Bobrovka kenti men Beıbitshilik aralynan basqa 13 ýchaskede, ıaǵnı Shyǵys kenti, Voshod, Jolaman, Mırnyı, Stepnoı, Lodochnaıa aýdany, Zaton, 1-shi shaǵyn aýdan, Dalnıı, Iýnost, Novostroıka, Kókentaý jáne Muqyr aýyldarynda arnalardy tazartý, sý ótkizý qubyrlarynyń dıametrin ulǵaıtý, jaǵalaýdy nyǵaıtý jumystary júrgizildi. Sý arnasynan shyǵyp ketetin tustarǵa bógetter qoıylyp, sý basý qaýpi barynsha azaıtyldy.
Naýryz aıynyń basyndaǵy jaǵdaı boıynsha Ertis sýynyń deńgeıi 293 santımetrdi qurady. Ertis ózenindegi muzdyń qalyńdyǵy 44 santımetr bolsa, qar qabaty 16 santımetrdi quraǵan. Tońnyń qatýy – 107 santımetr. Bul kórsetkishterdi Tótenshe jaǵdaı departamentiniń mamandary únemi nazarlarynda ustap otyr. Aıtqandaı, Ertistegi sý deńgeıi 4 metrden assa ǵana qaýip bar. Al Shúlbi gıdroelektrstansasynan sý jiberý 550 m/s quraıdy.
Sý tasqynyna qarsy is-sharalar kezinde qar sýy basýy múmkin qalanyń 57 kóshesi anyqtaldy. Sol úshin de belgili bolǵan kóshelerdiń qary shyǵarylyp jatyr. Sońǵy derek boıynsha qala kóshelerinen 23 408,5 tekshe metr qar qala syrtyna tógildi.
Semeı qalasynyń aýmaǵynda 31 avtomobıl kópiri, 483 sý ótkizý qubyrlary bolsa, temir joldardaǵy kópirler sany – 178, sý ótkizý qubyrlary – 41. Bul nysandar da kóktem kezinde jiti baqylaýda turady. Ol úshin aýyldyq ákimdikterge jáne tıisti uıymdarǵa atalǵan sý ótkizý qubyrlaryn, sondaı-aq aryq júıesin, ózen arnalaryn qar men muzdan tazartý jóninde hattar jiberilgen. Jergilikti jerlerde táýlik boıy kezekshilik júrgizetin jumys brıgadalary quryldy. Qalanyń aryq júıelerin kún saıyn 25 adam jáne 5 birlik arnaıy tehnıka tazalaıdy.
TJM áskerı qyzmetshilerdi tarta otyryp, Mırnyı kenti, Podhoznaıa kóshesi, Dalnıı aýdanyndaǵy saıajaı massıvinde aryq júıesiniń muzyn tazartý jumystary júrgizildi. Shyǵys kentiniń «Pojarnaıa Sogra» saıajaı massıvi aýdanyndaǵy qamys pen ósimdikterdi kesý, sý qubyrlary men bulaqtar tazartyldy. Sondaı-aq bul aýmaqta turǵyn úılerdi sý basýdan saqtaý úshin jolasty qubyrlary aýystyryldy. Sý ótkizgishtigi anaǵurlym joǵary qubyrlar ornatyldy.
Apattyq-qutqarý jáne kezek kúttirmeıtin jumystardy júrgizý úshin 2022 jylǵa «Aýdan (oblystyq mańyzy bar qala) aýqymyndaǵy tótenshe jaǵdaılardyń aldyn alý jáne olardy joıý» baǵdarlamasy boıynsha jalpy somasy 20 077,8 myń teńge qarajat bólindi. Olar jarý jumystary men úgindi materıaldaryn daıyndaýǵa, janar-jaǵarmaıǵa, qaptar satyp alýǵa jáne ınertti materıaldar alý úshin bólingen.
Jalpy, Ertis ózeni jaǵalaýyndaǵy ýchaskelerdi sý shaıyp ketýden saqtaý úshin Mırnyı, Shyǵys kentterinde jáne Prıstan aýdanynda jaǵalaý nyǵaıtylyp jatyr. Uzyndyǵy 2 566 metr bolatyndaı nyǵaıtý jumystary tasqyn sýdan tónýi múmkin qaýipti edáýir azaıtady. Bul jobany iske asyrý 2021 jyly «Jumyspen qamtýdyń jol kartasy» sheńberinde kózdelgen. Alaıda shart boıynsha jumystardy aıaqtaý merzimi 2022 jyldyń 1 mamyryna deıin uzartyldy.
Basa aıta keterligi, kóktemgi maýsymǵa Semeı qalasynyń Tótenshe jaǵdaılar basqarmasynyń mamandary men qural-saımandary saqadaı saı. Atap aıtsaq, jeke quramda 417 adam, 269 birlik tehnıka (onyń ishinde 25 avtobýs), 40 birlik motopompa, 5 birlik júzý quraly daıyn.
Semeı qalasy ákimdigi merdigerlik uıymdarynyń kúshimen Krasnyı kordon, Zaton, Dalnıı shaǵyn aýdandarynda, Tatımov, Ogorodnaıa, Parovoznaıa, Sadovaıa, Makarenko, Akkýlskaıa, Dónentaev, Belibaev, Mıchýrın, Festıvalnaıa kóshelerinde aryqtar tazartyldy. Dál osyndaı jumystar oblystyń ózge aýdandarynda da júrgizilip jatyr. Iá, kóktemde kelýi múmkin tilsiz jaýǵa qashanda daıyn bolýymyz kerek.
SEMEI
