Turǵyn úı qurylysy osynsha qarqynmen júrip jatqanda, oǵan qajetti materıaldardyń ózimizde jasap shyǵarylatyny da bir esepten dátke qýat. Buǵan naqty dálel retinde Shahtınsk qalasyndaǵy penoplast materıalyn óndirýmen aınalysatyn kásiporyndy aıtýǵa bolady.
Jalpy, qytymyr qysy alty aıǵa sozylatyn Arqa tósinde salynatyn úılerdiń birinshi kezekte jyly bolmaǵyna basa nazar aýdarylady. Osy oraıda, jylýdy jaqsy ustaıtyn penoplast materıalynyń atalǵan baǵyttaǵy mańyzy men tıimdiligi zor. Bul ónim jańa ǵımarattardyń qurylysynda paıdalanylady. Sonymen birge penoplast materıaly jylý oqshaýlaǵysh plıtalar jasaý, polıstırol betonyn óndirý úshin keńinen qoldanylady.
Aıta berse, penoplastyń ámbebap qasıetteri kóp. Mysaly, bul ónim qurylys ındýstrııasynda jylý ótkizgishtigi men dybys oqshaýlaı alatyny úshin joǵary baǵalanady. Sonymen qatar materıal beriktigimen de erekshelenedi. Sondyqtan da asa tanymal jáne jıi qoldanylatyn penoplastqa degen suranys qazirgi ýaqytta elimiz boıynsha óte zor bolyp tur.
Biz áńgime qylyp otyrǵan kásiporynnyń basshysy, jeke kásipker Sergeı Matıýhın penoplast óndirýmen 2000-jyldardyń basynan beri aınalysyp keledi.
– Oǵan deıin naýbaıhana, júk tasymaldaý sııaqty bıznes túrlerin kásip ettim. Sóıtip júrip, qurylys salasyna asa qajetti penoplast óndirýmen aınalyssam ba degen oı keldi. Sodan bos qalǵan kókónis bazasyn satyp aldym da, ınjenerlik kommýnıkasııalardy qalpyna keltirip, jeli satyp aldym. О́ndiristi 2007 jyly iske qostym. Biraq ol kezde qurylys qazirgideı qyzý júre qoımaǵan edi: alǵashqy eki jyl mınýspen jumys isteýge týra keldi. Birtindep suranys óse bastady. Al 2010 jyly paıdaǵa shyqtyq. Ártúrli qıyndyqtar kezdeskenimen, qazirgi ýaqytta isimiz ońǵa basyp tur, – deıdi ol.
Penoplast óndirý kúrdeli úderisten turady: bul jumystardyń barlyǵy avtomattandyrylǵan. Áýeli shıkizat arnaıy agregatqa salynady. Odan ári polıstırol túıirshikteri kóbiktenip, kólemin ulǵaıtady. Mashına kómeıinen shyqqan appaq penoplast bloktary birden keptirýge aparylady. Materıal biraz ýaqyt jatqan soń, arnaıy sym ishekteri bar stanokpen túrli ólshemder boıynsha kesiledi. Al daıyn ónim tutynýshyǵa jalpaq plıta nemese domalaq túıirshikter túrinde jetkiziledi.
Qazirgi tańda kásiporynda 25-ke jýyq adam jumys isteıdi. Jaz aılaryna qaraı qurylys materıaldaryna degen suranys artqanda, qosymsha jumysshylar qabyldanady. Jáne bul baǵytta jergilikti turǵyndarǵa basymdyq beriledi.
Shahtınsk qalasyndaǵy atalǵan kásiporynnyń basty tutynýshysynyń biri – oblysta qabyrǵalary jylytylǵan úıler salatyn qurylys kombınaty. Sonymen qatar bul qat ónim elimizdiń basqa da óńirlerine arnaıy júk kólikterimen jetkiziledi.
Qazirgi tańda kásiporyn damýdyń dańǵylyna túsken. Júkteme ulǵaıǵan saıyn, jańa jeli qosyp otyrý da josparda bar. Osy oraıda óndiristi ulǵaıtý maqsatynda jeke kásipker Sergeı Matıýhınniń «Monoqalalardy damytý» baǵdarlamasy aıasynda memlekettik qoldaýdy sátti paıdalanyp júrgenin de aıta ketken lázim.
Qaraǵandy oblysy,
Shahtınsk qalasy
