Fılosofııalyq mánge ıe «Qyz joly» kartınasy jas sýretshi Ásemqul Beıbittiń shyǵarmasy. Ol ádettegideı ómirdiń shynaıy beınesin, postmodernıstik kezeń men qoǵamdaǵy túrli problemalardy oı-eleginen ótkizip, óz týyndysyna arqaý etken. Ideıa, mazmun, forma jáne tús ózara juptasyp, týyndynyń tarıhı kelbetin kórkemdeı túsedi.
Grafıkamen áýestengen jas ónerpaz ózin jańa qyrynan ashyp, ǵajaıyp keskindemelerdi ómirge ákeldi. Sheshesiniń ómirimen baılanysty kórinister arqaý bolǵan jumystarynda, avtor janyna jaqyn ana jáne otbasy taqyrybyn qamtıdy. Olar aq qaǵaz betinde kómir men soýsty qoldaný arqyly jazylǵan. Osy qarapaıym tásilmen oryndalǵanyna qaramastan, bul grafıkalyq paraqtarda sýretshiniń emosıonaldyq kúızelisteri men ishki jan-tebirenisiniń sezimderi aıqyndalǵan. Sol týyndylarynyń biri osy – «Qyz joly» shyǵarmasy. Avtordyń 2016 jyly jazylǵan kartınasy ónertanýshylardyń ystyq yqylasyna ıe boldy.
Shynynda, bul jumystyń maǵynasy tereń, mazmuny aýqymdy, halyqtyq rýhqa toly. Tórt buryshty paraqta túrli tarmaqtarǵa taralǵan, alýan asýlardan turatyn sheksiz jol. Kompozısııanyń astyńǵy, naq ortańǵy bóliginde osy ómirde óz jolyn, durys jol tańdaý ústindegi qyz beınesi. Ekinshi jaǵynan «ómir daraǵy» beınesin eske túsirip, aǵash butaqtary ómirdiń soqpaqtary syndy aıqyndala túsedi. Avtor keńistikti tekemet sekildi sheshedi, qazaqtyń tekemetterindegi iri modýldi aq jáne qara formalary ózara baılanysady. Bul bizdi erkimizden tys ulttyq ónerimizge jeteleıdi.
Ásemqul Beıbittiń grafıkalyq paraqtarynan avtordyń jan-tolǵanys sezimderi men emosııalyq kúızelisterin kórýge bolady. Sondaı-aq ol óziniń jeke álemin jasaý arqyly, jalpy ómirdiń fılosofııasyn uǵynýǵa tyrysady.
