Búgin úsh qazaqstandyq fınalǵa joldama aldy. 74 kelige deıingi salmaqta Nurqoja Qaıpanov jartylaı fınalda qyrǵyz balýany Islambek Orozbekovty 15:8 esebimen utty. Aqtyq básekede N.Qaıpanov ırandyq sportshy Iones Alıakbar Emamıchogaeımen kezdesedi.
Fınalǵa joldamany Azamat Dáýletbekov te (86 kelige deıin) aldy. Ol 1/2 kezeńde qyrǵyzstandyq Saıaqbaı Iýsýpovty merziminen buryn utty – 10:0. Altyn medal úshin aıqasta úndistandyq Dıpak Pýnııamen kezdesedi. 125 kelige deıingi salmaq dárejesindegi Álisher Erǵalı da qurlyq birinshiliginiń «altynyn» sarapqa salady.
Jartylaı fınalda ol ońtústikkoreıalyq Iehıon Chonnan asyp tústi – 9:6. Bas júlde úshin jekpe-jekte Erǵalı ırandyq Iadollah Mohammadkazem Mohebımen beldesetin bolady. Sondaı-aq eki jerlesimiz týrnırdiń qola júldesi úshin talasady. Akbar Qurbanov (61 kelige deıin) Álibek Álibegovpen (Bahreın) kezdesedi. Al Ádilet Daýlanbaev (92 kelige deıin) japondyq Takýma Otsýǵa qarsy shyǵady.
Fınal Nur-Sultan ýaqytymen 16:00-de bastalady.
