Qaıta oralmaıtyn ýaqyt sekildi tarıh ta toqtamaıdy. Búgingi serpilis jasar jaýapty kezeńde bizge basshylyq etý Qasym-Jomart Kemelulyna júktelip otyr.
Biraz jyldan beri jumys babynda, adamdyq qarym-qatynasta bolǵan azamattyń biri retinde Prezıdenttiń ustamdy minezi, ár sózine, ózine úlken jaýapkershilikpen qaraıtyny, biz tanysqaly ótken bes laýazymynda esh ózgermegeni erekshe qasıetter der edim.
Sondyqtan Prezıdentimizdiń bergen ýádeleri, baǵyt-baǵdarlamalary, bastamalary jańaǵydaı qasıetter men dúnıejúzilik saıasat basynda bolǵan tájirıbelerinen, elimizdegi osy kezeńdegi qajettilikten týyndaǵan dep oılaımyn.
Otyz jylda qol jetkizgen jetistikterimizdi elekten ótkizip, kemshilikterimizdi toqtatyp, qaıtalamaýǵa shaqyryp, jańa kezeńge jol bastaǵan Prezıdentimizge qoldaý kórsetip, ózimizge de jaýapkershilikpen qarap, boı túzeıtin kúnderde ómir súrip jatyrmyz.
El ardagerleri halqymyzdyń, ásirese jastardyń ǵasyrlar boıy qalyptasqan rýhanı qundylyqtardy, elge, jerge degen súıispenshilikti qasterlep, bilimdi, tárbıeli, eńbekqor bolyp qalyptasýyna júıeli yqpal etýde.
Álemdik jahandaný dáýirinde, kerekti baǵyttardy ıgerýmen qatar, tilimiz ben dinimizdi, ádebıetimiz ben mádenıetimizdi, tarıhymyzdy, ulttyq ádet-ǵurpymyzdy saqtaý úlken syn.
Ekinshi dúnıejúzilik soǵystaǵy Jeńistiń 75 jyldyǵy qarsańynda 2020 jyldyń mamyr aıynda shyqqan «Ardagerler týraly» Zań úshin el ardagerleri rıza. Sonan beri de eki zańda ózgerister men tolyqtyrýlarda ardagerler úshin qosymsha baptar qarastyrylyp, bir zań kúshine endi.
Sońǵy jyldary ardagerler «Dáneker» qanatqaqty jobasyn júzege asyryp, ár aımaqta júzdegen daýly máseleni sotqa jetkizbeı bitimgershilikpen kelisimge keltirýde. Bul jumys bir jaǵynan, sot júıesiniń jumysyn jeńildetse, ekinshiden, adamdar arasyndaǵy qarym-qatynasty ońaltýǵa septigin tıgizýde.
Bul máseleni jáne Ardagerler uıymdary jasap jatqan basqa da jumystardy Qasym-Jomart Kemelulynyń qabyldaýynda bolǵanymda baıandap, Prezıdentimizdiń qoldaýyn aldyq.
Ardagerler qazirgi jańa baǵytta jasalyp jatqan jumystarǵa úlken senimmen qarap, óz taraptarynan qyzmet etýde.
Elý jyldan astam ýaqyt elde, biraz jyl shetelde óndiriste, ǵylymı ortada, Úkimette, atqarýshy, zań shyǵarýshy oryndarda qyzmet atqaryp, bir bólek ómir kórgen azamat retinde aıtarym, biz bolashaqty tek ózimiz ǵana jasaımyz.
Olaı bolsa, ishten, syrttan óz jaǵdaılaryna rıza bolmaı, óz isine, óz basyna jaýap berýdiń ornyna jaý izdep, surqııa nıetine bet buryp, halyq arasyna iritki salyp, el tynyshtyǵyn buzýǵa shaqyrǵandardan saqtana bilýimiz kerek. Ony keshegi qańtar oqıǵasy aıqyn kórsetti. Kóptegen kemshiligimizdiń de beti ashyldy. Ashy da bolsa sabaq alǵanymyzdy moıyndaýymyz kerek.
Sondyqtan «qalaı ekenin bilmeımin, biraq olaı emes» degen pikirden bosap, ár qazaqstandyq óz pikirin oılanyp, ortaǵa salyp, bizge tarıh pen taǵdyrdyń násip etken kezeńinde basshymyz Qasym-Jomart Kemelulynyń jańa bastamalaryna tereń túsinikpen qarap, óz úlesimizdi qosýymyz kerek. Bul – zaman talaby.
Baqtyqoja IZMUHAMBETOV,
memleket jáne qoǵam qaıratkeri,
Qazaqstan Respýblıkasy «Ardagerler uıymy» respýblıkalyq qoǵamdyq birlestigi Ortalyq keńesiniń tóraǵasy
