Elimizdiń 1992 jyly 2 naýryzda BUU Bas Assambleıasynyń 46-sessııasynda múshelikke qabyldanǵany belgili. Sodan beri qazaq jerinde BUU júıesi baǵdarlamalarynyń ókildikteri ashyldy. 2017-2018 jyldary BUU Qaýipsizdik Keńesiniń turaqty emes múshesi bolyp saılanǵan elimiz terrorızmnen azat álemge qol jetkizý tártibi kodeksine bastamashy boldy. Qazaqstannyń ıadrolyq qarýdan óz erkimen bas tartqan 29 tamyzdy Iаdrolyq synaqtarǵa qarsy is-qımyldyń halyqaralyq kúni retinde BUU deńgeıindegi mereke esebinde atalyp ótýiniń mańyzdylyǵyn da atap ótken jón. Bul sheshim 2009 jyldyń 2 jeltoqsanynda BUU Bas Assambleıasynyń 64-sessııasynda qabyldandy. Bertinde BUU keńsesiniń Aýǵanstannan Almatyǵa kóshirilýi de elimizge salmaqty senim júktegeni anyq.
Birikken Ulttar Uıymy týraly sóz bolǵanda, álbette BUU Bas hatshysynyń orynbasary jáne Jenevadaǵy bólimniń Bas dırektory laýazymdy qyzmetterin atqarǵan Memleket basshysynyń bedeli týraly aıtpaı ketý múmkin emes.
Árıne, BUU týraly kóp aıtýǵa, tipti synaýǵa bolady. Qazirgideı dúnıe dúrbeleńge túsken taǵdyrsheshti syn saǵatta uıymnyń qaýqarsyzdyǵy adamzatty alańdatpaı qoımaıdy. Sondyqtan ony reformalaý qajettigi týraly da kópten beri kún tártibinen túspeı keledi. Áıtse de, ásirese Reseı-Ýkraına daǵdarysy aıasynda biz Jer sharynda beıbitshilik pen turaqtylyqty saqtaý úshin bul uıymnyń jetkiliksiz de bolsa, mańyzdylyǵyna taǵy bir ret kóz jetkizdik.
Taıaýda Qazaqstan Prezıdenti Nur Otan partııasynyń (qazirgi Amanat) kezekten tys sezinde sóılegen sózinde «daǵdarysty halyqaralyq quqyq aıasynda tanylǵan BUU Jarǵysy negizinde ǵana sheshýge bolady» dep óz ustanymyn naqty bildirdi. Dál osy kúni Q.Toqaev óziniń Twitter paraqshasynda: «30 jyl buryn Qazaqstan BUU-nyń tolyqqandy múshesi boldy. Biz uıymmen jahandyq qaýipsizdik jáne úılesimdi qoǵam qurý máselelerinde jemisti yntymaqtastyqtamyz. Saıası shıelenistiń údeı túsýi jaǵdaıynda biz BUU-nyń kúsheıýin jáne onyń uıystyrýshy rólin qoldaımyz», dep jazdy.
Bul – Qazaqstan Prezıdentiniń jahan jurtshylyǵyn alańdatyp otyrǵan túıtkildi jaıt boıynsha beıtarap bitimger jolyn ustanatynyn baıqatty. Rasynda, solaı boldy da. Memleket basshysy áýeli Reseı Prezıdenti V.Pýtınmen, keıin ile-shala Ýkraına Prezıdenti V.Zelenskıımen telefon arqyly sóılesip, gýmanıtarlyq máselelerdi talqylady. Buǵan deıin de álem aldynda ózin baıypty ári senimdi seriktes retinde tanyta bilgen Qazaqstannyń bul bitimgerligi ádil jáne bilikti tóreshi retinde baǵalandy.
Joǵaryda aıtylǵandardy qorytyndylaı kele, birqatar oı túıindeýge bolady:
Birinshiden, biz shekaramyzdy der kezinde shegendep, búkil ólshemder boıynsha kórshilerimizben senimdi ári «tatýkórshilik» qurý syndy jahandyq jetistikterimizdi aıryqsha qadirleýimiz qajet.
Ekinshiden, sol kezdegi elordany soltústikke kóshirip, Saryarqanyń tórine jańa qala salýdyń el tutastyǵy men táýelsizdigin saqtaý úshin qanshalyqty mańyzdy ári der kezinde qabyldanǵan sheshim ekenin kóremiz.
Úshinshiden, tóńiregimizdegi qandy qyrǵynnan sabaq alatyn mańyzdy máseleniń biri – kez kelgen «halyqaralyq qaýipsizdik kepildigi» degen uǵymnyń eles bolyp qalý qaýpi. Muny «Býdapesht memorandýmy» syndy bir kezdegi qundy qujattyń iske alǵysyz bolyp qalýynan da anyq baıqaýǵa bolady. Budan «óz-ózińe bekem bol, kórshińdi ury tutpa» degen halyq danalyǵynda aıtylǵandaı, árkim óz etek-jeńin jınap, qaýipsizdigin óz qolyna alý kerek degen ashy da bolsa aqıqat túıin shyǵady. Osyǵan baılanysty teńdiktiń tarazysy bolyp, álemdik ádiletti kúzetkende, álsizdi áldige jyǵyp bermegende ǵana Birikken Ulttar Uıymynyń bedeli bıikteıtini anyq. Qalaı degende, «jalǵyzdyń úni shyqpaıtyn» qazirgi zamanda bilekke emes, bitimge shaqyratyn BUU men halyqaralyq ınstıtýttardyń mańyzy kún saıyn artyp kele jatqanyn, sondyqtan ony jetildire túsý qajettigin taǵy bir ret baıqadyq. Halyqaralyq kelisim men úılesimge ıek artqan, keńdik pen teńdikti qatar ustanǵan elimizdiń bitimgerlik bolmysy beıbitshilikti qalaıdy.
