Bul kúnge deıin jer sharyndaǵy 7 mlrd adamnyń 600-ge jýyǵy ǵaryshqa ushqan. Onyń úsheýi qazaq. Toqtar Áýbákirovtiń izimen Talǵat Musabaev jáne Aıdyn Aıymbetov orbıtaǵa attandy. Sapar barysynda 39 ǵaryshtyq eksperıment jasaldy. Osynyń arqasynda Qazaqstannyń ǵarysh ǵylymyn halyqaralyq qaýymdastyq moıyndady.
1991 jyly 2 sáýirde qazaqtan shyqqan tuńǵysh ǵaryshker Toqtar Áýbákirov Keńes Odaǵy Ǵaryshkerler daıarlaý ortalyǵynda ǵaryshqa ushý daıyndyǵyna kirisip, sol jyly 2 qazanda Baıqońyrdan «Soıýz TM-13» kemesimen ǵaryshqa ushyp, qazannyń 10-ynda Jerge qaıtyp qondy.
Qazaqtan shyqqan tuńǵysh ǵaryshker, Keńes Odaǵynyń Batyry, Qazaqstan Respýblıkasynyń Halyq qaharmany, tehnıka ǵylymynyń doktory, professor Toqtar Áýbákirov 1946 jyly maýsymnyń 27-inde Qaraǵandy oblysy Qarqaraly aýdany, «1-inshi maı» ujymsharynda dúnıege kelgen. 1969 jyly Reseı Federasııasyndaǵy Armavır joǵary áskerı ushqyshtar ýchılıshesin, 1979 jyly avıasııa ınstıtýtyn bitirgen.
Talǵat Musabaev – qazaqtyń 2-shi, al álemniń 309-shy ǵaryshqa úsh ret ushqan ǵaryshkeri. 1994 jylǵy maýsymnyń 1-inen qarashanyń 4-ine deıin «Soıýz-TM» ǵarysh kemesiniń bort-ınjeneri retinde ǵaryshta bolyp, 2 ret ashyq ǵarysh keńistigine shyqty.
Qazaqstan Respýblıkasynyń jáne Reseı Federasııasynyń ushqysh-ǵaryshkeri, Qazaqstan Respýblıkasynyń Halyq qaharmany jáne Reseı Federasııasynyń Batyry, avıasııa general-leıtenanty, tehnıka ǵylymynyń doktory, «Ekologııa» Qazaqstan halyq akademııasynyń akademıgi Talǵat Amangeldiuly Musabaev 1951 jyly 7 qańtarda Almaty oblysy, Jambyl aýdanynyń Qarǵaly aýylynda dúnıege kelgen.
Aıdyn Aıymbetov 2015 jylǵy 2-shi qyrkúıekte ǵaryshqa ushyp, úshinshi qazaq ǵaryshkeri atandy. «Soıýz TMA-18M» basqarylatyn ǵaryshtyq kemesi Baıqońyr ǵarysh aılaǵynan elorda ýaqytymen saǵat 22:37 mınýt ótkende attandy. Halyqaralyq ekıpaj quramynda reseılik ǵaryshker, №1 bortınjeneri Sergeı Volkov, Danııa Koroldiginiń astronavty Andreas Mogensen jáne №2 bortınjeneri Qazǵarysh ǵaryshkeri Aıdyn Aıymbetov boldy.
10 kúnge sozylǵan saparda Aıdyn Aıymbetov ǵaryshtaǵy 5-inshi ulttyq ǵylymı zertteý baǵdarlamasyn oryndady. Alǵashqy 4 baǵdarlama 1991 jyly Toqtar Áýbákirovtiń jáne 1994, 1998, 2001 jyldary Talǵat Musabaevtyń ǵaryshtyq saparlarynda atqarylǵan edi.
