О́tken beısenbide Reseıdiń syrtqy ister mınıstri Sergeı Lavrov Ýkraınanyń shyǵysyndaǵy «áskerı operasııa» jańa kezeńge ótkenin habarlaǵan edi. «Basynda jarııalaǵanymyzdaı, bul Donesk pen Lýgansk respýblıkalaryn tolyq azat etýge baǵyttalǵan. Operasııa jalǵasady. Onyń kelesi kezeńi bastalyp jatyr», dedi S.Lavrov.
Kúni keshe Reseı qorǵanys mınıstri Sergeı Shoıgý Reseı prezıdenti Vladımır Pýtınge Marıýpol qalasyn basyp alǵany týraly málimdedi. Onyń aıtýynsha, qazirgi tańda «Azovstal» ónerkásiptik aımaǵynda ǵana Ýkraına áskeri qalǵan. S.Shoıgý óz sózinde zaýytty basyp alý týraly josparymen bólisken-di. Alaıda Kreml basshysy «Azovstalǵa» shabýyl jasaý operasııasynan bas tartýdy tapsyrdy. Bul uıǵarymyn V.Pýtın «Reseı sarbazdarynyń ómirin saqtaý qajet» dep túsindirdi.
Degenmen buǵan deıin Ýkraına prezıdenti Volodımır Zelenskıı Marıýpoldy qorǵap jatqan jaýyngerlerge qatysty pikirin bildirgen edi. Kıev bıligi alda-jalda Reseı áskeri «Azovstalǵa» shabýyl jasap, ondaǵy sarbazdar men beıbit turǵyndardy qyrsa, eki el arasyndaǵy kelissózder múldem toqtaıtynyn jetkizdi.
Esterińizde bolsa, Reseı áskeri Marıýpol qalasyn naýryzdyń basynda qorshaýǵa alǵan bolatyn. Sodan beri qalany tolyqtaı baqylaýyna ala almaı keledi. Qalaǵa shabýyl bastalǵaly myńdaǵan adam údere kóship, bosyp ketti. Qazirgi tańda shaharda shamamen 120 myńǵa jýyq beıbit turǵyn bar.
Soǵysty zertteý jónindegi amerıkalyq analıtıkalyq ınstıtýt 20 sáýirdegi urys qımyldarynyń barysyna saraptama jasap, keskilesken qaqtyǵys aldaǵy ýaqyttyń enshisinde ekenin málimdedi. Instıtýttyń málimetterine súıensek, reseılik áskerler sársenbi kúni Ýkraınanyń shyǵysynda sál ǵana ilgerilep, birneshe aýyldy basyp alǵan. Biraq áli de shepti buzyp ótýi baıqalmaıdy.
«Reseı áskeri iri shabýylǵa qajetti logıstıkalyq jáne komandalyq ınfraqurylym salyp jatyr. Olar eshqandaı úlken jetistikke qol jetkizgen joq. Kóptegen baǵytta alǵa jyljýy baıqalmaıdy. Sátti shabýyl jasaý múmkindigi de kórinbeıdi», deıdi ınstıtýt sarapshylary.
Ulybrıtanııa premer-
mınıstri Borıs Djonson jýrnalısterge bergen suhbatynda Vladımır Pýtınmen kelissóz júrgizýdiń máni joq ekenin málimdedi. Onyń aıtýynsha, Pýtınmen soǵysty toqtatý týraly pikir almasý qoltyraýynmen saýdalasýmen birdeı.
AQSh prezıdenti Djo Baıden joǵary áskerı basshylarymen kezdesýinde ýkraındardyń qabileti men soǵysqa daıyndyǵy kútkeninen de asyp túskenin jetkizdi.
«Men olardyń kúshti jáne jaýjúrek ekenin biletinmin. Biraq Ýkraın halqy kútkenimnen de asyp tústi. Olardyń qaısarlyǵyna tańǵaldym... Kún saıyn qarý-jaraq pen oq-dáriler jiberilip jatyr. Dúnıe júzindegi eldermen odaqtastarymyz ben seriktestikterimizdiń qanshalyqty mańyzdy ekenin kórip otyrmyz», dedi D.Baıden.
Keıingi birneshe kúnde Reseı sarbazdary Ýkraınanyń qalalaryn zymyrandar men artıllerııa arqyly atqylaýyn kúsheıtti. Reseı qorǵanys mınıstrliginiń habarlaýynsha, bir túnde 1001 áskerı nysanǵa, onyń ishinde 162 atys pozısııasyna soqqy berilgen. Degenmen snarıadtar men zymyrandar áskerı nysanǵa emes, turǵyn úıler men azyq-túlik qoımalaryna túskeni áleýmettik jelilerde jarııalanǵan vıdeolardan anyq kórinedi.
Ýkraınanyń ekinshi úlken qalasy Harkovtiń meri shahardy ústi-ústine bombalap jatqanyn jetkizgen. Harkov oblystyq memlekettik ákimshiliginiń basshysy Oleg Synagýbovtyń aıtýynsha, reseılik kúshter Harkov aýdandaryn birneshe qarý túrimen atqylaǵan. Sonyń saldarynan bes beıbit turǵyn qaza tapty.
Ulybrıtanııa, AQSh, Kanada jáne Fransııanyń qarjy mınıstrleri sársenbi kúngi G20 otyrysynda Reseı ókilderi onlaın sóz sóıleýge kiriskende oryndarynan turyp ketip, baılanysyn óshirip tastady. Al G7 elderiniń qarjy mınıstrleri Ýkraınaǵa 24 mlrd dollardan asatyn qarjylyq qoldaý kórsetýge kelisim berdi.
