ShQO Sanıtarlyq-epıdemıologııalyq baqylaý departamenti baspasóz qyzmetiniń málimetine súıensek, kóktem shyqqaly beri endemııalyq aýmaqtarda 229 adamdy kene shaqty. Onyń ishinde 14 jasqa deıingi 80 bala bar.
«Kene ınfeksııalarymen aýyrý jaǵdaılary tirkelgen joq. Kópjyldyq epıdemıologııalyq taldaý nátıjeleri kórsetkendeı, óńirde bul aýrýdyń alǵashqy jaǵdaılary mamyr aıynda baıqalady. Aýrýdyń aldyn alý maqsatynda kene shaqqan 201 adam kene ensefalıtine qarsy ımmýnoglobýlın aldy. Qalǵandary dárigerlerge kesh júgingendikten nemese qarsy medısınalyq kórsetilimderge baılanysty alǵan joq», - delingen habarlamada.
Shyǵys Qazaqstan boıynsha kene ensefalıtiniń tabıǵı oshaǵy – Glýbokoe, Zaısan, Altaı, Katonqaraǵaı, Kókpekti, Ulan, Shemonaıha aýdandary men Rıdder, О́skemen qalalarynda.
«Bıyl kene shaǵýdyń epıdemıologııalyq maýsymy oblysta kóktemniń alǵashqy aılaryndaǵy aýa temperatýrasynyń sýyq bolýyna baılanysty kesh bastaldy. Sondyqtan kene shaǵý kórsetkishi ótken jylǵy kezeńmen salystyrǵanda birshama az», - delingen aqparatta.
