Qara óleń tórin kúzettim,
Qaǵbamdaı kórip kıeli.
Atylǵan oǵan myń oqtyń,
Bir ushy maǵan tıedi, - dep osy óleńi arqyly eshkimniń peshenesine jazyla bermeıtin Abaı, Shákárim, Muhtar syndy ulylar týǵan ortadan shyqqanyn maqtanyshpen jetkizgen aq peıili qandaı deseńizshi! Qańtar aıynyń 27-kúni 72 jasqa tolǵan arqaly aqynnyń taǵy bir daralyǵy - bar ataǵynan «Abaılyq aqyn» degen dárejesin bıik qoıatyny.
Bosamaı júrgen taqymy,
Bolaıyn men-aq qolbala,
Alashtyń kóp qoı aqyny,
Abaılyq aqyn men ǵana, - dep aqynnyń ózi jyrlaǵandaı, jaqynda ShQO, bilim basqarmasynyń «Abaı kolledji» KMM-siniń kitaphanashysy Janna Sherızatqyzynyń uıymdastyrýymen kolledj stýdentterimen QR Jazýshylar jáne QR Jýrnalıster Odaǵynyń múshesi, "Qurmet" ordeni men Y.Altynsarın tósbelgisiniń ıegeri, Abaı aýdannyń "Qurmetti azamaty", "Aqsuńqar" aqyndar synybynyń jetekshisi aqyn Tólegen Janǵalıevtiń shyǵarmashylyǵyna arnalǵan "Abaılyq aqyn" atty kezdesý kesh bolyp ótti. Kitaphanashy Janna Sherızattyń osynaý sharaǵa tyńǵylyqty daıyndalǵandyǵy baıqaldy.
Sherızatqyzy Janna 1978 jyly 16 qarashada Abaı aýdany, Medeý aýylynda dúnıege kelgen. Bilimi joǵary. Sh.Sh.Ýálıhanov atyndaǵy Kókshetaý memlekettik ýnıversıtetin, S.Toraıǵyrov atyndaǵy Pavlodar memlekettik ýnıversıtetin kitaphana isi mamandyǵy boıynsha bitirgen. Áleýmettik ǵylymdar magıstri. «Qazaqstannyń qurmetti kitaphanashysy» tósbelgisiniń jáne QR Mádenıet jáne sport mınıstrliginiń «Qurmet» gramotasynyń ıegeri. Kúmis alqaly kóp balaly ana.
Tólegen aǵamyzdyń shyǵarmashylyqqa toly kitap kórmesi kópshiliktiń qyzyǵýshylyǵyn arttyrdy. Kezdesýdi kolledj dırektory Rollan Jumaqsanov alǵy sózben ashyp, aqynnyń shyǵarmashylyǵyna tabys tiledi. Kezdesýde, aqynnyń shákirti Baqytjan Aqanuly ustazynyń jyrlaryn tebirene oqysa, dástúrli ánshi Qonysbek Sovetbekuly "Qunanbaı" ánin, kolledj ustazy Shárbaný Álibekqyzy "Abaı urpaqtary ánin" oryndady. Stýdent jastar Toqtasyn Gúlnar «Saýalnama», Amangeldi Ersin «Qansonar», Tóleýbekova Elmıra «Til», Jaqsylyqova Marjan «Men», Dúısenbaeva Erkejan «Týǵan jer» aqyn óleńderin jatqa oqyp, aqynnyń júrip ótken joly shyǵarmashylyǵy týraly ózderin tolǵandyrǵan «Sizdiń osy ýaqytqa deıin, qansha kitabyńyz basylyp shyqty jáne qansha danadan? Áli de kitap shyǵarý oıyńyzda bar ma?», «Sizge ózińiz jyrlaǵandaı, «Abaılyq aqyn» degen ataqty alyp júrý qanshalyqty mańyzdy?», «О́zim ketem dep qaıǵyrmaımyn, artymda osy topyraqta óleńniń kıesin ushyrmaı ustap otyratyn "qara" tabyla ma, joq pa? Soǵan alańdaımyn. О́leńsiz, jyrsyz qalǵan kúni Abaı eliniń ólgeni..." – degen edińiz bir suhbatyńyzda. Bulaı deýińizdiń syry nede?» degen onnan asa suraqtaryna jaýap aldy. Kezdesý sońynda aqyn óziniń "Ertistiń arǵy jaǵy, bergi jaǵy..." atty kitabyn qoltańbasymen kolledj kitaphanasyna syıǵa tartty.
Uly Abaı atamyzdan bastaý alǵan aqyndyq ónerdiń adal uly bolyp, el namysy synǵa túser sátte ulylar eliniń ulaǵatyn ulyqtap, Abaı, Muhtar, Shákárim dep urandap elim dep soqqan eljandylyǵy bir tóbe Tólegen aǵamyzben barshamyz maqtanamyz. Qara óleńniń tórin kúzetip qana qoımaı, talant kózin tamyrshydaı tap basyp, qanshama daryndy shákirt tárbıelep keledi. Abaı eliniń aıbaryn asyryp, shynshyldyǵymen, sheshendigimen Shyńǵystaý jurtynyń muń-muqtajyn shyr-pyr bolyp óleńmen órip júrgen Tólegen Janǵalıulynyń ómiri men shyǵarmashylyq joly jas urpaqqa úlgi. Sol sebepti de aqynymyzdy árkez dáriptep, qoshemetteýge qashanda ázirmiz.
Hákim Abaı atyndaǵy kolledj stýdentteri aqyn shyǵarmashylyǵynan mol maǵlumat pen áser alyp tarasty. Aldaǵy ýaqyttarda osyndaı tárbıelik máni bar kezdesýler jalǵasyn taba bermek.
Anar SÄRSENBİNA,
Shyǵys Qazaqstan oblysy, Abaı aýdany
«Abai elı» gazetiniń jaýapty hatshysy, jýrnalıst
