Chempıonattyń alǵashqy kúni quramynda Evgenıı Fedorov, Igor Chjan, Iýrıı Natarov jáne Evgenıı Gıdıch syndy veloshabandozdar bar erler komandasy 24 shaqyrymdyq qashyqtyqty 26 mınýt 48.933 sekýndta júrip ótip, bas júldeni oljalady. Kúmis pen qola medaldy Mońǵolııa men Irannyń sportshylary ıelendi. Áıelderdiń komandalyq saıysynda otandastarymyz máre syzyǵyn ekinshi bolyp qıyp ótti. Bul básekede Qazaq eli namysyn Rınata Sultanova, Faına Potapova, Mahabbat Úmitjanova jáne Anjela Soloveva qorǵady. Bizdiń qyzdar О́zbekstandy alǵa jiberse, ırandyqtar úshinshi oryndy qanaǵat tutty.
Jekelegen saıysta 15 shaqyrymdyq mejeni 20 mınýt 54.601 sekýndta baǵyndyrǵan Darııa Qazaqbaı kúmis medaldy moınyna ildi. Qazaq qyzy ózbekstandyq Anna Kýskovadan ǵana qalyp qoıdy. Jasóspirimder arasyndaǵy jarysta Alekseı Vaganov top jardy. Sondaı-aq paravelosporttan ótken saıysta Kenjequl Seıitjan men Maqsat Qadyrov ta úshinshi satyǵa taban tiredi.
