Aımaqtar • 01 Naýryz, 2022

Jomart jandarǵa yrzalyǵy sheksiz

15 ret kórsetildi

Oıyn balasy dersiz. Jasyna qarap. Iá, eger tórt qubylasy teń derlik otbasynda bolsa ýaqytynyń kóbin oıynǵa bóler me edi, kim bilsin. Biz áńgimelegeli otyrǵan Orazymbettiń oılaǵany oıyn emes, búkil otbasynyń qamy edi. Toǵyz jasynda adamdardyń bir-birine jıi jaqsylyq jasaýy olardy jaqyndastyratynyna, dostastyratynyna anyq kóz jetkizdi.

Jaqsylyq jasaý – adam boıyndaǵy asyl qasıetterdiń biri ekenin bildi. Jaqsy adam qol ushyn berýge, járdem etýge, janashyrlyq tanytýǵa, kómek kórsetýge, qoldaý jasaýǵa árdaıym daıyn turatynyn óz basynan ótkerdi. Eresekterden erekshe úlgi aldy, ózi de erteńgi kúni jaqsylyq jasaýǵa jaqyn turatyn bolady. Al búginde Orazymbettiń jomart jandarǵa aıtar alǵysy sheksiz.

«Baspana bolsa ǵoı, óskende ber­gen­derińdi qaıtaryp berem, shyn aıtam» dep armanyn aıtqan 9 jastaǵy Ora­zymbettiń sózi kópshilikti tebi­rentkeni, oılandyrǵany anyq. Júregi názik, asa sezimtal balany muńdy etken ahýalǵa tereńdemeı-aq qoıalyq. Kópshilikti jylatqan Orazymbet qart ájesimen, zaǵıp anasymen, eki múgedek aǵasymen birge turady. Otbasy qabyrǵalary búlingen, sylaǵy túsken úıdi jalǵa alyp otyrǵan. Tórtinshi synypta oqıtyn Orazymbettiń anasy Baqytgúl – birinshi top múgedegi, kózi kórmeıdi. Jasy kishi bolsa da, erte eseıgen bala mektepten erte shyǵyp, anasyna, eki aǵasyna kómektesetinin aıtady. Qarny ashqan kúnderi synyptastarynan qaryz suraıtynyn da jasyrmaıdy. Kópshilikke jarııa bolǵan kórsetilimde ol óziniń bir-aq armany bar ekenin jetkizdi. «Meniń bir-aq armanym bar, ony oryndasańyzdar, ózim de qaıtaryp berem. Tek bir ǵana baspana alyp berseńizder, jetedi. Anam da, men de qınaldym. Anamnyń kózi kórmeıdi, aǵam da aýyrady, ekinshi aǵam da kemtar. Ájem de qartaıyp keledi, jasy kelip. О́tinish, kómektesińizdershi. Bir baspana bolsa da jetedi. О́sken kezimde qaıtaryp beremin. Shynymdy aıtam», dedi ol. «Hareket» qaıyrymdylyq qorynyń belsendi múshesi, akter Madııar Serikbaevtyń aıtýynsha, oǵan túndeletip vıdeo-habarlama kelgen. Akter beınetúsirilimdi kórip, beıjaı otyra almaǵanyn aıtady.

Qazaq elinde qaıyrymdy jan kóp. Solardyń basyn qosyp, muqtaj jan­darǵa qol ushyn berip júrgen «Hareket» qaıyrymdylyq qory Orazymbetke Shymkent qalasynan 5 bólmeli úı syılady. Odan bólek balanyń anasy Baqytgúldiń kózin tegin emdetýge sertıfıkat tabys etildi. Sondaı-aq Orazymbettiń ózine sý jańa kompıýter men 5 mıllıon teńgege sertıfıkat berildi. Bul qarajatty bala 18 jasqa tolǵannan keıin qajetine qaraı jarata alady. Osyndaı jurt súısinerlik ıgilikti is jarııa bolǵan «Túngi habar» baǵdarlamasynda esimi elge málim ánshi Sáken Maıǵazıev Orazymbettiń eresek azamattardyń sózin aıtqanyn jetkizdi. «Áleýmettik jeli arqyly ózderińiz kórdińizder, bárimiz tebirendik. Bala armany oryndalsyn. Bir-aq nárse aıtqym keledi, Allanyń qalaýymen sol armandaryń oryndalyp jatsa da, el-jurt bolyp jumylyp, jylý jınap, óz aǵaıyndaryń, baýyrlaryń ózekke teppeı, kómektesip jatqan jaǵdaıda da, ol syılyq bolady. Al endi sony qaıtaramyn degen raıyńnan qaıt, aınalaıyn. Kúlli qazaq saǵan sol dúnıeni qaıtaryp berý úshin emes, Allanyń razylyǵy úshin ózimizdiń aǵaıyn-týysqandar berip jatyr dep qabylda», dedi Sáken Maıǵazıev.

Armandarynyń oryndalǵanyna sene almaǵan Orazymbet kóz jasyn ja­sy­­ra almady. Bala kóńil tolqyp, aıt­­qysy kelgen júrek sózin tolyq jet­kize al­mady. «Barshalaryńyzǵa rah­met! Alla­dan qaıtsyn», deýmen bol­dy. Al Ora­zym­bettiń naǵashy ájesi: «Jetimdi jebe­genniń aldynan jeti peıishtiń esigi ashy­lady. Tilek­teriń qabyl bolsyn!», dep analyq batasyn berip, alǵysyn bildirdi.

Orazymbet zaǵıp anasynyń qoly­nan jetektep, jańa úıdegi barlyq ból­­me­lerdi tanystyrǵan. Úıdiń syr­tyndaǵy keń aýlaǵa qııar, qyzanaq pen basqa da kókónister jáne gúl ekpek. Erteńgi kúnine senimdi balanyń iske asyrǵysy keletin jospary kóp.

 

ShYMKENT

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar