekonomıkasy iri eldiń biri, Azııadaǵy bizdiń kórshimiz. Sońǵy ýaqytta qarym-qatynastarymyz arta tústi jáne bul rette biz barlyq baǵyttar boıynsha yntymaqtastyqqa daıynbyz. О́zara yqpaldastyǵymyzdyń negizgi salasy – energetıka, ásirese, ıadrolyq energetıka. Qazaqstan iri ýran óndirýshiniń biri bolyp tabylatyndyqtan, ony Japonııadaǵy atom stansalaryna jetkize alar edi, – dedi Memleket basshysy.
Sondaı-aq, Nursultan Nazarbaev birlesken jobanyń – Aqmola oblysynda sırek kezdesetin metaldar óndiretin zaýyt jumys isteıtinin aıtyp ótti. Budan bólek, ol Qazaqstannyń ındýstrııalyq-ınnovasııalyq baǵdarlamasy aıasynda eki eldiń arasynda tehnologııalyq jáne ınnovasııalyq yntymaqtastyqty damytý múmkindikterine de nazar aýdardy.
О́z kezeginde S.Abe ótken jyly Sankt-Peterbýrgte alǵash ret ótken G-20 sammıtinen keıin ekijaqty kezdesýge múmkindik bolǵanyna rızashylyǵyn bildirdi.
– Sizdiń Japonııaǵa 2008 jylǵy saparyńyz ekonomıkalyq qatynastardy nyǵaıtýǵa jaqsy serpin berdi, sóıtip, strategııalyq deńgeıge qol jetkizildi. Qazaqstannyń Aýǵanstandaǵy jaǵdaıdy turaqtandyrýǵa eleýli kómek kórsetip jatqanyna iltıpatymyz ben rızashylyǵymyzdy bildiremin. Biz Sizdiń elińizdiń Japonııa jáne Ortalyq Azııa óńirindegi eldermen arada únqatysý ornatýǵa kómegi tıetinine de úmit artamyz, – dedi S.Abe.
Qazaqstan Prezıdenti Nursultan Nazarbaev Fınlıandııa Respýblıkasynyń Prezıdenti Saýlı Nıınıstıomen kezdesti.
Kezdesý barysynda ekijaqty yntymaqtastyqtyń jaı-kúıi men perspektıvalary talqylandy. Memleketter basshylary saýda-ekonomıkalyq, tehnologııalyq jáne ınvestısııalyq salalardaǵy ózara yqpaldastyqty nyǵaıtý joldaryn qarastyrdy.
Qazaqstan Prezıdenti S.Nıınıstıoniń bizdiń elimizge ótken jylǵy memlekettik saparynan keıin eki el arasyndaǵy yntymaqtastyqtyń jandana túskenin atap ótti.
– Qazaqstan sizderdiń tehnologııalaryńyzǵa, sondaı-aq, ındýstrııalyq-ınnovasııalyq damý baǵdarlamasyn júzege asyrýdy eskere kele, bilim berý júıesin damytýdaǵy tájirıbelerińizge qyzyǵýshylyq tanytady. Sizdiń saparyńyzdyń qorytyndysynda kommersııalyq kompanııalarmen quny 100 mıllıon dollarlyq kelisimderge qol qoıyldy, al taýar aınalymynyń kólemi 1 mıllıard dollarǵa jetti, – dedi Qazaqstan Prezıdenti.
Nursultan Nazarbaev bul kezdesý búkil álemde jahandyq ıadrolyq qaýipsizdikti qamtamasyz etýde zor máni bar sammıt aıasynda ótip jatqanyna da toqtaldy.
– Qazaqstannyń ıadrolyq qarýdan óz erkimen bas tartqan jáne Semeı ıadrolyq polıgonyn japqan el retinde bul is-sharaǵa tikeleı qatysy bar. Biz mundaı forýmdardyń ótkizilgenine qýanyshtymyz, óıtkeni, olar turaqsyzdyq jáne qalypty qurylymdy buzatyn kúshterdiń ıadrolyq qarýdy ıelený táýekeli artyp otyrǵan jaǵdaıda erekshe qajet, – dedi Qazaqstan basshysy.
Fınlıandııa Prezıdenti Astanaǵa byltyrǵy sapary kezinde óziniń zor tańdanysyn týǵyzǵan áserimen bólisti.
– Meniń saparymnyń nátıjeleri kóp úmit kúterlikteı boldy. Ekijaqty saýda kórsetkishteri ósti. Fınlıandııa isker toptarynyń Sizdiń elińizben yntymaqtastyqty damytý úshin ózara yqpaldastyqqa múddeliligi arta túskenin atap ótpekpin, – dedi S.Nıınıstıo.
Qazaqstan Prezıdenti Nursultan Nazarbaev Fransýz Respýblıkasynyń Prezıdenti Fransýa Ollandpen kezdesti.
Memleketter basshylary ortaq qyzyǵýshylyq týdyryp otyrǵan túrli salalardaǵy ózara yqpaldastyq aıasyn keńeıtý jaıttaryn talqylady.
Saýda-ekonomıkalyq yntymaqtastyqty damytýǵa, sondaı-aq Qazaqstan Prezıdentiniń Fransııaǵa sapary aıasynda qol jetkizilgen kelisimderdiń iske asyrylý barysyna da basa nazar aýdaryldy.
Buǵan qosa, eki eldiń basshylary halyqaralyq kún tártibiniń ózekti máseleleri jóninde pikir almasty.
Memleket basshysy Nursultan Nazarbaev Ulybrıtanııa Premer-Mınıstri Devıd Kemeronmen kezdesti.
Kezdesý barysynda Devıd Kemeronnyń Qazaqstanǵa sapary kezinde qol jetkizilgen kelisimderdiń iske asyrylý barysy talqylandy.
Atap aıtqanda, taraptar saýda-ekonomıkalyq, ınvestısııalyq jáne munaı-gaz salalaryndaǵy ekijaqty yntymaqtastyq aıasyn keńeıtý baǵyttaryn qarastyrdy.
Nursultan Nazarbaev pen Devıd Kemeron halyqaralyq kún tártibiniń ózekti máselelerin de qozǵady.
* * *
Qazaqstan Prezıdenti Nursultan Nazarbaev Gaagadaǵy Iаdrolyq qaýipsizdik jónindegi sammıt aıasynda ekijaqty kezdesýler ótkizdi.
BUU Bas hatshysy Pan Gı Mýnmen kelissózder barysynda bizdiń elimizdiń Birikken Ulttar Uıymynyń jahandyq baǵdarlamalary aıasyndaǵy qyzmetiniń negizgi baǵyttary, sondaı-aq halyqaralyq kún tártibiniń ózekti máseleleri talqylandy.
Buǵan qosa, taraptar sammıt jumysynyń aralyq nátıjelerin, sondaı-aq Qazaqstannyń ıadrolyq qaýipsizdikti qamtamasyz etý úderisine qatysý aspektilerin qozǵady.
* * *
MAGATE Bas dırektory Iýkııa Amanomen kezdesýde Iаdrolyq qaýipsizdik jónindegi jahandyq sammıttiń kún tártibine engizilgen máselelerdiń qorytyndylary qozǵaldy.
Áńgimelesý barysynda Qazaqstannyń MAGATE qyzmeti aıasyndaǵy bastamalaryna qatysty pikirler almasyldy.
Sondaı-aq, bizdiń elimizdiń ıadrolyq qaýipsizdik qaǵıdattaryn ilgeriletý jáne ıadrolyq qarýdy taratpaý úderisine qatysý máseleleri talqylandy.
* * *
Pákistan Islam Respýblıkasynyń Premer-mınıstri Navaz Sharıfpen kezdesý kezinde saýda-ekonomıkalyq, ǵylymı-tehnıkalyq salalardaǵy ózara yqpaldastyqty damytý perspektıvalary talqylandy.
Taraptar óńirlik qaýipsizdik máselelerin de qozǵady.
* * *
Ázerbaıjan Respýblıkasynyń Prezıdenti Ilham Alıevpen áńgimelesý barysynda saýda-ekonomıkalyq, ınvestısııalyq jáne otyn-energetıkalyq yntymaqtastyqpen qatar, ekijaqty qarym-qatynastardy damytýdyń negizgi baǵyttaryna qatysty pikir almasýlar boldy.
Memleket basshylary óńirlik jáne halyqaralyq uıymdar aıasyndaǵy ózara yqpaldastyq máselelerin de qozǵady.
Budan basqa, Nursultan Nazarbaev pen Ilham Alıev óńirlik qaýipsizdiktiń jaı-kúıi men halyqaralyq kún tártibiniń ózekti jaıttaryn talqylady.
