AQSh tarapy shabýyl sársenbide bastalýy múmkin ekenin eskertti. AQSh-tyń joǵary laýazymdy sheneýnigi jýrnalısterge bergen suhbatynda bul úndeý daǵdarystyń nasharlaýyn túbegeıli sheshpegenin atap ótken. Sheneýnik memleketter basshylary aldaǵy ýaqytta taǵy da kelissóz júrgizýge ýaǵdalasqanyn jetkizgen. Áıtse de, Ýkraınadaǵy ahýaldyń sheshilip ketýi ekitalaı.
Máskeýde syrtqy saıasat jónindegi aǵa keńesshi Iýrıı Ýshakov prezıdentterdiń áńgimesin «iskerlik» dep atap, «prezıdentter barlyq deńgeıdegi baılanystardy jalǵastyrýǵa kelisti» dedi. Biraq ol AQSh-tyń Reseı shabýyldaıdy degen málimdemesin joqqa shyǵardy. Aq úı málimdemesine súıensek, Baıden Reseı Ýkraınaǵa basyp kirse, AQSh pen odaqtastary «naqty jaýap berip, Reseıge qarsy kúrdeli qadamǵa baratynyn» jetkizgen. Sondaı-aq AQSh máseleni dıplomatııalyq jolmen sheshýge daıyn ekenin, biraq ahýaldyń basqalaı órbýin de esten shyǵarmaıtynyn atap ótken.
Fransııa prezıdenti Emmanýel Makron da Reseı basshysymen jeke sóılesken. Olardyń áńgimesi bir saǵat 40 mınýtqa sozyldy. Kelissóz kezinde Fransııa prezıdenti jaǵdaıdy shıelenistirip qoıyp «shynaıy dıalog» júrgizilmeıtinine ekpin bergen. Qazirgi tańda Reseı áskerlerin shekaraǵa jaqyn pozısııalarǵa ákelip jatyr.
AQSh Memlekettik hatshysy Antonı Blınken de senbi kúni Reseı syrtqy ister mınıstri Sergeı Lavrovpen sóılesip, Reseıdiń Ýkraına tóńireginde sebepsiz áskerı kúsh ákelýin toqtatý maqsatynda dıplomatııalyq sheshim qabyldaýǵa shaqyrdy. «Men Reseıdiń odan ári agressııasyna tabandy, jappaı jáne birtutas transatlantıkalyq jaýap qaıtarylatynyn qaıtaladym», dedi Blınken.
