Baspasóz qyzmetiniń málimetterine qaraǵanda, budan buryn, Nur-Sultan qalasy Baıqońyr aýdanynyń №2 sotynyń 2020 jylǵy 18 qyrkúıektegi úkimimen Qarashev (SIM-niń burynǵy jaýapty hatshysy) laýazymdyq ókilettikterin asyra paıdalanǵany (QK-niń 361-baby 4-bóliginiń 3-tarmaǵy), al О́tembaev (Qazaqstannyń О́zbekstandaǵy burynǵy elshisi) pen Nurekenov (merdigerlik uıymnyń dırektory) kórsetilgen áreketterge járdemdeskeni úshin (QK-niń 28-babynyń 5-bóligi, 361-baby 4-bóliginiń 3-tarmaǵy) kináli dep tanylǵan.
Prokýror Qarashevty para aldy jáne qylmystyq jolmen alynǵan aqshany zańdastyrdy degen aıyptan bas tartty, sáıkesinshe istiń osy bóligi toqtatyldy. Kassasııa isti zerdelep, sottalǵandardy aqtaýdy suraǵan advokattardy, isti jańa qaraýǵa jiberýdi usynǵan prokýrordy tyńdaı kele, kelesi tujyrymǵa keldi.
«Is boıynsha sotqa deıingi tergep-tekserý men sot tergeýi birjaqty ári jarym-jartylaı júrgizilgen. Aıyptaý aktisine sáıkes, Qarashev, О́tembaev pen Nurekenov Qazaqstannyń О́zbekstandaǵy elshiliginiń qurylysy boıynsha oryndalǵan jumystar aktisine qol qoıǵan, nátıjesinde bıýdjetke 53 mln teńge somasynda (oryndalǵan jáne aktilerde kórsetilgen jumystardyń aıyrmashylyǵy) zalal kelgen. Birinshi satydaǵy sot saraptama eskermegen materıaldar men merdigerdiń shottaryndaǵy qarajat qaldyǵyn 53 mln teńgeden alyp tastap, zalal mólsherin 22 mln teńge dep tanyǵan», delingen habarlamada.
Osy rette tergeý men sot organdary mynadaı mán-jaılardy anyqtamaǵan:
- Elshilik ǵımaratynyń qurylysyn basqa merdiger bastaǵan. Taǵylǵan aıyptyń negizine alynǵan saraptama qorytyndysy boıynsha aldyńǵy merdiger 274 284 632 teńge kólemindegi (oryndalǵan jáne aktilerde kórsetilgen jumystar qunynyń aıyrmashylyǵy) jumysty oryndamaǵan. Sot sheshimimen atalǵan merdiger memlekettik satyp alýdyń josyqsyz qatysýshysy dep tanylǵan. Nurekenov bastaǵan merdiger kemshilikteri bar, aıaqtalmaǵan nysandy qabyldap, qurylysty sońyna deıin jetkizgen. Nysan 2019 jyly paıdalanylýǵa berilgen.
- Qaldyq jumystarǵa arnalǵan jobalyq-smetalyq qujattama (naryqtyq baǵalardyń ózgerýin, aldyńǵy merdiger oryndamaǵan jumys kólemin eskere otyryp) bekitilmegen. Iаǵnı, jumys túrleri men olardyń quny tapsyrys berýshi men merdiger arasynda kelisilmegen. Aldyńǵy merdiger jumys istegen jáne onyń sáıkestigine saraptama júrgizilgen JSQ-nyń kemshiligi men ony túzetý qajettigin Nurekenov basshylyq etken merdigerdiń aktilerde kózdelmegen 59 mln teńgeden astam somaǵa jumystar oryndalǵanyn aıǵaqtaıdy.
- Baqylaýǵa alý maqsatyndaǵy ólsheý aktisi negizinde júrgizilgen saraptama 2018 jyly oryndalǵan. Al nysan 2019 jyly paıdalanýǵa berilgen. Iаǵnı, qurylys aıaqtalǵannan keıin oryndalǵan jumystardyń kólemi eseptelmegen.
- Aıyptaý aktisinde qylmystyq qýdalaý organdary elshiliktiń qurylysyna bólingen aqsha qarajatyn jymqyrǵany týraly dálelderdi usynbaǵan. О́zbekstan Respýblıkasynda barlyq esep aıyrysý qolma-qol aqshasyz júrgiziledi. Shottaǵy, qolma-qol aqshanyń alynǵany, materıaldardyń nemese jabdyqtardyń satylǵany anyqtalmaǵan. Merdigerdiń kásiporny SIM-niń sharýashylyq basqarmasyna vedomstvolyq baǵynysty uıym bolyp tabylady.
«Osynyń barlyǵy zalal faktisi men somasy týraly máseleni tekserý qajettigin bildiredi. Zań talaptaryna sáıkes sot tergeýin júrgizýge jáne jańa dáleldemelerdi zertteýge kassasııalyq sot ýákiletti emes. Osylaısha sot aktileriniń kúshi joıylyp, is apellıasııalyq satyǵa qaıta qaraýǵa jiberildi», delingen Joǵarǵy sottyń osy iske qatysty derekterinde.
