Qaıǵyly qańtar oqıǵasynan keıin qoǵamda kókeıkesti saýaldar kóp boldy. Osy jolǵy Joldaý sol suraqtardyń jaýaby ispettes. El Prezıdenti bılik tarmaqtaryna, qoǵamǵa Jańa Qazaqstandy qurý strategııasy aıasynda saıası reformalardyń kezekti toptamasyn iske asyrý boıynsha birqatar mindet qoıdy. Mańyzdy maqsattardy aıqyndady. Atap aıtqanda, ókildi bılik tarmaqtaryn qaıta qurý, saılaý júıesin jetildirý, quqyq qorǵaý ınstıtýttaryn kúsheıtý, elimizdiń ákimshilik-aýmaqtyq qurylymyn jetildirý syndy bastamalar kóterildi. Ásirese atqarýshy bılik ókilderine halyqpen jıi kezdesip, qoǵamdyq qabyldaýlardy turaqty ótkizýdiń mańyzdylyǵyn atap ótti.
Joldaýda atap ótkendeı, «Qýatty óńirler – qýatty el» degen ustanymǵa sáıkes kez kelgen másele jergilikti jerde sheshilýge tıis. Máselen, Mańǵystaý óńirinde gaz baǵasyna baılanysty bolǵan jaǵdaılar qaıtalanbaýy úshin eńbek sharttaryn jaqsartý kerek, shıelenisti máseleler jergilikti jerde oń sheshimin tabýy kerek. Bul bolashaqta úlken qaqtyǵystardyń aldyn alady.
Ulttyq ulannyń «Batys» óńirlik qolbasshylyǵynyń Aqtaý, Atyraý, Aqtóbe, Jańaózen qalalarynda áskerı bólimderi bar. Batystyq ulandar óńirdiń ishki tynyshtyǵy men quqyqtyq tártibin qamtamasyz etýde mańyzdy ról atqarady. Kún saıyn júzdegen ulandyq polısııa qyzmetkerlerimen birge atalǵan qalalarda qoǵamdyq qaýipsizdikti qadaǵalaıdy. Táýlik boıy jaýyngerlik qyzmet atqarady. Sonymen qatar óńirdegi qoǵamdyq-saıası jáne basqa da buqaralyq is-sharalarda quqyqtyq tártiptiń saqtalýyn qamtamasyz etedi. Sondyqtan Prezıdenttiń beıbit sherýler týraly aıtqany kóńilimizden shyqty. Tek saıasat salasynyń ózinde onnan astam zań qabyldanǵanyna qarap, qoǵamda bolyp jatqan oń ózgeristerdiń aýqymy qandaı ekenin baǵamdaýǵa bolady. Beıbit mıtıngter jappaı tártipsizdikke ulasqanyn jáne onyń saldary qandaı kúrdeli bolǵanyn bilemiz. Memleketimizde quqyqtyq tártipti ornatý arqyly Qazaqstannyń konstıtýsııalyq qurylymyn, ár azamattyń quqyǵy men bostandyǵyn batyl qorǵaǵan ulandyqtar úshin beıbit jınalystar týraly zańnyń saqtalýy mańyzdy. Ataqty qolbasshy Baýyrjan Momyshuly «Tártipke baǵynǵan qul bolmaıdy» dep aıtqandaı, zań ústemdigi saltanat quratyn quqyqtyq memlekette ǵana damý men órkendeý bolady. «Bázbireýlerdiń jaýapsyzdyǵy men beıbastaq áreketteri zańdy syılaıtyn azamattarymyz úshin tym qymbatqa tústi. Zań bárine ortaq, oǵan bıliktegi azamattar da, qoǵam belsendileri de birdeı baǵynýǵa tıis» dep Memleket basshysy beker aıtqan joq.
Elimiz damý jolynda demokratııalyq ózgeristerge aıaq basýda. Qoǵamdyq tártipti buzý, eldiń shyrqyn ketirý – órkenıetti demokratııanyń kórinisi emes. Toleranttylyq, jaýapkershilik, ózara syılastyq, keńesý, azshylyqtyń pikiri eskerilý arqyly kópshiliktiń bılik qurýy – naqty demokratııalyq ózgeristerdiń alǵysharty. Jańa zań belsendi azamattarǵa, onyń ishinde oppozısııalyq kózqarastaǵy qoǵam belsendilerine esh kedergisiz sherý ótkizýine, sol jerde oı-pikirlerin emin-erkin aıtýyna múmkindik berdi.
Elimizde jańa saıası mádenıettiń tamyr jaıýyna, qoǵamdaǵy ózara jaýapkershilik pen senimniń artýyna jol ashty. Solaı dese de eldi arandatqysy keletin, zańǵa baǵynǵysy kelmeıtin «mysyq tileý» adamdardyń tabylatyny ókinishti. Olarǵa qatysty «Budan bylaı eshqandaı jumsaqtyq kórsetpeıtinimizdi málimdeımin. Basqa da zańdar sııaqty bul zańnyń talaptary da múltiksiz oryndalýǵa tıis» dep naqty eskertý jasaldy. Ulttyq ulan áskeri ózine júktelgen mindetterge sáıkes memlekettiń qaýipsizdigin qamtamasyz etýge, adamnyń jáne azamattyń quqyqtary men bostandyqtaryn qylmystyq jáne ózge de quqyqqa qarsy qolsuǵýshylyqtardan qorǵaýǵa, Qarýly Kúshterimizdiń Joǵarǵy Bas qolbasshysy Qasym-Jomart Toqaevtyń bastamalaryna qoldaý kórsetip, jańarǵan bolashaqty qurýǵa bir adamdaı atsalysýǵa daıyn ekenin aıtqym keledi.
Qaırat ÚMBETOV,
Ulttyq ulan «Batys» óńirlik qolbasshylyǵy qolbasshysynyń birinshi orynbasary – shtab bastyǵy,
Halyq qaharmany jáne «Otan» ordeniniń ıegeri, polkovnık
