Qorǵanys mınıstri jyljymaly basqarma pýnktinen Ulttyq qaýipsizdik komıteti, Ishki ister jáne Tótenshe jaǵdaılar mınıstrlikteri laýazymdy adamdarynyń oqý-jattyǵý sheńberinde ótkiziletin is-sharalar týraly aqparattaryn tyńdady.
О́ńirlik qolbasshylyqtar men Desanttyq-shabýyldaý áskerleriniń qolbasshylary ózderiniń basqarý pýnktterinen qaýipti baǵyttarda toptar qurý jáne qoıylǵan oqý-jaýyngerlik mindetter týraly baıandady. Olardyń oryndalý barysy Bas shtabtyń jyljymaly basqarý pýnktine ushqyshsyz ushý apparattary arqyly kórsetildi.
Arnaıy operasııalar kúshteriniń qolbasshysy arnaıy mindetterdi oryndaýǵa tartylatyn bólimshelerdi qoldaný tártibin baıandady. General-leıtenant R.Jaqsylyqov oqý-jattyǵýdyń negizgi maqsaty Prezıdent Q.K.Toqaevtyń kúshtik qurylymdardy tıimdi úılestirýdi qamtamasyz etý, olardyń jedel jáne áskerı-tehnıkalyq úılesimdiligin jolǵa qoıý jónindegi tapsyrmasyn iske asyrý bolyp tabylatynyn atap ótti.
Osyǵan baılanysty Qorǵanys mınıstri basqarý organdarynyń jaýyngerlik jumysyn uıymdastyrý jáne áskerlerdiń arnaıy áskerı operasııalar barysyndaǵy tapsyrmalardy oryndaýy, sondaı-aq jan-jaqty qamtamasyz etý máseleleri jóninde nusqaýlar berdi.
Budan buryn habarlaǵanymyzdaı, «Batyl toıtarys-2022» keshendi vedomstvoaralyq strategııalyq komandalyq-shtabtyq oqý-jattyǵýy Aqtóbe, Almaty, Atyraý, Jambyl, Qyzylorda, Mańǵystaý, Túrkistan oblystarynyń, sondaı-aq Almaty jáne Shymkent qalalarynyń aýmaǵynda ótip jatyr.
Jattyǵýlarǵa Qarýly Kúshterdiń, basqa da áskerler men áskerı quralymdardyń quramalary men bólimderi, ortalyq memlekettik jáne jergilikti atqarýshy organdar jumyldyrylǵan. Oqý-jattyǵýlar 16 sáýirge deıin jalǵasady.
