Syrt alańda Moldovany jeńdi

Ulttar lıgasy týrnıriniń byl­tyrǵy maýsymynda Qazaq­stan jáne Moldova quramalary «S» lıga­synda asa sátsiz óner kórsetip, óz toptarynda sońǵy orynǵa jaı­ǵasqan bolatyn. Sondyqtan eki eldiń ulttyq qura­malary joǵary toptaǵy óz oryndaryn saqtap qalý úshin elektik kezdesý ótkizip jatyr. Jarys erejesi boıynsha «S» lıgasynyń tórt tobynda sońǵy oryn alǵan tórt ujymnyń ekeýi «D» lıgasyna syrǵyp, ekeýi óz ornyn saqtap qalýǵa tyrysady. О́ıtkeni «D» lıgasynda bar bolǵany eki top bolǵandyqtan, «S» lıgasyna tek eki ǵana jeńim­paz qurama kóte­riledi. «S» lıga­syndaǵy ornyn saqtap qalý úshin bul kúnderi Qazaq­stan men Mol­dovadan bólek, Kıpr jáne Estonııa quramalary da baq synaýda.

Buǵan deıin jazǵanymyzdaı, Qazaqstan men Moldova qurama­lary osy kúnge deıin jasyl alań­­da bes márte kezdesse de, esh­qa­shan resmı match ótkizip kór­megen. Sebebi ótken bes oıynnyń bári de joldastyq kezdesý aıasynda uıymdastyrylǵan bolatyn. Sóıtip eki qurama fýtbolshylary 24 naý­ryzda birinshi ret bir-birimen resmı match ót­kizdi. Abyroı bolǵanda bul oıyn Qa­zaqstan quramasynyń je­ńisimen aıaqtaldy. Sonymen qatar osy kezdesý aıasynda bir­qatar «birinshi» degen statıstıkaǵa da kýá boldyq. Atap aıtqanda, bul match eki qu­ramanyń bas bap­kerleri úshin óz ulttyq qu­ra­malaryndaǵy birinshi resmı oıyn boldy. Moldovanyń bas bapkeri Sergeı Kleshenko 2021 jyldyń jeltoqsan aıynda ulttyq quramanyń tizginin us­taǵan bolsa, Andreı Karpovıch birer apta buryn ǵana Qazaqstan quramasynyń bas bapkeriniń min­detin atqarýshy bolyp ta­ǵaıyn­dalǵan edi. Jerlesterimiz 2020 jyldyń qyrkúıeginen beri (Lıtva – Qazaqstan – 0:2) birin­­shi ret syrt alańda jeńiske jetti. Al óz alańymyzda jeńis toıy­n toılamaǵanymyzǵa úsh jyl­ǵa jýyqtap qaldy. Eń keıingi ret bizdiń fýtbolshylar 2019 jyl­dyń jazynda San-Marıno quramasynan 4:0 esebimen basym túsken edi. Sondaı-aq ulttyq qu­rama sapynda 53-shi oıynyn ótkizgen qorǵaýshy Sergeı Malyı kúni keshe Moldova qaqpasyna óziniń Qazaqstan quramasy jeıde­sindegi birinshi golyn soqty.

Kıshınevtegi kezdesýge toq­talar bolsaq, matchtyń alǵashqy mınýttarynda alań ıeleri aıtar­lyqtaı basymdyqqa ıe bo­lyp, bizdiń qaqpamyzdyń ma­ńynda biraz qaýipti shabýyl uıym­das­tyrdy. Qarymta shabýylǵa ıek artqan Qazaqstan quramasy fýt­bolshylarynyń oıynnyń je­tinshi mınýtynda-aq esepti ashatyn tamasha múmkindigi bol­ǵan edi. Alaıda 14-shi nómirde oınaı­tyn jerlesimiz Vladıslav Va­sılevtiń bir qorǵaýshyny aldap, shirene tepken doby qaqpadan sál ǵana bıik ketti. Bul – Andreı Karpovıch shákirtteriniń birinshi taımda jasaǵan jalǵyz qaýipti shabýyly boldy. Esesine, alań qojaıyndary Igor Shaskıı qorǵaǵan qaqpany torýyldaýmen boldy. Kezdesýdiń 39-mınýtynda qaqpashymyz áýedegi dop­ty qaǵyp alý sátinde qatelesip, dop moldovalyq shabýylshy Ion Nıkolaeskýdiń basyna dál kele qaldy. Bos qalǵan qaqpa­ǵa enip bara jatqan dopty qor­ǵaýshy Aleksandr Marochkın dál syzyqtyń ústinen qaıtaryp úlgerdi. Degenmen birin­shi taım aıaqtalar tusta qorǵaý­shylardyń qateligin tıimdi paıdalanǵan Nıkolaeský báribir óz atyn tab­loǵa jazdardy – 1:0.

Ekinshi taımda alańǵa Dý­man Nárzildaevtyń ornyna Aıbol Ábikendi shyǵarǵan A.Kar­­povıch oıynǵa azdaǵan tak­tı­kalyq ózgeris engizdi. Nátıjesinde, kez­desýdiń 63-mınýtynda jer­leste­rimiz tarazy basyn teńes­tirdi. Vladıslav Vasılev­tiń aıyp alańyna áýelete asyrǵan pasyna boıshań qorǵaýshymyz Sergeı Malyı birinshi jetip, baspen qarsylas komandanyń qaqpasyn dál kózdedi –1:1.

Arada 16 mınýt ótkende Qazaq­stan quramasy esepte alǵa shyǵyp aldy. 79-mınýtta Igor Shaskııdiń asyrǵan dobyna Roman Mýrtazaev birinshi jetip, Baqtıer Zaınýtdınovke tamasha pas shyǵaryp berdi. Máskeýlik SSKA klýbynyń jartylaı qorǵaýshysynyń aıyp alańy ishinen qaqpaǵa qaraı tepken dobyn qorǵaýshy Vıacheslav Posmak keri qaıtaram dep, abaısyzda óz qaqpasyna gol soǵyp aldy – 1:2. Oıynnyń sońǵy mınýttarynda Aıbar Jaqsylyqovta esepti eseleıtin tamasha múmkindik bol­ǵanymen, shabýylshymyz urym­tal tusta múlt ketti. Osy­laısha, Qazaqstan quramasy syrt alańda 1:2 esebimen jeńiske jetti. Eki qurama arasyndaǵy qarymta kezdesý erteń elordadaǵy «Astana Arena» stadıonynda ótedi.

– Barshańyzǵa jeńis qutty bol­syn degim keledi. Biz kút­kendeı, qıyn ári tartysty match boldy. Daıyndyq kezinde py­syqtaǵan dúnıelerimiz óz septigin tıgizdi. Moldova óz alańynda jankúıerleriniń qoldaýyna ıe boldy. Qarsylas komanda sapynda sheber oıynshylar kóp bol­ǵandyqtan, olar bul match­tyń favorıti sanaldy. О́te myqty qarsylaspen bolǵan oıyn­da jeńiske jetkenimizge qýanysh­tymyz. Biraq bul nátıjeni umy­­týǵa týra keledi. Sebebi bar­lyǵy Nur-Sultanda ótetin qarym­ta kez­desýde sheshiledi. Ol jaq­ta da bizdi qıyn match kútip tur. Biz óz kezegimizde daıyn­dyq­ty kúsheıtip, oıynymyzdy jaq­sar­týymyz qajet, – dedi matchtan keıin Qazaqstan quramasynyń bas bapkeriniń min­detin atqarýshy Andreı Kar­povıch.