Keńeste Memleket basshysynyń Joldaýynda aıqyndalǵan reformalardy júzege asyrý kezeńinde BAQ-tyń róli, jaýapkershiligi, áleýmettik kúıi, kásibı áleýeti jáne «Jańa Qazaqstan: mádenı-rýhanı álem jáne kitap shyǵarý» taqyryptary talqylandy.
Keńes otyrysyn ashqan partııanyń atqarýshy hatshysy Ashat Oralov sońǵy eki aıda qoǵamda, partııa qurylysynda úlken ózgerister bolǵanyn, Jańa Qazaqstan qurý jolyndaǵy transformasııanyń partııadan bastalǵanyn atap ótti. Sondaı-aq A.Oralov halyqpen keri baılanysty jetildirý maqsatynda qurylymy qaıta jasaqtalǵan partııa janyndaǵy qoǵamdyq keńesterdiń jumysyndaǵy ózgeristerge toqtaldy. Onyń aıtýynsha, partııa bıyl ulttyq mádenıet pen ónerdi qoldaýda birneshe is-sharany qolǵa alǵan. Sonyń biri – aıtys.
«Dástúrli «Altyn dombyra» aqyndar aıtysynan bólek bıyl «Babalar amanaty» aıtysyn da uıymdastyrýdy usynyp otyrmyz. Partııa árdaıym halyqtyń sózin sóıleıtin sóz zergerlerin qoldaıdy. Budan bólek bıyl elimiz ult ustazy Ahmet Baıtursynulynyń – 150, Muhtar Áýezovtiń – 125 jáne Ǵabıt Músirepovtiń 120 jyldyǵyn atap ótedi. Osy mereıtoılardy uıymdastyrýǵa partııa jan-jaqty qoldaý kórsetedi», dedi A.Oralov.
Jıynda sóz alǵan Mádenıet jáne sport mınıstri Dáýren Abaev Joldaýda aıtylǵan mádenı muralarymyz ben tarıhymyzdy tanýǵa qatysty qoıylǵan mindetterge sáıkes mınıstrliktiń qolǵa alǵan aýqymdy jumystaryna toqtaldy.
«Kitap shyǵarý isin odan ári damytý úshin jas qalamgerlerdi qoldaý asa mańyzdy. Osy rette 2023 jyldan bastap jas qazaqstandyq jazýshylar men aqyndarǵa arnaıy Prezıdenttik ádebı syılyq taǵaıyndalady. Qazir tıisti memlekettik organdarmen Jarlyq jobasy ázirlenýde. Oǵan qosa bıyl mınıstrlik «Úzdik balalar shyǵarmasy», «Jyldyń úzdik kitaby», «Jas qalamger» atty jobalardy júzege asyrýdy kózdep otyr», dedi mınıstr.
Keńestiń jańa tóraǵasy, Májilis depýtaty Amanjol Áltaı jańa quramdaǵy Miras-tyń jumysyna sáttilik tileı otyryp, azamattyq qoǵam qalyptastyrý men mádenıet salalaryn damytýdaǵy qordalanǵan máselelerdi birigip talqylaý, naqty usynystar aıtý ortaq maqsat ekenin jetkizdi.
«Aqparattyq shabýyl órship turǵan búgingi kúrdeli kezeńde elimizdiń aqparattyq keńistigin nyǵaıtý – negizgi strategııalyq maqsatymyzdyń biri. Bul turǵyda qoǵamymyzdy ydyratý úshin syrttan beriletin tapsyrmalarmen jumys isteýden, kóleńkeli qalamaqy úshin saıası klandardyń basqa da toptardyń saıasatyna arbalyp qalýdan saq bolýymyz kerek», dep, «Básekege qabiletti BAQ qalyptastyrý úshin ne istemek kerek?» degen suraq tóńireginde oılaryn ortaǵa saldy.
Bul rette «Qazaq medıa qaýymdastyǵy» zańdy tulǵalar birlestigi basqarý keńesiniń tóraǵasy Erbol Azanbek qazaqtildi aqparat quraldary jıi ushyrasatyn túıindi máselelerge toqtaldy. Onyń aıtýynsha, búginde qazaq tilindegi saıttardyń iri jarnama tapsyrysyna qoly jetpeıdi. Qarjy tapshylyǵynyń saldarynan bilikti maman jaldaı almaıdy, sáıkesinshe bilikti mamansyz sapaly kontent óndirý taǵy qıyndyq týǵyzady. «Memleket jáne áleýmettik jaýapkershilik sheńberinde bıznes osy máselege nazar aýdarsa, memlekettik tapsyrystan bólek, túrli taqyryptaǵy granttyq jobalar jasalyp, jekelegen jýrnalıster, redaksııalar konkýrs negizinde granttardy utyp alý arqyly kontent jasaý múmkindigine ıe bolar edi», dedi E.Azanbek.
Aqparat jáne qoǵamdyq damý mınıstri Asqar Omarov BAQ salasyn quqyqtyq retteýdi jetildirý, aqparat salasy qyzmetkerleriniń kásibıligin nyǵaıtý, otandyq BAQ-tyń básekege qabilettiligin odan ári damytý baǵytynda qolǵa alynǵan isterge keńinen toqtaldy. «Osy salada memlekettik retteýdiń tıimdi tetigin qurý maqsatynda zań jobasyn ázirleý jumysy bastaldy. Biz usynystardy jınap, sarapshylarmen birlese otyryp zańnamany jetildirý tetikteri boıynsha konsepsııa ázirleımiz. Ol úshin BAQ, azamattyq qoǵam, ÚEU ókilderin, qoǵam qaıratkerleri jáne basqa da múddeli uıymdardyń basyn qosyp, arnaıy jumys toby qurylýda», dedi mınıstr.
Al «Habar» agenttigi aksıonerlik qoǵamynyń basqarma tóraǵasy Berik Ýálı: «Joldaýda aıqyndalǵan reformalardy júzege asyrý kezeńinde BAQ salasynyń jaýapkershiligi, áleýmettik, kásibı áleýeti óte zor bolmaq. Jańa Qazaqstandy qurý jolynda elimizdiń basty arnasy ıdeologııalyq turǵyda jumys isteıdi. Prezıdenttiń bastamalaryn arna aldaǵy ýaqytta da halyqqa keńinen nasıhattaýǵa daıyn», dedi.
Sondaı-aq keńeste Mecenat.kz jobasyn ázirleýshiler qazaq qalamgerleriniń shyǵarmalaryna báıge jarııalaıtynyn jetkizdi. Olar jeńimpaz shyǵarmanyń avtoryna ómiriniń sońyna deıin aı saıyn 500 dollar kóleminde syıaqy berýge nıetti. Jobany ázirleýshi toptyń múshesi, telejýrnalıst Áıgerim Aǵyltaeva ulttyq ádebıettiń damýyna úles qosý, ádebıette jańa esimderdi tanytý, úzdik romandardy oqyrmanǵa usynyp, roman jazýdy ilgeriletý maqsatynda qolǵa alynǵan jobaǵa Freedom Holding Gorp ınvestısııalyq tobynyń negizin qalaýshy, belgili qarjyger Tımýr Týrlov qarjylaı qoldaý kórsetetinin aıtty.
