Sýretti túsirgen Erlan OMAR, «EQ»
Osy oraıda Almaty qalalyq bilim basqarmasy basshysynyń orynbasary Qaırat Jumanov jańa mamandyqtar atlasynyń ázirlenetininen habardar etip, qoǵamda jańa kásip túrlerine suranys artyp keletinin jetkizdi. Jańa mamandyqtar atlasyn ázirleý barysynda óńirlik ári tehnıkalyq jáne kásiptik baǵdardaǵy barlyq talap basshylyqqa alynady. Qazir qala ákimdigi janyndaǵy komıssııa eńbek naryǵynda suranysqa ıe mamandyqtardyń tizbesin jasaý ústinde. Osy jyldyń 30 sáýirinen bastap memlekettik tapsyrys qarastyrylǵan mamandyqtar týraly aqparat bilim basqarmasynyń saıtynda jarııalanady.
Almatynyń 20 memlekettik kolledjinde 2019 jyldyń qańtarynan bastap jan basyna qarjylandyrý engizildi. Al bıylǵy qańtardan bastap 29 jekemenshik kolledj memlekettik tapsyrys aıasynda jumys isteýde. Memlekettik tapsyrysty tehnıkalyq mamandyqtarǵa qaıta baǵdarlaý týraly tapsyrma aıasynda bıyl stýdentterdiń 60 paıyzy kolledjderge tegin qabyldanady. Osylaısha, 2025 jylǵa qaraı 9-synyp túlekteriniń júz paıyzy kolledjderde qajetti mamandyqtarda tegin oqymaq. Iаǵnı memlekettik tapsyrysty eki esege – 21 myń orynǵa deıin ulǵaıtý kózdelip otyr. Búginde megapolıste 83 kolledj jumys isteıtin bolsa, onyń 23-i memlekettik, 60-y jekemenshikke jatady. Bilim mekemelerindegi 73 719 stýdenttiń 36,5 myńy memlekettik tapsyrys boıynsha bilim alýda. Iаǵnı tegin bilimmen qamtamasyz etý 49,5 paıyzdy quraıdy. Al stýdentterdiń 3 myńnan astamy – syrttan kelip oqıtyndar. Stýdentterge arnalǵan 30-ǵa jýyq jataqhana bar.
Aldaǵy oqý jylyna 20 maýsymnan bastap qujattar qabyldaý bastalatynyn nazarǵa alsaq, ár talapkerdiń 4 mamandyq pen 4 kolledjdi tańdaýǵa múmkindigi bar.
Kolledjderge berilgen akademııalyq derbestikke baılanysty bilim berý merzimi óndiristik kásiporyndarmen kelisilgen naqty bilim berý baǵdarlamalaryna jáne jumys berýshilerge qajetti oqytý nátıjelerine baılanysty anyqtalady. Búginde kolledjder jumys berýshilermen birlesip, bilim berý baǵdarlamalarynyń mazmunyn, oqý merzimderin derbes aıqyndaý múmkindigine ıe. Sonymen qatar Almatynyń barlyq memlekettik kolledjinde ındýstrııaldy keńester qurylyp, bilim berý baǵdarlamalaryn ázirleýge qatysatyn jumys berýshilerdiń pýly artyp keledi. Mysaly, aǵymdaǵy jyldyń aqpan aıynda oqý oryndary, kásiporyndar jáne bilim basqarmasy arasynda jasalǵan úsh jaqty memorandým negizinde 22 memlekettik kolledjdi iri kásiporyndar qamqorlyqqa alǵan. Kolledjderge qamqorlyq kórsetetin seriktesterdiń qatarynda Abaı atyndaǵy QazUPÝ, Qazaq ulttyq qyzdar pedagogıkalyq ýnıversıteti, S.Asfendııarov atyndaǵy QazUMÝ, «KazSPO-N» JShS, «ÚEU «DOSTI» kompanııalar toby JShS, «Crown» JShS, «Qazaqstan» qonaqúıi, «Kazlegprom-Almaty» JShS, «AlmatyEnergoServıs» JShS, «MEGA Motors» JShS, «Almaty elektromehanıkalyq zaýyty» JShS, «Mehelektromontaj» JShS, «QTJ – Júk tasymaly» JShS sııaqty kásiporyndar bar. Sonymen qatar dýaldy oqytý boıynsha 48 kolledj 361 kásiporynmen birlesip jumys istep keledi. Onda 41 mamandyq boıynsha 7 myńnan astam stýdent bilim alýda. Al «Jas maman» jobasy aıasynda 2020-2021 jyldary 18 kolledj respýblıkalyq jáne jergilikti bıýdjet qarajaty esebinen zamanaýı qurylǵylarmen jabdyqtalsa, 2015 jyldan bastap kolledjder jumysshy mamandyqtarynyń bedelin arttyrý jáne álemde kásibı bilim berýdi damytýdy maqsat etetin WorldSkills halyqaralyq kommersııalyq emes qozǵalysynyń turaqty qatysýshysy retinde zamanaýı daǵdylardy ıgerýge múmkindik alǵan.
ALMATY
