Kollajdy jasaǵan Amangeldi Qııas, «EQ»
Reseılik bank sektoryna sanksııalardyń salynýy elimizdegi enshiles reseılik bankterge de salqynyn tıgizdi. Fitch agenttigi úsh reseılik banktiń reıtıngin jaǵymsyz boljamǵa tómendetip tastady. Bul óz kezeginde olardyń negizgi bankteriniń aksıonerlik qoldaý qabiletin azaıtady. Al Qarjy naryǵyn retteý jáne damytý agenttigi batys sanksııalarynyń qazaqstandyq bankterge qatysy bolmaıtynyn habarlaıdy. Qazirgi bolyp jatqan geosaıası túsiniksiz qubylystarǵa qaramastan otandyq sektor óz pozısııasyn ustap tur.
Ranking portalynyń jazýynsha, sektordaǵy eń ornyqty bank – Halyk Bank. Halyqaralyq agenttikter tarapynan berilgen baǵalaýda bul banktiń elimizdegi ekinshi deńgeıli bankter arasynda úzdik kórsetkishke ıe ekenin rastaıdy. Qańtar aıynda S&P Global Ratings banktiń nesıe reıtıngin «BB+ / B» deńgeıinde jáne «kzAA» ulttyq shkalasy boıynsha baǵalady. Qarjy ınstıtýtynyń osyǵan deıingi daǵdarystardy eńserý tájirıbesi de mol, ótimdilik qory da jetkilikti. Moody's agenttigi bankke Baa2 deńgeıin berip, ınstıtýt jaǵdaıyn «Turaqty» dep qorytyndylaǵan.
Sonymen qatar «Otbasy bank» te damýdyń oń dınamıkasyna ıe. 2022 jyldyń 1 naýryzynda Fitch Ratings reıtıng agenttigi banktiń bedelin «VVV», ıaǵnı «Turaqty» dep baǵalaǵan. Osy rette banktiń tolyqqandy memleket menshigindegi qarjy ınstıtýty ekenin jáne onyń tikeleı ıelený quqyǵynyń «Báıterek» Ulttyq basqarýshy holdıngi» AQ-ǵa tıesili ekenin de aıta ketý kerek. Al keıbir ekinshi deńgeıli bankterde naýryz aıynyń qorytyndysy boıynsha ájeptáýir tómendeý de baıqalady. Bul qatarda «Sberbank», «Alfa-Bank», VTB Bank, «Frıdom Fınans Qazaqstan» jáne «Bank Hoým Kredıt» bar.
«Jalpy alǵanda, bank sektorynyń kapıtal qory jetkilikti. 2022 jyldyń qańtarynyń qorytyndysy boıynsha menshik kapıtalynyń somasy 4,6 trln teńgeni qurady. Bul ótken jyldyń osy kezeńimen salystyrǵanda 14,1 paıyzǵa kóp. Negizgi kapıtaldyń jetkiliktilik koeffısıenti (k1) – 19,3 paıyz, menshik kapıtalynyń jetkiliktilik koeffısıenti (k2) 23,3 paıyz deńgeıinde. Sondaı-aq ekinshi deńgeıli bankterde 11,6 trln teńgeni nemese aktıvterdiń 31,3 paıyzyn quraıtyn ótimdiligi joǵary aktıvter qory qalyptasqan. Kapıtal qorynyń joǵary deńgeıi jáne ótimdiligi joǵary aktıvter bankterge qarjy naryǵyndaǵy shoktardy eńserýge jáne óz mindettemelerin tolyǵymen oryndaýǵa múmkindik beredi», dep jazady Ranking.
