Sýretti túsirgen Erlan OMAR, «EQ»
«Qasiretti qańtar» Qazaqstan tarıhyn jańa betburysqa alyp keldi. Biz táýelsiz elimizdiń taǵdyryn sóz etkende qańtar oqıǵalaryna deıin jáne keıin dep saraptaıtyn boldyq. Basymyzdan ótkergen qaıǵyly qańtar oqıǵalary bizge úlken sabaq bolǵany da anyq. «Amanat» – osy oqıǵalarǵa baılanysty negizsiz qýdalanǵan azamattardyń quqyqtary men bostandyqtaryn qorǵaý úshin qurylǵan komıssııa. «Amanattyń» quramynda segiz adam bar. Onyń ekeýi kásibı zańger, komıssııa tóraǵasy Abzal Quspan men Mádı Myrzaǵaraev, sondaı-aq Ulttyq keńes múshesi Ýaıs Ersaıynuly bar.
Qańtar oqıǵalaryn tergeý kezinde jazyqsyz japa shegip, quqyqtyq kómekke zárý bolǵandarǵa qoldarynan kelgenin aıanyp qalmaǵan amanattyqtarǵa qarapaıym azamattardyń aıtar alǵysy kóp. Solardyń biri – Almaty qalasynyń turǵyny Jasulan Amangeldınov. Qandy qańtar kezinde bir kózinen aıyrylyp, bir qulaǵy estimeı qalǵan, keıinnen tergeý ızolıatorynda azap kórgen azamat: «Amanat» uıymyna, sonyń ishinde Abzal Quspan bastaǵan aǵalarymyzǵa aıtar alǵysym sheksiz. Úıime, otbasyma aman-esen oralýyma sebep bolǵan aǵalarymnyń jasap jatqan bar jaqsylyǵy Alladan qaıtsyn. Basyma osyndaı qıyn is túskende janyma medeý bolyp, eńsemdi kóterdi. Synyp ketpeýime de birden-bir sebepshi bolǵan – solar», deıdi. Otyz jastaǵy Jasulannyń tergeý ızolıatorynda kórgen qorlyǵy men azaby búkil qoǵamdy dúr silkindirgen bolatyn. Aýrýhana tóseginde jatqan jerinen súırep áketip, oılaryna kelgenin istegen jandaıshaptardyń qorlyǵynan alyp shyqqan advokat Abzal Quspanǵa rııasyz rahmetin aıtqan jigittiń taǵdyry eshkimdi beıjaı qaldyrmasy anyq. Al baýyry Jandostyń taǵdyry úshin shyr-pyr bolǵan Eldos Qarsybaev: «Baýyrymnyń tergeý abaqtysynan bosap shyǵýyna «Amanat» táýelsiz komıssııasy músheleriniń kóp kómegi tıdi. Alǵys aıtý kúni qańtar oqıǵasy kezinde negizsiz qamaýǵa alynǵan ár qazaqtyń taǵdyryna arasha túsken Abzal Quspan, Erkin Raqyshev sekildi azamattarǵa shyn júrekten alǵys aıtamyz. Ol kisilerdiń arqalaǵan amanaty aýyr. Sondyqtan da qıyn da jaýapty isterine tek abyroı tileımin. Elimizdiń osyndaı azamattary aman bolsyn!», degen júrekjardy tilegin bildirdi.
Alǵys – adamnyń júreginen shyǵatyn shynaıy, taza iltıpat. Ony ótirikpen, jaǵympazdyqpen jyltyratyp tapsyryspen jasap shyǵara almaısyń. Al keshegideı el basyna, er basyna kún týǵan syn sátte eń birinshi adamdyǵy men azamattyǵynan aınymaǵan amanattyqtardaı advokattardyń alǵysqa bólenýi eriksiz qýantady. Esterińizde bolsa, qańtar oqıǵalaryna baılanysty elimiz boıynsha 800-ge jýyq adam qamaýǵa alynǵan edi. Amanattyqtardyń aralasýymen olardyń 200-den astamy bostandyqqa shyqsa, onyń ishinde 2 áıel jáne 12 kámelettik jasqa tolmaǵan jetkinshek bar.
