Bul jaıynda Ekologııa, geologııa jáne tabıǵı resýrstar mınıstrliginiń baspasóz hatshysy Oljas Berkinbaev Facebook paraqshasynda jazdy.
«Almaty oblysynda brakonerler sibir eligin (erkegi eken) atyp, ony at quıryǵyna baılap jiberipti. Ile Alataýy ulttyq parki Túrgen fılıalynyń ınspektorlary Q.Áshimov, M. Baıtasov, K. Jylqaıdarovtar reıd júrgizip, Almaty memlekettik tabıǵı keshendi qoryǵynyń aýmaǵynan Almaty oblysynyń eki turǵynyn eki myltyǵymen qosa ustaǵan. Olar salt atpen júrgen. Álgi brakonerler atqan oljasyn sol qalpy at quıryǵyna baılap qoıǵan. Olardy ustap jatqanda elik baılanǵan at úrkip, aýylǵa qashqan. Aldymen brakonerlerdi quryqtaǵan ınspektorlar artynsha elik baılanǵan atty da ustaǵan», dep málim etti Oljas Berkinbaev.
Onyń aıtýynsha, Ekologııa mınıstrliginiń ınspektorlary zań buzǵandardy Almaty oblysy Eńbekshiqazaq aýdandyq polısııa basqarmasyna jetkizgen.
Qazir atalǵan fakti boıynsha sotqa deıingi tergep-tekserý amaldary júrgizilip jatyr.
«Aıta ketetin jaıt, bundaı zań buzýshylyq úshin qylmystyq jaýapkershilik qarastyrylǵan» dep tolyqtyrdy mınıstrlik ókili.
