Mine, osy máseleni maıshammen qaraǵan jıynda Qaraǵandy qalasynyń ákimi Ermaǵanbet Bólekpaev jumysyn sapasyz istegen merdigerdi, mindetine jaýapsyz qaraǵan tehnıkalyq qadaǵalaý qyzmetin qatań synǵa aldy.
– Jylda – osylaı! Jumys isteı almasańyzdar, nege tenderge qatysasyzdar? Qoldaryńyzdan kelmese, naryqtan ketińizder, basqalar bar, – dep máseleni tótesinen qoıdy qala basshysy.
E.Bólekpaev ózin talapshyl basshy retinde kórsetip kele jatqan ákimniń biri. Jıynda ol mindetine jaýapsyz qarap, salǵyrttyqqa jol bergen tehnıkalyq qadaǵalaý uıymdaryna qatysty sot isin qozǵaý kerektigin qatań túrde talap etti. Al jumysyn júrdim-bardym istegen merdigerler kepildik mindettemeleri aıasynda aqaýlardy túzeıtin bolady.
Merdigerlerdiń de aıtar ýáji bar eken. Olar tasjolǵa tóseletin bıtýmnyń jergilikti klımat jaǵdaıyna tótep bere almaıtyn sapasyna syn aıtyp, aqtaldy. Dáp osy jerde merdiger aqsha únemdeımin dep sapasyz ári arzan bıtýmdy ádeıi aldy ma degen suraq týyndaıdy. Álde bizde sapaly bıtým óndirisi atymen joq pa?
Rasynda da, tereń zerttep, anyqtaıtyn másele. Bıýdjettiń qyrýar qarjysyn arzan bıtýmmen birge sýsha aǵyza beretin bolsa, mundaı soraqy iske qasaqana barǵan merdigerge degen aıaýshylyq bolmaýy kerek.
Jıynda qalalyq kommýnaldyq sharýashylyq, jolaýshylar kóligi jáne avtomobıl joldary bóliminiń basshysy mindetin atqarýshy Rústem Qojaqapanov asfalt joldary qarǵyn sýdan keıin shurq tesik bolyp shyǵa kelgen kóshelerdi sanamalap berdi.
– Qaraǵandydaǵy ortaq jol jelisi 920 shaqyrym bolady. Onyń 104,1 shaqyrymyna kepildik qyzmet kórsetilýde. Barlyǵy 62 ýchaskege kepildik berilgen. Búginde kóktemgi tekserý jumystary bastalǵanǵa deıin aldyn ala 10 ýchaskede aqaý bar ekeni anyqtaldy, – dep málimdedi ol.
Jalpy, kenshiler astanasynda avtobýs júrgizýshileri kóp shaǵymdanatyn joldardyń tizimi bar eken. Muny atqarýshy bılik qaladaǵy avtoparktermen birlese otyryp anyqtapty. «Qara tizimge» ilikken kósheler qataryna Qazybek bı atyndaǵy aýdandaǵy on, Álıhan Bókeıhan aýdanyndaǵy 11 nysan engen eken. Sonymen atalǵan jıynda qala ákiminiń qaharyna ushyraǵan merdigerler aýa raıynyń qolaıǵa jaqqan kezinde ózderi jibergen kemshilikter men olqylyqtardy joıyp, aqaýlardy túzeýge kirisetin boldy. Al oǵan deıin ýaqytty joǵaltpaı, oıdym-oıdym bolǵan joldardaǵy oıyq pen shuńqyrlardy taqtataspen bitep, tegisteıdi.
Osy oraıda jergilikti taksı júrgizýshisi aıtqan myna áńgime eske túsedi. Qaraǵandydaǵy asfalt joly sapaly salynǵan jalǵyz kóshe bar eken, ol – burynǵy Beıbitshilik gúlzary dańǵyly. Qyrǵyn kólikke de, qarǵyn sýǵa da qyly qısaımapty. Sóıtse, ol tasjol osydan birneshe jyl buryn nemis tehnıkasymen nemis tehnologııasy boıynsha tóselgen eken...
QARAǴANDY
