Is-sharaǵa CDRC Qamqorshylyq keńesiniń múshesi, elshi Tekeda Alemý, CDRC Atqarýshy dırektory, doktor Abdeta Drıbsa Beıene, CDRC Atqarýshy dırektorynyń orynbasary Kasahýn Dender Meleze, sondaı-aq Ortalyqtyń sarapshylary men taldaýshylary qatysty.
Qazaqstan elshisi Barlybaı Sadyqov Prezıdent Qasym-Jomart Toqaevtyń Joldaýynyń negizgi baǵyttary, onyń ishinde Qazaqstandaǵy saıası júıeniń túbegeıli ózgerýi jáne «Halyq únine qulaq asatyn memleket» tujyrymdamasyn iske asyrýǵa baǵyttalǵan áleýmettik-ekonomıkalyq reformalar týraly aıtyp berdi.
Elshi Qazaqstannyń saıası júıesin jańǵyrtý jáne sýperprezıdenttik basqarý formasynan myqty parlamenti bar prezıdenttik respýblıkaǵa aınalý qazaqstandyq qoǵamnyń tereń qajettilikteri men suranystaryna negizdelgenin atap ótti.
Is-shara barysynda elshi T.Alemý sóz sóılep, respýblıkanyń jańa damý kezeńiniń bastalýyna serpin bergen oqıǵalarǵa toqtaldy. Efıopııalyq sarapshy jańa Qazaqstannyń tabysty qurylysy úshin barlyq jaǵdaıdyń bar ekenin atap ótip, elimizdiń basshylyǵy men halqyna tabys tiledi.
Sonymen qatar semınar aıasynda T.Alemýge Qazaqstan táýelsizdiginiń 30 jyldyǵyna jáne elder arasyndaǵy dıplomatııalyq qatynastardyń ornaǵanyna 10 jyl tolǵanyna oraılastyrylǵan, Qazaqstanmen qarym-qatynastardy damytýǵa qosqan qomaqty úlesi úshin QR Premer-Mınıstriniń orynbasary - Syrtqy ister mınıstri Muhtar Tileýberdiniń alǵys haty tabys etildi.
Jalpy aıtqanda, Prezıdent Q.Toqaevtyń eldegi túbegeıli ózgerister engizýge baǵyttalǵan saıası kózqarasy Afrıkanyń eń iri elderiniń birinde sarapshylar ortasynda shynaıy qyzyǵýshylyq týdyrdy. Semınar sońynda sarapshylar Memleket basshysynyń saıasatyna joǵary baǵa berip, elimizben ekijaqty baılanystardyń odan ári nyǵaıa beretinine senim bildirdi.
