Beıresmı formattaǵy kezdesýge muryndyq bolǵan Jazýshylar odaǵynyń Shyǵys Qazaqstan oblysy fılıalynyń dırektory Álibek Qańtarbaev Katonqaraǵaıdan bastalǵan is-shara ózge óńirlerde de jalǵasyn tabatynyn aıtty.
– Shyǵarmashylyq-aqparattyq kezdesýdi qaıdan bastaımyz degende, birden Katonqaraǵaıdan bastaý kerek dedim. Nege degende, rýhanııattyń uıysqan bir jeri osy – Katonqaraǵaı. О́zderińiz bilip otyrsyzdar, qańtar oqıǵasy kúlli qazaq halqyna ońaı bolǵan joq. Ony jýyp-shaıyp, qaıta aıtatyn emes. Bul oqıǵadan keıin Prezıdent úndeýin joldady. Sondaǵy aıtqany, shynaıy «Jańa Qazaqstan» qurý. Tyńdasańyzdar, Memleket basshysy kókeıimizde júrgen kóptegen máseleni, júıedegi kemshilikterdi ashyp aıtyp berdi. Qazir Prezıdenttiń moınynda óte aýyr mindet tur. Eldigimizdi saqtap qalaıyq desek, memleketimizdiń áleýmettik-ekonomıkalyq jaǵdaıyn nyǵaıtamyz desek, Q.Toqaevty qoldaýymyz kerek, – dedi Álibek Qańtarbaev.
О́z kezekterinde sóz alǵan qatysýshylar da Prezıdenttiń júrgizip otyrǵan saıasatyna qoldaý bildiretinderin jetkizdi. Qoldap qana otyrǵan joq, shynaıy jańa Qazaqstannan úmit kútip otyr. Shekara shebindegi aýdannan taban aýdarmaı otyrǵan aqyn, jýrnalıst Jánibek Qyzyr Memleket basshysynyń jumysyna rızashylyǵyn bildire kele, turǵyndardyń sany eki-úsh ese azaıyp ketken aýdandardyń jaǵdaıyn erekshe nazarǵa alsa eken degen tilegin de aıtyp qaldy.
– Prezıdent – rýhanııat ýyzyna toıǵan adam. Ámbe, belgili jazýshy Kemel Toqaevtyń uly. Osy ýaqyt ishinde halyqtyń seniminen shyqty. Endi Qazaqstandy jańartady, kemshin tustaryn túzeıdi dep senemiz. Jalpy, katonqaraǵaılyqtar – jaqsylyqtan úmit kútip kele jatqan el, – dedi aqyn Jánibek Qyzyr.
Iá, shekara aýdandaryndaǵy eldiń turmysy, halyq sanynyń azaıýy – búgingi kúnniń ózekti máselesi. Bul taqyryp qozǵala qalsa, shekarada jatqan ár aýyldyń azamaty pikir bildirýge ázir. Aıta ketsek, Prezıdent bul problemany da óz nazaryna alyp, úkimetke tapsyrma bergen-tuǵyn. Jýrnalıster tarapynan da birneshe ret qozǵalǵan.
– 1997 jyly áıtip-búıtip jatqan kezde Katonqaraǵaı quryqqa ilinip ketti. О́zderińiz bilesizder, sol 1997 jyldan keıin halyqtyń jappaı qalaǵa andyzdaýy bastaldy. Oǵan deıin halyqtyń qoparyla kóshýi bolǵan joq. Biraq sol kezden beri Úkimetke de, Prezıdentke de jazylyp keledi. Baıqaımyn, seń sógile bastaǵan sııaqty, – dep óz oıyn aıtqan Álibek Qańtarbaev áńgime aýanyn shyǵarmashylyqqa burdy.
Rýhanı kezdesýde belgili aqyn Serik Qusanbaev án salyp, aqyn Ermek Daıyrbaev óleń oqydy. Mynaý pandemııanyń kesirinen óleń-jyrǵa sýsap qalǵan halyq aqyn-jazýshylarǵa, jýrnalısterge qurmet-qoshemet kórsetti. Is-sharaǵa kórermen retinde qatysqan Kókbastaý negizgi orta mektebiniń qazaq tili men ádebıeti páni muǵalimi Medet Ádilhanov ózimen birge erte kelgen aqyn shákirtin tanystyryp, el aǵalary aldynda jas aqyn jaýqazyn jyrlaryn oqydy, úlkenderdiń aq batasyn aldy. Kezdesý sońynda aýdandyq máslıhat hatshysy Dúısen Bralınov zııaly qaýym ókilderiniń aýyl jurtshylyǵymen ótkizgen taǵlymdy júzdesýleri úshin aýdan jurtshylyǵy atynan alǵysyn bildirdi.
Shyǵys Qazaqstan oblysy,
Katonqaraǵaı aýdany
