Taıaýda Qaraǵandy oblystyq beıneleý óneri mýzeıinde Naýryz merekesine arnap uıymdastyrylǵan «Ult ónerin ulyqtaýshy» kórme-jármeńkesinde osy buıymdar tórden oryn aldy.
Gúlbarshyn Matnııazova óziniń sheber shákirtterin oryndy maqtan etedi.
– Búginge deıin kolledjde 80 adam bilim alyp shyqty. Olardyń 20-sy elimizdiń túpkir-túpkirinde óz sehtaryn ashqan. Kolledjde 16 jastan 70 jasqa deıingi qyzdar men áıelder oqıdy. Menen sheberlikti úırengen 15 apa búginde óz isimen aınalysyp, sheberhanalar ashyp alǵan, – deıdi ol.
Sheberdiń bir shákirti Shynar Júsipova kıiz basý kásibin meńgerip júr eken. Qazirdiń ózinde ol sheberligin shyńdap, ulttyq ónerdi keıingi jastarǵa úırete alatyn dárejege jetipti.
– Gúlbarshyn Matnııazovanyń ádistemesi boıynsha bul ispen 2020 jyldan aınalysa bastadym. Mundaı iske eń aldymen qajyrly eńbek pen shabyt kerek. Ár jumystyń ózindik qıyndyqtary bar ǵoı: keıde buıymdy túni boıy kóz ilmeı jasaıtyn kezderim bolady, – deıdi jas ismer.
Shynar kórmege birneshe jumysyn ákelipti. Sonyń biri – qyzǵylt tústi shapan. Sheberdiń aıtýynsha, kóktemdi, kún men Naýryzdy beıneleıtin buıymdy «Kóńil kúı túsi» dep te ataýǵa bolady eken.
Qazirgi ýaqytta pedagog-psıholog mamandyǵyn meńgergen Shynar erekshe qajettilikteri bar balalarmen jumys isteıdi.
– Jas urpaqty óz ónerime úıretemin. Men balalar oıý-órnektiń ne ekenin, mán-maǵynasyn jáne onymen qalaı jumys isteý kerektigin bilgenin qalaımyn. О́z bilimim men sheberligimdi solarǵa jetkizgim keledi, – deıdi Sh.Júsipova.
«Ult ónerin ulyqtaýshy» kórme-jármeńkesiniń ashylý saltanatynda «Sán» kolledjiniń stýdentteri dızaınerlerdiń kıimderin kórsetti. Defılege bolashaq modeler-konstrýktorlar jáne dızaınerler atsalysty.
Jalpy, kórmege kelýshiler ózderine unaǵan buıymdardy satyp alyp, Naýryz merekesi qarsańynda ózderine jáne jaqyndaryna syılyq jasaı alady. Al mamandar júnnen jasalǵan buıymdardy jyldyń kez kelgen mezgilinde kıip júrýge bolatynyn aıtady.
QARAǴANDY
