Ekologııalyq sharada oblys basshylyǵy da tóbe kórsetti. О́ńir basshysy Ábilqaıyr Sqaqov qala jastarymen birge ózen jaǵalaýyn tazalaýǵa qatysty. Jasyl Cross ekologııalyq marafony 2018 jyldan beri turaqty túrde ótkizilip júr. Munda ploggınge mán beriledi. Iаǵnı qatysýshylar júgirip júrip, belgili bir aýmaqta qoqys jınaıdy. Eń kóp qoqys jınaǵan adam jeńimpaz dep tanylady.
– Tazalyq pen tártip – kez kelgen qalanyń tabysty damýynyń kepili. Bul jaǵynan Pavlodar basqalarǵa úlgi bolýǵa tıis. Ekomarafon bir rettik aksııa emes, ony jıi ótkizý kerek. Bul densaýlyqqa da, tabıǵatqa da paıdaly, – dedi oblys ákimi.
Á.Sqaqov Tkachev kóshesinde ornalasqan №3, 5, 5/1 mekenjaılarynda ornalasqan kópqabatty baspanalardyń turǵyndarymen kezdesip, senbilikke járdemdesti. «Vera PV» JShS basshysy Evgenııa Shkvıranyń aıtýynsha, aýlany tazalaý – osy úılerdiń turǵyndary úshin burynnan qalyptasqan dástúr. Balalar da tazalyq saqtaýǵa daǵdylanǵan.
Belgili bolǵandaı, úsh úıdiń turǵyndary múlik ıeleriniń birlestigi nemese qarapaıym seriktestik túrindegi úıdi basqarýdyń jańa formalaryna kóshýge daıyndalyp jatyr. Evgenııa Shkvıranyń aıtýynsha, turǵyndar ózderiniń páterleri úshin ǵana emes, jalpy úı úshin de jaýapty ekenin túsinedi. Iske sát!
