Granttyq joba sheńberinde tájirıbe almasý jáne sheteldik tájirıbelerdi engizý maqsatynda halyqaralyq alań qurylady dep josparlanyp otyr.
«Jobanyń bir ereksheligi – qazaqstandyqtardy sheteldik jattyqtyrýshylar oqytady. Jumys ınternet keńistiktegi qaýipsiz qozǵalys, qumar oıyndar, kıberbýllıng jáne ınternetke táýeldilik sııaqty tórt baǵyt boıynsha júrgiziledi. Joba barysynda qazaqstandyq mamandar sheteldik sarapshylarmen tájirıbe almasady. Sondaı-aq semınarlar ótkizý úshin Qazaqstanǵa halyqaralyq trenerlerdi shaqyramyz», dedi Amanat partııasy janyndaǵy Jastar qanatynyń jetekshisi Nurjan Jetpisbaev.
Jobany uıymdastyrýshylardyń aıtýynsha, jastar men balalar arasynda ınternetke táýeldilik pen qumar oıyndardyń aldyn alý salasyndaǵy qazaqstandyq jáne halyqaralyq zańnamaǵa taldaý júrgiziledi.
«Joba birneshe jyl qatarynan júzege asyrylyp keledi. Qazirgi ýaqytta ınternetke táýeldilik problemasy mektep oqýshylary arasynda ulǵaıǵan. Bul qubylys «áleýmettik indet» dep atalady. Korporatıvtik qordyń seriktesteri retinde biz halyqaralyq sarapshylardy tartý jáne jarııalaý arqyly jobaǵa barynsha qoldaý kórsetemiz», dep atap ótti joba seriktesi «Bolashaq» halyqaralyq stıpendııasy stıpendıattarynyń qaýymdastyǵy» QB dırektory Álisher Dúngenın.
Qoǵam belsendileri jastardy ınternet keńistiktegi qaýipsiz qozǵalys erejelerine oqytý boıynsha aqparattyq túsindirý materıaldaryn daıyndaýdy josparlap otyr. Joba aıasynda uıymdastyrýshylar «Oflaın kún» aksııasyn da ótkizedi.
Balalar men jastarǵa kómek kórsetýge baǵyttalǵan áleýmettik joba Aqparat jáne qoǵamdyq damý mınıstrliginiń tapsyrysy boıynsha iske asyrylady.
