Kollajdy jasaǵan Záýresh SMAǴUL, «EQ»
«Kúnkórisiniń negizgi kózi mal sharýashylyǵy bolyp otyrǵan aýyl halqy úshin bul másele óte ózekti ekeni túsinikti. Sol sebepti de ishki ister organdary mal urlyǵymen kúresý, onyń aldyn alý maqsatynda keshendi sharalardy udaıy júrgizip-aq keledi. Máselen, zańdyq turǵyda úı-jaılarǵa kirip, birneshe ret mal urlyǵyn jasaý belgileri aýyr qylmystar sanatyna aýystyrylsa, qos taraptyń tatýlasýyna baılanysty jaýapkershilikten bas tartý múmkindigi de alynyp tastaldy», dep atap ótti S.Shalqarov.
Ishki ister mınıstrligi ókiliniń málimdeýinshe, jedel operasııa bastalǵaly beri polısııa qyzmetkerleri mal men et ónimderin tasymaldaıtyn 15 myńnan astam kólikti, 6525 mal jáne et ónimderin satyp alý, satý oryndaryna tekserý júrgizgen. Sondaı-aq 11 myńǵa jýyq sharýa qojalyqtary, shalǵaıdaǵy ýchaskeler men fermerlermen arnaıy jumystar júrgizilgen.
«Mal urlyǵyn jasady degen kúdikpen 221 adam ustalsa, onyń ishinde 30 top bar. Jedel is-shara nátıjesinde 886 mal basy zańdy ıelerine qaıtaryldy. Onyń ishinde 381-i jylqy maly», deıdi spıker. Sonymen qatar veterınarııa salasynda 1353 quqyq buzýshylyq anyqtalyp otyr. Bul derekterdiń deni mal jáne et ónimderin tıisti qujattarsyz tasymaldaý jáne satýǵa qatysty bolyp otyr.
Krımınaldyq polısııa departamenti qyzmetkeriniń aıtýynsha, mınıstrliktiń bastamasymen óńirlerde mal urlyǵynyń aldyn alý sharalaryn qabyldaýdy úılestiretin vedomstvoaralyq jumys toptary qurylǵan.
Sonymen qatar krımınogendik aýdandarda mobıldi beketter uıymdastyrylyp, qaraýsyz qalǵan malǵa arnalǵan qoralar sanyn arttyrý boıynsha jumystar júrgizilýde. Qazirgi tańda mundaı nysandardyń sany elimiz boıynsha 800-den asqan.
Jalpy, sońǵy 5 jylda elimizde mal urlyǵy 35 paıyzǵa azaıǵan. Sáıkesinshe, qoldy bolǵan mal sany da eki esege kemigen.
«Mundaı kórsetkishke mal urlyǵynyń aldyn alý baǵytynda qabyldanǵan sharalardyń arqasynda qol jetkizip otyrmyz. Oń úrdis bıyl da saqtalyp otyr, bul qylmys túri 32,7 paıyzǵa azaıǵan. Jyl bastalǵaly beri polısııa qyzmetkerleri urlanǵan maldyń 44 paıyzynan astamyn zańdy ıelerine qaıtardy. Urylardyń jeteginde ketken 1300 maldyń 573-i tabyldy», deıdi S.Shalqarov.
Keshendi jáne jedel izdestirý is-sharalary kezinde qolǵa túsken kúdiktilerdiń qatarynda ótken jyldyń jeltoqsan aıynyń sońynda Túrkistan oblysyna qarasty Ordabasy aýdanynyń aýmaǵynda mal urlyǵymen aınalysqan 5 adamnan turatyn qylmystyq top ta bar. Bas-aıaǵy bes mal urlyǵyna qatysy bar bolyp shyqqan urylar mal ıelerin 10 mıllıon teńgeden astam somaǵa shyǵynǵa batyryp ketken.
Al kóktem bastala salysymen qolǵa túsken taǵy bir top aram oılaryn Qaraǵandy oblysynda iske asyrǵan. Eń soraqysy, úsh adamnan turatyn top Shet aýdanynda jylqy men iri qara maldy aıdap áketpegen, atyp alǵan. Tintý kezinde bul top múshelerinen qylmys quraly bolyp tabylatyn tirkelmegen tegis uńǵyly myltyq tabylǵan.
