Reseı men Ýkraına arasyndaǵy kelissózder jalǵasýy kerek. Dúısenbide onlaın formatta eki el delegasııalary arasyndaǵy kelissózder ótkeni belgili. Alaıda taraptar «tehnıkalyq úzilis» jarııalap, ertesine qaıta jınalatyndaryn málimdedi. Ýkraına prezıdenti keńsesi basshysynyń keńesshisi Mıhaıl Podolıaktyń aıtýynsha, Reseı Federasııasy men Ýkraına delegasııalarynyń kelissózderinde seısenbige deıin tehnıkalyq úzilis jasalǵan.
Ýkraına prezıdenti Vladımır Zelenskıı Eýropalyq komıssııanyń basshysy Ýrsýla fon der Lıaıenmen, Polsha prezıdenti Andjeı Dýdamen, Lıýksembýrg premer-mınıstri Ksave Bettelmen sóıleskenin habarlady.
«О́zara túsinistik 100%-ǵa artty. Izraıl premer-mınıstri (Naftalı) Bennetpen de áńgimelestim. Bul soǵysty tezirek aıaqtaý úshin kelissózder júrgizýdiń mańyzdy bir bóligi boldy. Bizdiń delegasııa Reseı tarapymen kelissózderde osy baǵytta jumys istedi. Maǵan habarlanǵandaı ázirge jaman emes, biraq taǵy kóreıik. Erteń jalǵasady», dedi V.Zelenskıı.
Polsha, Chehııa jáne Slovenııa premer-mınıstrleri prezıdent V.Zelenskıımen kezdesý úshin Kıevke saparǵa shyqqany belgili boldy. Sapardy Polsha úkimeti rastady, ol sapardyń maqsaty «búkil Eýropalyq odaqtyń Ýkraınanyń egemendigi men táýelsizdigin qoldaýyn rastaý» dep málimdedi. Chehııa premer-mınıstri Eýropalyq Keńestiń resmı saparynyń maqsaty bostandyq pen táýelsizdikti qoldaýdy rastaý ekenin aıtty.
Qytaıdyń bas dıplomaty keshegi AQSh sheneýnikterimen joǵary deńgeıdegi kezdesýde eki tarapty taǵy da ustamdylyq tanytýǵa shaqyrdy. «Barlyq tarap barynsha ustamdylyq tanytýy kerek, beıbit turǵyndardy qorǵaýy kerek jáne aýqymdy gýmanıtarlyq daǵdarystyń aldyn alýy qajet», dedi Iаn Szechı. Ol Qytaı beıbit kelissózderdi ilgeriletýge daıyn ekenin jáne halyqaralyq qoǵamdastyq jaǵdaıdy tezirek retteý úshin jumylýy kerek degen pikir bildirdi. Alaıda ol barlyq taraptyń zańdy talaby eskerilýi kerek degendi qosa aıtty.
Bul ýaqytta Ýkraınadaǵy qaqtyǵystar toqtaǵan joq. Kıevte iri jarylystar estilip, turǵyn úılerde eki adam qaza bolǵany habarlandy. Qaýipsizdik úshin uzaq komendanttyq saǵat beısenbi kúni tańerteńge deıin jalǵasatyn boldy.
EO Reseıge qarsy tórtinshi sanksııalar paketin jarııalady, bul onyń áskerı qımyldardy qarjylandyrýyn tejeý úshin jasalǵan sharalar ekeni aıtyldy. Ulybrıtanııa sonymen qatar reseılik araq pen sándi taýarlarǵa qarsy jańa shekteýlerdi engizdi.
Reseılik aqparat agenttikteri eldiń Qorǵanys mınıstrliginiń resmı ókili Igor Konashenkov seısenbide Reseı áskerleri Ýkraınanyń Herson oblysynyń ońtústiginde búkil aýmaqty tolyq baqylaýǵa alǵanyn habarlady.
Nemis sýpermarketteri Ýkraınadaǵy daǵdarysqa baılanysty azyq-túlik jetispeýshiligi týyndaýy múmkin dep alańdap otyr. Onyń qatarynda kúnbaǵys maıy bar. Ýkraına kúnbaǵys maıynyń álemdik naryǵynyń 50 paıyzdan astamyn qamtamasyz etedi, al Germanııa onyń eń iri ımporttaýshylarynyń biri bolyp tabylady.
AQSh prezıdenti Djo Baıden NATO odaqtastarymen kezdesýler ótkizý úshin Eýropaǵa sapar shegýi múmkin ekeni aıtyldy. Reuters agenttigi ol 23 naýryzda Brıýsselde basqa basshylarmen kezdesip, odan keıin Polshaǵa barýy múmkin delingen habarlamada.
Al Ulybrıtanııa kóshbasshysy Borıs Djonson Batys elderin Reseı munaıyna táýeldilikti azaıtýǵa shaqyrdy. Onyń munaı óndirýdi ulǵaıtý máselesine qatysty Saýd Arabııasyna saparlaıtyny belgili boldy.
Ýkraına vıse-premer-mınıstri Irına Vereshýk Marıýpol qalasynda qalyp qoıǵan beıbit turǵyndarǵa kómek jetkizý úshin taǵy bir ret áreket jasap kóretinderin aıtty. Osyǵan deıin Reseı áskeriniń toqtaýsyz atysynan gýmanıtarlyq kómek tıelgen júk kólikteri dittegen jerine jete almaǵan.
