– Shynar Jeńisqyzy, ádette ártister «betegeden bıik, jýsannan alasa» keledi, degenmen sizdi teatrdaǵy oı-pikirin taısalmaı turyp ashyq aıtatyn ótkir minezdi ártisterdiń qatarynan kóretin edik. M.Áýezov atyndaǵy Ulttyq teatrdyń aptalyq lezdemelerinde kemshilikti batyl aıtatynyńyzǵa talaı kýá bolǵanmyn. Betke aıtylatyn shyndyq kóp adamǵa unaı bermeıdi ǵoı, shyndyq sizge ne úshin kerek?
– Teatr óneri – árbir alǵan tynysyń qulaqqa estiletin tiri aǵza ispettes. Bul ónerde usaq-túıek bolmaıdy, báriniń maǵynasy bar, atqaratyn qyzmeti bar, sebebi jalpy teatr óneriniń ónimin jasaıtyn rejısser, dramatýrg, akter degen mamandyq ıeleri bir-birine táýeldi jáne birinsiz biriniń kúni joq. Jaýapkershiligi jalǵyz adamǵa ǵana tıesili emes, ujymdyq óner bolǵandyqtan, oǵan kemshiliktiń tán bolýy zańdy da. Jas kúnińdegi úlkenniń betine jasqana qaraıtyn uıań mineziń qataldyqpen almaspasa da, ýaqyt tezinen ótkennen keıin kóp nársege kózqarasyń ózgerip, bárin óz atymen ataýdy úırenedi ekensiń. Sypaıy bolǵan jaqsy, al adal bolý odan da góri jaqsyraq. О́ner akademııasyn bitirgen túlekter teatrdyń kórkemdik keńesi músheleriniń aldynda án aıtyp, bı bılep, óleń oqyp, bar qabiletin kórsetip jumysqa qabyldanady. Keıbiri án jaǵyna myqty bolsa, dramalyq jaǵy kemshin tartyp turady, keıde kerisinshe, keıbiri monologty myqty oqyǵanymen, basqa ónerge shorqaq keledi. Teatrdaǵy kórkemdik keńestiń múshesi bolǵannan keıin badyraıyp turǵan kemshilikke kózimdi jumyp qaraı almaıtynym ras, shymbaıyma batyp turǵan shyndyqty aqtaryp aıtyp salǵym kelip turady. О́ıtkeni bul ónerge qııanat. Osy Qazaqstandaǵy qaı teatrǵa barsań da, bosqa júrgen kemtalant oqýshylar jetip artylady. Mańdaı terińdi sorǵalatqan eńbekqor talant bolsań eshkim de jolyńa tosqaýyl bola almaıdy. Al «mynaý meniń oqýshym», «mynaý meniń baýyrym» degen kózqaras ústemdik quryp turǵanda, sahna óneri eshqashan órkendemeıdi. О́nerdiń ıisi murnyna barmaıtyndar «qandaı jolmen bolsa da tanylamyn» degendi uran etip alady da, olarǵa erik berseń «óner degen qurbandyqtardyń ústimen júrip ótý» degen jarymjan túsinigine saı, jan-júregi taza, onysy oıyn órneginen kórinip turatyn talanttardy shimirikpeı taptap óte shyqqysy kelip turady. Bul – ádiletsizdik, mundaıǵa kóz jumyp qaraýǵa bolmaıdy.
Meniń baqytym – ulttyq teatr ónerimizdiń qabyrǵasyn qalaǵan ulylardyń kózin kórgenim, daýysyn estigenim, ónerinen kózimdi ala almaı suqtana qarap, súısingenim. Ol kisiler sahnada oınap jatqanda búkil teatrdy baýrap turatyn aýrasyn sezinip tamashalaýdyń ózi ǵanıbet edi. О́ner ortasy bitpeıtin báseke, máńgi maıdan bolǵan soń ol kisilerde de qatelik bolǵan shyǵar, biraq óner jolyn tańdaǵanymda, adamdyǵy men adaldyǵy, qarapaıymdylyǵy men kishipeıil minezi qatar órilgen sol apalarym men aǵalarymdaı bolsam dep keldim. Keıingi óz qatarlastarymnyń boıynan ónerge degen dál sondaı adaldyqty, jankeshtilikti kóre almaǵan soń da kúıinetin shyǵarmyn.
– Degenmen áıgili adamdardyń kópshiligi óner men sheberlik shyńdaýda teatr ishindegi «aǵys asty» teketirester men kózge kórinbeıtin tartystardyń da paıdaǵa asatynyn aıtyp jatady. Qatarlas áriptesterińiz serıaldarǵa túsip, endi tanyla bastaǵanda, siz sonaý 1990 jyldardyń sońynda televızııa arqyly kópshilikke tanylyp, juldyz bolyp júrdińiz emes pe?
– M.Áýezov teatryna kelgeli otyz jyldan asyp barady.Ustazym, professor Rábıǵa Qanybaeva ustazdardyń ustazy edi ǵoı. Biz ınstıtýtty bitiretin kezde ol kisi shákirtteriniń ónerin kórsetý úshin M.Áýezov teatrynyń sol kezdegi kórkemdik jetekshisi Ázirbaıjan Mámbetovti shaqyrmaq boldy. Alaıda ol kisi bizdiń kýrstyń ónerin kelip kórýge múmkindigi bolmaǵanymen, bir jyldan keıin meni M.Áýezov teatryna jumysqa qabyldady. Teatrda jumys isteı bastaǵanymda baıqaǵanym, bul jerde janynda ustazy, oqytýshysy joq jalǵyz ártis men bolyp shyqtym. Qalǵan áriptesterimniń báriniń ustazy janynda júr. Janyńda ustazyńnyń bolmaı jalǵyz júrgeniń de jaqsy eken, ári ıterip, beri súırep, qaqpaqyldasa da, qıyndyqtyń arasynda júrip shyńdalyp, shynyǵyp shyǵýyńa kóp kómegi bolady eken. Ázirbaıjan Mádıuly teatrǵa qabyldaý týraly ótinishimdi jazdyryp ala sala, tústen keıin saǵat tórtke «Qaragózdiń» repetısııasyna, kópshilik sahnasyna shaqyryp, «Aıman-Sholpan» spektaklindegi Aımannyń róline daıyndala ber» degende, tóbem kókke tıe jazdap, erekshe qýanysh qushaǵynda bolǵanym dál búgingideı esimde. Ol kezeńde ártister Kýpchıkov degen dırıjermen daıyndyq jasap, spektakldegi ándi fonogrammamen emes, jandy daýyspen oryndaıtyn.
Iá, báseke men báıgege jaralǵan sahna óneri jankeshtilikti, eńbekqorlyqty súıedi. Eskirmek túgili sonaý antıkalyq dáýirden beri neshe márte almasqan adamzat qaýymdastyǵyna basyn ıgizip kele jatqan janynyń siriligi onyń máńgi jas óner ekenin dáleldeıdi. Onyń bar qupııasy da osynda – adam jandy syrlasýdy, tabıǵı sezimdi, ómirdiń adaldyǵyn, ádildigin ańsap turady. Al bul sezimdi kórermenge tek akter ǵana syılaı alady.
Qıyn sátterde bir retteýshi kúshtiń qoltyǵyńnan demep, qoldaǵanyn sezesiń. Sen qınalyp, qaljyrap, qaıratym taýsyldy degende, Qudaı Taǵala ádemi joldarmen alyp júrip, aq saraıǵa ákelip kirgizedi. Al biz ólermendikpen jarmasyp, tartyp alsa da, aıyrylǵymyz kelmeı, qaıta tap beretin dúnıelerdiń bizge túkke de keregi joq ekenin uǵynbaımyz, «saǵan kerek emes» dep keri ıterip, arashalaǵysy kelse de, tabanymyzdy tirep turyp taıtalasyp, tartyp alǵymyz keledi. Qanatyńdy kúıik shalǵandaı qamyǵyp júrgen sátterde «Egemen Qazaqstanǵa» Qarashash Toqsanbaıdyń «Pa, shirkin, Shynar!» degen maqalasy jarq ete qalady, aýzymen qus tistegen «Habardyń» «77 kúninen» usynys túse qalady, bala qushaqtap dekrettik demalysta otyrǵanyńda, úlken fılmnen ról buıyra qalady, ne kerek, Qudaı degen adamnyń nesibe men oljadan qur qalmaıtynyn jaqsylap turyp túsinip aldym ǵoı. Osyny túsingen bette qıyn dep júrgenimniń bári jeńil, jeńil degenimniń bári maǵynaly, al maǵynaly nárseniń meni adam retinde ósirip, bıiktetetinin bildim.
– «Qorqyt» qoıylymyndaǵy siz jasaǵan Ázireıil beınesi kórermen esinde kópke deıin saqtalady. Menińshe, osy spektaklde oınaıtyn akterlerdiń bári oıyn ústinde basqa qabattaǵy álemge ótip, tylsymmen baılanysyp, transqa túse me deımin. Álemdik deńgeıdegi rejısserdiń qoıylymynan eleýli ról sizge qalaı buıyrdy?
– Ataǵy men dańqy dúnıejúzin dúbirletken áıgili Ionas Vaıtkýstiń ákemteatrǵa kelip spektakl qoıýynyń ózi bizdiń mádenıetimiz ben ónerimizdegi úlken oqıǵa dep bilemin. Lıtvalyq rejısser kelisimshartpen shaqyrylǵannan keıin aldymen teatrdyń úsh-tórt spektaklin tamashalap, akterlerdiń oıynymen asyqpaı tanysyp aldy. «Syǵan serenadasyn» tamashalaǵan rejısser Izoldanyń rólindegi meniń esimimdi qoıyn dápterine túrtip qoıǵan bolýy kerek. Erteńinde kórgen spektaklderden ózine unaǵan bes-alty akterdi jınap aldy da: «qalaı, jumys isteımiz be?» dedi. Qazaq eline kelip qoıǵaly turǵan «Qorqyt» spektaklinen bizdi kórgisi keletin syńaıyn osylaı baıqatty. «Qorqyt» – teatrymyzdyń tólqujaty ispetti, tamyrynda adamzattyń ańsary jatqan qunarly týyndy. Teatrdyń kórkemdik deńgeıin bıiktetetin bul rýhanı oljanyń jaryqqa shyǵýyna pesanyń avtory, dramatýrg Iran-Ǵaıyp aǵamyz ben teatrymyzdyń dırektory Erkin Jýasbektiń eńbegi zor. O basta dramatýrgtiń ssenarııi boıynsha Ajal beınesi qaba saqal, qapsaǵaı deneli er adam obrazyna qurylǵan eken. Biraq Vaıtkýs: «men Ajaldy ádemishe kelgen áıel beınesinde kóremin», dedi. Sóıtti de Qorqyttyń janyn alýǵa keletin qyzyl qanat Ázireıildiń rólin maǵan berdi. Vaıtkýs akterdiń alqymy qyzarǵansha aıǵaılap, julqynyp, alasuryp oınaǵanyn unatpaıtynyn birinshi kúnnen eskertti. «Múmkindiginshe, tabıǵı oınaýǵa tyrysyńyzdar» dedi. Bul obraz osylaı týǵan. «Qorqyt» qoıylymynda sonshama estetıka, qat-qabat oı, ómir fılosofııasy bar. Tylsym dúnıeniń syry estiletindeı bolatyny da sondyqtan bolar.
– Shynar, áleýmettik jeliniń betinde «bolashaq kitabymnan úzindi» dep teatr-kıno salasynda júrip bastan keshken oqıǵalaryńyzdy, áriptester ortasyndaǵy pendeaýı jaıtty qysqa hıkaıat túrinde jarııalap júresiz. Biz úshin qyzyqty. Biraq memýar degen janrda jazylyp, kópshilik oqyrman qaýymǵa arnalǵan soń ol shyndyq sizdiń ǵana shyndyǵyńyz bolyp qalmaýy kerek. Memýardyń basty sharty – avtor shyndyqty ózine qaraı ıkemdemeı, taza aqıqat turǵysynan baıandap shyǵa alatynyna senimdi me?
– Eger memýar jazýdy qolǵa alatyn bolsam, keshegi ótken oqıǵalardy búgingi kún bıigi turǵysynan taǵylymdy etip jazýǵa tyrysar edim. Bul janrdaǵy jazbamdy jarııalaý – aldaǵy ýaqyttyń enshisindegi sharýa. Belgili sahna maıtalmany Sábıt Orazbaev aǵamyzdyń teatr jáne onyń tóńiregindegi shyǵarmashylyq orta, zamandastary týraly jazǵan jyly esteligindeı bolsa deımin. Iá, ýdaı ashy kermegi men baldan tátti shárbatyn qatar usynatyn óner jolyndaǵy aýyrtpalyqty tek men ǵana emes, osy baǵytty taǵdyrym dep tańdaǵan barlyq áriptesim bastan ótkeredi. Men ishime syımaǵan soń jazamyn. О́ner adamynyń jany qyrqynshy jipten de názik, qaýmalaǵan qalyń oıyn qaǵazǵa túsirse, jan-júregin syzdatqan syry men muńyn aqtarsa, jeńildep qalady. Bir jaǵy, aqıqatqa sýsaǵan kóńilim, ar men ádiletten arasha suraǵan tilegim meniń syrttan qorǵanar qalqanym sııaqty. Shyndyq qymbat. Durys aıtasyz, kópke arnalǵan kórkem dúnıe bolǵandyqtan, ol meniń ǵana shyndyǵym bolmaýy kerek. Memýardyń myqtylyǵy, ózińe ádilet kózimen qaraı alý.
– Ártister qaýymynyń ádebıetpen, kitappen dostyǵy bizge beımálim. Biraq №11 kitaphanadan Qazaqstannyń halyq ártisi marqum Baqyt Janǵalıevany jıi kezdestiretin edik, al teatrdyń baspasóz buryshynda tigýli turatyn merzimdi basylymdardy Baýyrjan Qaptaǵaev ǵana paraqtap, shuqshıyp otyratynyn baıqaıtyn edik. Sizdiń de qazaq poezııasymen dostyǵyńyzǵa syrttaı súısinemiz. Jeli betinde shymyr shýmaqtardy jıi jarııalap otyrasyz...
– Kitapqa bala kúnimnen qumar bolyp óstim. Aty dúrildep shyǵa bastaǵan aqynnyń óleńimen mindetti túrde tanysamyn. Gúlnar Salyqbaı, Erlan Júnis, Dáýren Berikqajy sııaqty myqty shaıyrlardy oqyp, janymnyń dertin emdep, oıǵa shomamyn. Kúlásh Ahmetova men úshin máńgi jas aqyn. Kúlásh – syrlasym. Muńdasym. Kúlásh – tunyp turǵan sezim. Keıingi aqyndardyń keıbiri mahabbatty, ǵashyqtyqty jalańashtap sýretteıdi ǵoı, al Kúlásh aıtar oıyn sezimge orap jetkizedi. Júregińde oıanǵan eń taza sezimdi úrkitip almaı, aıalap, abaılap aıtqan durys qoı, á? Ǵashyqtyń kúıin sýretteýde qaradúrsindik te joq, ábestik te joq, uıalýdyń tipti de qajeti joq, óıtkeni ol móldirep turǵan tunyq sezim.
Stýdent kezimnen álemdik kınematografııa juldyzdary Sofı Loren, Marlen Dıtrıh, Ingrıd Bergman, Edıt Pıaftardyń memýarlyq kitaptaryn kúndiz qolyma sham alyp izdep, jas kúnimnen jastanyp turyp oqydym. О́zimizdiń Shara Jıenqulovanyń «О́nerim meniń – ómirim» shyǵarmasynyń kez kelgen epızod-detalin jatqa biletin edim, óıtkeni bul kitaptan alǵan áserimdi tilmen aıtyp jetkize almaımyn. Jas kúnimde eliktegen, talantynyń ár qyryn qyzyqtaǵan súıikti akterlerim kóp boldy. Bir oınaǵan obrazyn ekinshi ret qaıtalamaǵan L.Gýrchenko túsken fılmderdi jibermeı kóretinmin. Sheteldik aktrısalardyń shytyrmanǵa toly ómiri sumdyq qyzyq edi, kimnen qııanat kórdi, ózderi kimge zııanyn tıgizdi – ár estelikten shyndyq sezilip turǵan soń shyrmaýynan shyǵa almaı, qushtar sezimmen qaıtalap oqı beretin edim. «Kúnbaǵys» fılmine birge túsip júrip Sofı Loren Keńes Odaǵynyń aktrısasy Lıýdmıla Savelevanyń azdap «aıaǵyn basyp» ketkenine ókinishin bildiredi. Baq qonatyn bolsa, adamnyń taǵdyry bir-aq sátte ózgeretinin M.Dıtrıhtiń mysaly kórsetedi. Gollıvýdtan kelgen prodıýserdiń «Kógildir perishte» fılmine bas keıipker izdep júrgenin estı sala, spektakldiń basty rólinde oınaıtyn óziniń naqsúıerin kórsetý úshin rejısser ony teatrǵa shaqyrady. Bolashaq fılmine keıipker izdep kelgen prodıýserdiń qyraǵy kózi sahnada sylań qaqqan sulýǵa emes, kópshilik sahnasynyń ishinde eleýsiz júrgen, ústine kenep kıip alsa da, jan dúnıesiniń appaq jaryǵy sonaý sahnanyń túkpirinen jarqyraı kórinip, daralanyp turǵan Marlenge túsedi. «Biz sizge naǵyz has sulýdy kórsetip turmyz ǵoı, talantsyz aktrısanyń ne keregi bar?» deıdi dırektor. «Joq, – deıdi prodıýser, – bul naǵyz talanttyń ózi!» Mine, talanttar barlyq jerde osylaı tanylsa, shirkin. Tanystyq, aǵaıyngershilik talanttyń jolyna tosqaýyl bolmaýy kerek. Mundaı adamdardyń ómirin qaıtalaý múmkin emes, tipti qaıtalaýdyń qajeti de joq, biraq ónegeli taǵdyrdyń shýaǵy seniń ómirińe báribir sáýlesin túsiredi. Sen odan jylý sezesiń, jamanynan jırenip, jaqsysyna úıirilesiń. О́mirden tapqan mánińniń salmaǵy artady, rýhtanyp, tolyq adam bolýǵa talpynysyńdy ústemeleı túsedi.
– Ońtaıly ról ala almaı uzaqtaý júrip qalsańyz, mazasyzdanasyz ba?
– Joq, mazasyzdanbaımyn. Buıyrǵan dúnıeniń basqaǵa ketpeıtinin bilemin, oraıly sáttiń týǵanyn kútemin. Men – aktrısamyn, komedııa janryndaǵy ról bola ma, tragedııalyq keıipker me, oń jambasyma keletinin sezsem, bar sheberligimdi salyp oınaýǵa beıil kúıimdi joǵaltpaı, tas-túıin júremin. Teatr dańǵaza, dýmannyń orny emes, ol óz júregińniń únine qulaq túrgizetin, oıǵa, oılanýǵa jeteleıtin jer. Rólge bekitilgennen keıin rejısser qurmet týdyra alsa, bul tipti ǵajap. Al kásibıligi kúmán týdyratyn rejısserdiń spektaklinen Medeıa men Qaragózdiń róli buıyrsa da, oınaýǵa qulshynysyń bolmaıdy. Mundaı rejısserlerdiń spektaklinen ról buıyrmasa da, oǵan esh renjimeımin. Ázirbaıjan Mámbetov, Janat Hadjıev, Iýrıı Hanınga, Ionas Vaıtkýs, Bolat Atabaev, Qaırat Súgirbekov sekildi myqty rejısserlerdiń spektaklinde oınaǵannan keıin ishińde shartty túrde bıik talǵam talabynan tómendegiń kelmeıtin ustanym paıda bolady eken. Spektakldiń minsiz, sumdyq sýper bolýy mindetti emes, biraq qoıylymnan saýattylyq pen parasattyń ıisi ańqyp turýy kerek. Kórermen osyny sezinse, ol teatrǵa qaıta-qaıta kelýden jalyqpaıdy. Keıingi jas rejısserlerden Elik Nursultan, Juldyzbek Jumanbaıdyń shyǵarmashylyǵy, atqaryp júrgen jumysy rızashylyq týdyrady. Bastysy, izdenedi, shablonǵa túspeıdi. Olardyń jumysynda mindetti túrde tosyn jańalyq bolady.
– Sizdiń keń aýqymdy kıno aktrısa ekenińizdi Bolat Qalymbetovtiń «Talan» fılmi kórsetti. Dramalyq shıeleniske toly fılmdegi ishki ıirimi mol hat tasýshy Bıbisara atty qaıratty áıel – qazaq kınematografııasyna qosylǵan tyń beıne. Qazaq kınoóndirisi týraly qandaı kózqarastasyz? Qarapaıym adamdardyń kópshiligi «teatr naǵyz shyǵarmashylyqpen aınalysatyn oryn, al kıno aqsha tabý kózi» deıdi. Ras pa?
– Kınoda kóp jyldar tek epızodtyq rólderge tústim. Eger fılmge túsip, naǵyz shyǵarmashylyq lázzattyń dámin tatqan bolsam, bul keremet sezimdi maǵan «Talan» syılady. «Talan» – qazaq kınematografııasynyń iri tabysy. Qazir kórkem fılm qaısy, tele fılm qaısy, qoıyrtpaq bolyp aralasyp ketti. Qazaqtyń ataqty bir tulǵasy 100 jasqa toldy deıdi de, ortańqol deńgeıge jeter-jetpes eki-úsh fılm túsirgen kóldeneń kók atty rejısserge sol alashtyń aıaýlysy týraly fılm túsirýdi tapsyrady. Qarjyny qaltasyna salyp alǵansha eki ókpesin qolyna alyp júgiretin rejısser dál solaı izdenip, arhıv aqtaryp, kitap oqyp, kózkórgendermen keńesip, zerttep-zerdelep qolǵa alýdyń ornyna, kásibı deńgeı talabyna jaýap bermeıtin, atústi jasalǵan, bir qaınaýy ishinde turǵan shıki dúnıeni uıalmastan kórermenge usynady. Aqsha bólgizip, alty Alashqa saýyn aıtyp, jarnamasyn jasap qoıǵannan keıin mınıstrliktiń amalsyz dabyra qylmaı, qabyldap alýyna, al kórermenniń talǵamy tómen dúnıeni talǵaýsyz jutyp, tutynýyna týra keledi. Sońǵy 4-5 jyldyń kóleminde jekelegen tulǵalarymyz týraly túsirilgen teleserıaldardyń keıbiriniń kórkemdik sapasy esh syn kótermeıdi. Biraq solaı bola tura, eshkim jaýapkershilik arqalap, eshnárse úshin jaýap berip jatqan joq. «Jańa Qazaqstan» uranyn jabyla kóterip júrgender ónerdegi óresizdik pen ózin jaýapkershilikten syrt ustaıtyndardy tezge, tártipke salsa degen qarapaıym tilegimiz úlken arman kúıinde qalyp otyr. Reforma tek saıasat pen ekonomıkanyń aınalasynda ǵana jasalmaýy kerek, óner salasyn tamyr-tanystyqtan azat etip, irgeli reforma jasaý – kezek kúttirmeıtin is.
– Ártis adam neden saq bolýy kerek?
– Batyr Baýyrjan aǵamyz aıtqandaı, ártisti eń aldymen jalǵan qurmet pen qoshemet qurtady. Maqtaýdyń eń jaman jeri – ózińdi-óziń ótirikke sendirip alasyń. О́zińdi jalǵan maqtanmen aldaǵanyńmen qoımaı, kórermendi aldaısyń. Kórermen ne kórsetseń de, qalaı oınasań da qabyldaı berýge májbúr. «Bári jaqsy» dep júrgende ne boldyq? Bárin qaıta bastaýǵa týra kelip tur. Qara qyldy qaq jarǵan synshylarymyzdyń biri «búkil geroınıany oınap shyqtyń, shyǵarǵan bir obrazyń joq» dep shymbaıyna batyryp aıtyp turyp, qolyna «Úzdik» nomınasııasyn tabystaǵanyn da kórdik. О́nerge osyndaı qarym-qatynas turǵan jerde qandaı damý bolady? Ár ártis óz deńgeıin biledi. Syrttaı moıyndaı almaýy múmkin, biraq kemshiligi qandaı, jetistigi nede, jaqsy biledi. Jaqsy akterdi baıqasań, qazaq úshin, óner úshin óziń de qýanyp ketesiń.
– Akter mamandyǵyndaǵy mańyzdy qasıet degende aldymen neni atar edińiz?
– О́ner adamynyń júregi tazalyqqa tunyp turýy tıis. Akter eń aldymen jaqsy adam bolýy kerek. Batyrlyq degen – erlik jasaý ǵana emes, ar men ojdan aıaqqa taptalyp jatatyn kúndelikti ómirde adamgershiligińdi joǵaltyp almaı, kisiligińdi saqtaı bilý. Buǵan qosymsha bilim, oı jınasa, ótirikti ata jaýym dep sanasa, júregine qara daq túsirip almaı, taza ustasa, osynyń bári óner adamynyń harızmasyn quraıdy. Halyq qaıda bolsa da, óner adamyna erekshe yqylas tanytyp, tóbesine kóterip qurmetteıdi. Ol onyń ónerine bas ıgeni. Biz, ártister qaýymy, osyny túsinýimiz kerek. Súıip, kóńil tórine jaıǵastyryp alǵan súıikti ártisi kóńil qaldyryp, kúıinetin minez kórsetpeýi kerek. О́ıtkeni sahnada júrgen ártis qarapaıym adamnyń san jyldar boıy izdegen suraǵynyń jaýabyn bir-aq sátte aıtyp berip, tańyrqata salady. Akter mamandyǵynyń qudireti de osynda. On segiz myń ǵalamdy aınalsań da, dúnıeniń bar ǵajaıyby dál osy sátpen teńese alar ma?! Áı, bilmeımin, menińshe, joq...
– Áńgimeńizge rahmet.
Áńgimelesken
Aıgúl AHANBAIQYZY,
«Egemen Qazaqstan»
