Mınıstrliktiń baspasóz qyzmeti málimdegendeı, qazirgi ýaqytta qalyptasqan geosaıası jaǵdaıǵa baılanysty týyndaǵan kólik-logıstıkalyq daǵdarys aıasynda bıyl basqa elderdegideı Qazaqstanda da obektiler qurylysynyń qymbattaýy jáne qurylys materıaldaryn jetkizýshilerdiń alypsatarlyq áreketteriniń ósýi ózekti máselege aınaldy.
Osyǵan baılanysty ishki naryqtyń qurylys materıaldaryna degen qajettiligin qanaǵattandyrý, sondaı-aq ımportqa táýeldilikti tómendetý jáne baǵanyń aýytqýyn boldyrmaý úshin 2025 jylǵa deıin 15,7 myńnan astam jańa jumys oryndaryn ashyp, 157 ınvestısııalyq jobany iske asyrý usynyldy. Qazirgi ýaqytta óńirlerdegi ákimdikterimen, damý ınstıtýttarymen jáne «Atameken» UKP-men kelise otyryp qurylys ındýstrııasy jobalaryn 2025 jylǵa deıin egjeı-tegjeıli iske asyrý jónindegi Jol kartasy bekitildi.
Indýstrııa jáne ınfraqurylymdyq damý mınıstrligi «Samruk-Kazyna Construction» AQ-men birlesip, ımportty almastyratyn 35 joba iriktep aldy.
Bul jobalardy iske asyrý santehkeramıka, jylý oqshaýlaǵysh materıaldar, bólmeler arasyndaǵy esikter, DSP, shyny, keramıkalyq plıtkalar, eden jabyndary jáne basqa da qurylys materıaldary sanatyndaǵy ımport úlesin tómendetýge múmkindik beredi.
Sondaı-aq, vedomstvo bıýdjet qarajaty esebinen salynyp jatqan obektiler qurylysynyń qymbattaýynyń aldyn alý úshin qadamdar jasaýda.
Máselen, qurylys resýrstary qunynyń eleýli aýytqýyna jedel den qoıý maqsatynda vedomstvo qurylys materıaldarynyń ózekti smetalyq baǵalarynyń jınaqtary shyǵarylýda. Bul bıýdjettik obektilerdiń aıaqtalmaǵan qurylys kóleminiń ulǵaıyp ketý táýekelin tómendetýge múmkindik beredi.
Aıta ketsek, elimizde memlekettik ınvestısııalar esebinen salynyp jatqan 286 nysannyń qurylysy toqtatylǵan. 84 jaǵdaı boıynsha qurylys jumystary jobalardyń qymbattaýyna baılanysty toqtaǵany anyqtaldy.
Qurylys salasyn turaqty monıtorıngileý nysandardy qarjylandyrý kezinde jergilikti atqarýshy organdardyń júıesiz is-qımyly qymbattaýdyń birden bir sebebi bolyp tabylatynyn kórsetedi. Bir nysandy aıaqtamaı, olar taǵy birneshe jobany júzege asyrýǵa kirisip, osy qarajat sheginde qurylystyń aıaqtalý merzimin uzartady. Bul merdigerlerdiń óz mindettemelerin tolyqtaı oryndamaı, qurylys jumystarynyń toqtaýyna ákep soǵady. О́tken jyly qurylys resýrstary qunynyń ósýine baılanysty óńirlerdiń ákimdikteri 641 joba boıynsha qurylys qunyn túzetý boıynsha ótinish bildirgen.
Osyǵan baılanysty QR IIDM Qarjy mınıstrligine qarjylandyrý merzimderin oryndaý bóliginde jaýapkershilik sharalaryn qatańdatýdy, sondaı-aq jobalardy túzetýdi jeńildetý bóliginde memlekettik aýdıt júrgizý merzimderin naqtylaýdy usyndy.
Qabyldanyp jatqan sharalar eldegi turǵyn úı jáne ónerkásip qurylysynyń qarqynyn tómendetpeýge múmkindik beredi dep kútilýde.
