Birinshi bolyp Ýkraına astanasy Kıevke Eýropalyq komıssııanyń prezıdenti Ýrsýla fon der Lıaıen keldi. Ol birneshe kún buryn búkil álemdi dúr silkindirgen qaza bolǵan beıbit turǵyndardyń jantúrshigerlik kórinisi taraǵan Býcha qalasynda bolyp, jaǵdaıdy óz kózimen kórip qaıtty. Eýrokomıssııanyń basshysy Reseı áskeriniń soǵys qylmysyna barǵanyn aıtyp, jaýaptylar jazaǵa tartylýǵa tıis degen pikirin aıtty. Alaıda Reseı Býchadaǵy qyrǵyndy moıyndaǵan joq.
EO sheneýnikteri keler kúni Ýkraınanyń shyǵysynda Reseı shabýylynan qashpaq bolǵan beıbit turǵyndarǵa toly temir jol stansııasyna túsken zymyran soqqysynan kem degende 50 adam qaza taýyp, júzge jýyq jolaýshynyń jaraqat alǵanyn habarlady. Donesk oblysynyń Kramatorsk vokzalynda qaladan ketýge jınalǵan myńdaǵan turǵyn bolǵan. Lýgansk jáne Donesk oblystarynyń turǵyndaryna tezirek evakýasııa jasaý kerek degen keńesten keıin vokzalǵa halyq kóp jınalǵan. Aqparattarda nysanǵa «Tochka-Ý» zymyranynyń qulaǵany týraly aıtyldy. Beıbit turǵyndardy aıaýsyz qyrǵany týraly Ýkraına basshylyǵy taqqan aıypty Reseı taǵy da joqqa shyǵaryp otyr. Reseı prezıdentiniń baspasóz hatshysy Dmıtrıı Peskov Reseı Qorǵanys mınıstrliginiń málimdemesine súıenýdi usyndy. Bul málimetter boıynsha Reseıdiń qarýly kúshteri mundaı zymyran túrin qoldanbaıtyny, sonymen qatar Kramatorskide ol kúnge eshqandaı áskerı is-qımyl josparlanbaǵany aıtylǵan. Alaıda Reseıdiń bul málimdemesine halyqaralyq qaýymdastyqtyń kópshiligi kúmánmen qaraıdy.
Eýroodaq eshqashan Ýkraına qurbandarynyń ornyn toltyra almaıtynyn aıtqan Ýrsýla fon der Lıaıen eldiń uıymǵa múshelikke kirý týraly ótinishin tezdetýdi usyndy.
Eýropalyq komıssııanyń basshysy Ýrsýla fon der Lıaıen prezıdent Volodımır Zelenskııge Eýroodaqqa múshelikke ótýdiń bastapqy núktesi bolatyn qujatty tapsyra otyryp, bul sheshimdi qabyldaý ádettegideı jyldarǵa emes, birneshe aptaǵa sozylýy múmkin ekenin atap ótti.
Eýroodaqtyń joǵary laýazymdy tulǵalarynyń biri Ýrsýla fon der Lıaıenniń bul sapary V.Zelenskııge moraldyq turǵydan qoldaý ǵana emes, qarjylaı kómek te kórsetýge baǵyttalǵan edi.
Eýropalyq komıssııa Ýkraınany jáne soǵystan qashqan bosqyndardy qabyldaıtyn elderdi qoldaýǵa 1 mlrd eýro bólýge ýáde berdi. Atap aıtqanda, 600 mln eýro Ýkraınaǵa, el bıligine jáne ishinara Birikken Ulttar Uıymyna bólinedi. Al 400 mln eýro qıyn kezeńde asa úlken jaýapkershilikpen bosqyndardy qabyldap, kómek qolyn sozǵan memleketterge beriledi.
BUU bosqyndar jónindegi agenttigi jarııalaǵan málimetke sáıkes Reseıdiń Ýkraınaǵa shabýylynan beri 4 441 663 bosqyn elden ketken. Olardyń 90 paıyzy áıelder men balalar ekeni belgili. Halyqaralyq kóshi-qon uıymy Ýkraına ishinde shamamen 7,1 mıllıon adam kóshirilgenin habarlady. Bul kórsetkishter áldeqaıda joǵary bolýy múmkin.
EO ókilderinen bólek Kıevke Ulybrıtanııa premer-mınıstri Borıs Djonson da bardy. Ol Volodımır Zelenskıımen kezdesip, Ýkraına halqy úshin qıyn kezeńde qoldaý bildiretinin atap ótti. Ulybrıtanııa Ýkraınaǵa áskerı kómek retinde 120 bronetransporter men kemege qarsy keshenderdi jiberedi. Bul qarý-jaraq juma kúni jarııalanǵan Starstreak zenıttik zymyrandaryna, 800 tankke qarsy basqarylatyn zymyrandarǵa jáne joǵary dáldiktegi barrel snarıadtaryna qosymsha jiberiledi. Sonymen qatar Djonson Ýkraınaǵa Dúnıejúzilik bank jelisi boıynsha 500 mln dollar kóleminde qosymsha nesıelik kepildik berilgenin habarlady.
Odan bólek, London «ýkraındar úshin ómirlik mańyzdy gýmanıtarlyq qyzmetterdi úzdiksiz kórsetýdi qamtamasyz etý» maqsatynda Ýkraına úkimetine óteýsiz kómek retinde 400 mln fýnt bóldi. Ulybrıtanııa sonymen qatar Ýkraınadan ımporttalatyn ónimderdiń kóp bóligine tarıfterdi tómendetip, ýkraın taýarlaryna qatysty kedendik jeńildikter engizdi.
Reseı áskeri Ýkraınanyń soltústigi, Kıev mańyn bosatqaly el astanasynda keıbir EO elderiniń elshilikteri qyzmetin qaıta jalǵastyra bastaǵanyn aıta ketý kerek.
