«Memleket, kásiporyndar men oqý oryndarynyń arasyndaǵy jaýapkershilik anyq bólingende ǵana kadr daıarlaýdyń sapasy qamtamasyz etiledi. Muny álemdik tájirıbe de anyq kórsetip otyr. Sondyqtan ákimdikter kolledjder men kásiporyndardyń ózara tıimdi áriptestik ornatýy úshin sharalar qabyldaýy qajet. Iаǵnı, kolledjderdi qamqorlyqqa alý, dýaldi oqytý júıesin damytýǵa jaǵdaı jasalýy tıis. Mamandardy aldyn ala daıarlaý úshin «Jańa kásipter atlasyn» da paıdalanǵan jón», dedi Premer-Mınıstr Úkimet otyrysynda.
Eń bastysy – kolledjder men ýnıversıtetterdiń túlekteri eńbek naryǵynda suranysqa ıe bolýy kerek.
«Kadr daıarlaýda mamandarǵa degen qazirgi suranyspen qatar, eńbek naryǵynyń boljamdy derekteri de negizge alynýǵa tıis.
Bul mindetterdiń barlyǵy 2025 jylǵa deıingi bilim berýdi damytý tujyrymdamasynda eskerilýi kerek. Sonymen qatar Eńbek mınıstrligi múddeli memlekettik organdarmen, ákimdiktermen jáne «Atameken» palatasymen birlesip, qysqamerzimdi oqytýdy ulǵaıtý máselesin pysyqtap, onyń tıimdiligine monıtorıng júrgizýdi qamtamasyz etsin», dedi Álıhan Smaıylov.
Odan bólek, óńir ákimdikterine tehnıkalyq jáne kásiptik bilimi bar kadrlardy daıarlaýǵa jergilikti bıýdjetten bólinetin memlekettik bilim berý tapsyrysyn ulǵaıtý, «Jas maman» jobasynyń negizinde kolledjderdi jaraqtandyrýǵa qarajat bólý, kásiporyndarmen birge mamandardy nysanaly túrde daıarlaýdy jolǵa qoıý tapsyrmalary berildi.
Aıana Toǵanbek
