Kalıfornııalyq zeınetker lotereıadan 425 mln. dollar utyp aldy

AQSh-ta «Powerball» lotereıasynyń 425,3 mln. dollar quraǵan djek-potyn Kalıfornııa shtatynyń turǵyny Reımond Bakston utyp aldy. Bul týraly Lenta.ru habarlady. 20 jyl boıy lotereıa bıletterin úzbeı satyp alyp júrgen kalıfornııalyq zeınetker aqyry kútpegen jerden utys ıesi atandy. Al lotereıany uıymdastyrýshylar bolsa, oǵan utysty 30 jylǵa bólip berýge usynys aıtqan. Alaıda, zeınetker aqshany birden alýǵa nıet bildirgen. Negizi, lotereıa erejelerine saı, mundaı jaǵdaıda utys tolyǵymen emes, tek onyń 242,5 mln. dollary beriledi eken. Sondaı-aq, bul somadan salyq ta ustalatyn kórinedi. «Men birneshe saǵat boıy kompıýterdiń aldynda tapjylmaı otyryp, óz kózime senbeı nómirlerdi qaıta-qaıta teksere berippin. Odan soń birneshe kún boıy uıyqtaı almadym», – deıdi R. Bakston. Zeınetker utqan aqshasynyń bir bóligin saıahat jasaýǵa jumsaıdy. Sonymen birge, ol qaıyrymdylyq qoryn uıymdastyryp, odan túsken qarajatty bilim berý men densaýlyq saqtaý salalaryna jumsaýǵa nıetti ekenin jetkizdi. Aıdar О́risbaev. Derekkóz: Lenta.ru. Foto: www. News.nur.kz.