Senat bıýrosynyń kezekti otyrysy

Keshe Qasym-Jomart Toqaevtyń tóraǵalyq etýimen Parlament Senaty bıýrosynyń otyrysy boldy, dep habarlady osy palatanyń baspasóz qyzmeti. Bıýro músheleri palatanyń aldaǵy 10 sáýirde bolatyn otyrysynyń kún tártibin qarady. Otyrysta, atap aıtqanda, 1999 jylǵy 3 jeltoqsanda Pekınde qabyldanǵan Ozon qabatyn buzatyn zattar jónindegi Monreal Hattamasyna túze­týlerdi ratıfıkasııalaý týraly jáne Qazaqstan men Qytaı arasyndaǵy Qorǵas ózeninde «Dostyq» ortaq birlesken sý torabyn salýdaǵy yntymaqtastyq týraly úkimetaralyq kelisimdi ratıfıkasııalaý týraly zań jobalary qaralatyn boldy. Sondaı-aq, Qazaqstan Respýblıkasynyń Ákimshilik quqyq buzýshylyq týraly kodeksine ózgeris engizý týraly zań jobasyn (birinshi oqylymda) qaraý josparlanýda. Bıýroda Májiliste maqul­danǵan zań jobalaryna Senattyń bas komıtetteri belgilendi. Bıýro músheleri, sonymen qatar, Qazaqstan Parlamenti Sena­tynyń depýtattaryn halyq­aralyq parlamenttik uıym­darǵa jáne Parlament Sena­tynyń shet memleketterdiń par­lamentterimen óńirlik ynty­maqtastyq toptaryna jiberý jónindegi usynystaryn qarady jáne maquldady. Otyrys barysynda Senat Apparatynyń basshysy Alek­sandr Sýdın Apparattyń 2014 jylǵy birinshi toqsany ju­my­synyń qorytyndylary týraly habardar etti. Kezdesý sońynda Senat Tóraǵasy, «Nur Otan» partııasy Saıası keńesiniń Bıýro múshesi Q.Toqaev birqatar senatorlarǵa – partııa múshelerine jańa úlgidegi partııa bıletterin tabys etti.