Qoǵam • 17 Sáýir, 2022

Atyń óshkir tanymastyq

Osydan eki jyl buryn respýblıkalyq ádebı gazette jumys istep júrgen kezim. Kabınet esigi qaǵyldy, tórt qyz, eki jigit kelip tur. Almatydaǵy málim ýnıversıtettiń stýdentteri bolyp shyqty, gazette tájirıbeden ótýge nıetti eken.

Dúısenáli ÁLIMAQYN

Men olardy ertip bas redaktorǵa apardym. Áldenege shuqshıyp otyrǵan ol kisi «bárin shaqyr, jınalys bolady», dedi. Jınalys bastalarda alty stýdenttiń buıymtaıyn suraǵan basekeń qolyna gazettiń jańa nómirin alyp: «Myna birinshi bettegi kisi kim, tanısyńdar ma? Sender jýrnalıstıkanyń tórtinshi kýrsyn aıaqtaǵaly jatyrsyńdar, bul kisini tanymasańdar uıat ári syn», dedi. Tótesinen keler synaqty kútpegen stýdentter qapelimde ne derin bilmeı sasyp qaldy. Sosyn men tynyshtyqty buzyp, «qazirgi jastar qaıtys bolyp ketken qalamgerlerdi tanymaıdy ǵoı» dep em, álgi stýdentter meni qostap ala jóneldi. Tipti biri «apaılar bizge tiri adamdar týraly aıtyp beretin, biz shynymen buryn qaıtys bolǵan kisilerdi tanymaımyz» demesi Bar ma? Júzi surlanyp ketken bas redaktor basyn shaıqap, aldynda turǵan órimdeı jastarǵa, bolashaq «jýrnalısterge» ne derin bilmeı daǵdaryp qaldy. Sosyn ol: «Myna jigit senderdi ádeıi shatystyryp, jańaǵy kisini qaıtys bolǵan dep otyr, al ol kisi ómirde bar, qalasańdar, osynda shaqyraıyn, jaqsylap tanysyp alyńdar» dep sózin kóńilsiz aıaqtady.

Maǵan bul alty stýdentpen jumys isteý tapsyryldy. Altaýyna alty shaǵyn maqala jazyp kelsin dep aıttym. Árıne, ózderi jaza alatyn alýan taqyrypta. Eki kúnnen keıin álgilerden «maqalalar» kele bastady. Birinshisi bylaı dep bastapty. Qaz-qalpynda hatqa túsirip otyrmyn:

«О́tkende aýylǵa barǵanda, apamnyń tapsyrýymen sıyr saýýdy úırendim. Qıyn eken. Qazirgi aýyl adamdaryna janym ashıdy. Qaıtyp shydap júr dep oıladym». Mine, osylaı. Kúlesiz be, jylaısyz ba? Al ekinshisiniń «maqalasynyń» taqyryby «Kólikti baıqap júrgizeıik» dep qoıylypty. Oqýǵa dátim shydamady. Solaı da solaı, eki aı ýaqyty bitken olar «úlken gazette praktıka kórip qaıttyq, kúshti boldy» dep badyraıtyp taqyryp qoıyp, áleýmettik jelige bir-bir sýret saldy da, taıyp turdy.

Bul qazirgi bizdiń qoǵamdaǵy keı jastardyń kórinisi deýge ábden bolady. Biraq biz jastardan úmit kútip edik qoı, tanymastyq ózińnen bastalatyny ózekti qarıtynyn seze bastadyq. Anda-sanda gazet betine sýreti basylǵan álgi aqyn aǵany úlken jınalystardan, bas qosýlardan kezdestirip qalamyn, sonda álgi alty stýdenttiń tanymastyǵy oıyma sap ete túsedi. Tanymastyq, áı, atyń óshkir tanymastyq.