Atalǵan is-sharaǵa Reseı Densaýlyq saqtaý mınıstrliginiń «Ulttyq kardıologııa medısınalyq zertteý ortalyǵy» – Chazov atyndaǵy kardıologııalyq ortalyǵynan 14 maman keldi. Aqpannyń 16-18 kúnderi kardıohırýrgter, kardıologter jáne anestezıologter toby Qazaqstandaǵy sozylmaly júrek jetkiliksizdigi bar pasıentterdi irikteý, baqylaý jáne hırýrgııalyq emdeý úderisimen jan-jaqty tanysty.
«Alǵan áserimiz kútkenimizden asyp tústi. Kardıohırýrgııalyq kómekti qamtamasyz etý jáne HeartMate 3 joǵary tehnologııalyq qurylǵysyn ımplantasııalaýdyń qyr-syry uńǵyl-shuńǵylyna deıin qarastyrylǵan ortalyqtyń qurylymy tańǵaldyrady. Júrek ortalyǵy kardıologteriniń joǵary biliktiligin erekshe atap ótkim keledi. Kardıologterdi hırýrgııalyq emdeý prosesine biriktirý pasıentterdiń operasııadan keıingi baqylaýdy klınıkalyq túrde jalǵastyrýǵa múmkindik beredi. Bul óte mańyzdy. Sondaı-aq ortalyq kardıologteriniń júrekishilik gemodınamıka túsinigi tańǵaldyrdy. Biz olarmen bir tilde sóılestik. Bul ujymnan jaǵymdy áser qaldy: meıirimdi jáne barlyq suraqqa jaýap berýge daıyn», dedi Chazov atyndaǵy kardıologııalyq ortalyǵynyń anestezıolog-reanımatologi Elena Dzybınskaıa.
Júrek ortalyǵynyń qyzmetkerleri pasıentterdi daıyndaý, olardyń jaǵdaıyna klınıkalyq-psıhologııalyq baǵalaý júrgizý, operasııadan keıingi emdeý jáne ońaltý týraly aıtyp berdi.
«Sheberlik sabaǵy baǵdarlamasynda dárister, teorııany tájirıbede qoldaný qamtyldy. Sondaı-aq medısına qyzý talqylandy. Bul oqytý Máskeý medısınalyq ortalyǵynyń áriptesterimen belsendi tájirıbe jáne bilim almasýǵa yqpal etti», deıdi kardıohırýrgııa bóliminiń meńgerýshisi, kardıohırýrg dáriger Svetlana Novıkova.
Qazir sheberlik sabaǵy barysynda operasııa jasalǵan pasıentterdiń jaǵdaıy táýir, dárigerlerdiń baqylaýynda. Olardyń júregine ımplantasııalanǵan qurylǵy ómir sapasyn jaqsartýǵa kómektesedi jáne júrek transplantasııasyna kópir bola alady.
«Búgingi tańda Reseıde LVAD qurylǵysyn ımplantasııalaý tájirıbesi az. Bul rette qazaqstandyq mamandardyń tájirıbesin aýyz toltyryp atap ótýge bolady. О́ıtkeni Júrek ortalyǵynda osyndaı 400-ge jýyq operasııa jasaldy. Sheberlik sabaǵy óte mazmundy ótti. Oqytý tek teorııalyq sabaqtardan ǵana emes, sonymen qatar janýarlar materıalynda praktıkalyq oqýdan, sondaı-aq operasııalyq proseske qatysýdan turdy. Onyń barysynda biz qurylǵynyń qalaı ımplantasııalanǵanyn kórdik», deıdi Máskeýden kelgen kardıohırýrg Kırıll Mershın.
