Taıvan órshigen vırýspen qalaı kúresip jatyr?

Taıvan premer-mınıstri elde karantın jarııalamaıtynyn aıtty, óıtkeni juq­tyrǵandardyń basym bóliginde derttiń belgileri joq, jeńil sımptomdar birqatar naýqasta ǵana bilinedi.

Taıvanda derttiń órshýi jyl basynan baıqaldy. Statıs­tıkalyq málimetterge sú­ıensek, qańtardan bas­tap barlyǵy 18 436 adam vırýs juqtyryp, tórt adam qaı­tys bol­ǵan. Alaıda bul kórset­kish­t­iń jalpy sany 23 mln halyqqa shaqqanda az bolyp otyr. Taıvan úkimeti eldegi vaksınalaýdyń kórsetkishi joǵary ekenin alǵa tartyp, vırýspen birte-birte ómir súrip, ekonomıkalyq aınalym­dy toq­tatpaýdy jón kórip otyr. Olar osylaısha pandemııamen kúresýdiń «jańa Taıvan mo­delin» jasap shyǵarmaqshy. Vırýs­qa qarsy kúrestegi mun­daı qa­dam­darynyń sátti bolaryna el úkimeti senimdi, óıtkeni tir­kelgen naýqastardyń 99 paıyzdan astamy sımptomsyz nemese derttiń jeńil túrine shaldyqqan. «Biz qazirgi dertpen birte-birte kúresemiz, Shan­haı sekildi aldymen je­ńil sharalar qabyldap, artyn­sha lokdaýnǵa ketpeımiz, pan­de­mııaǵa qarsy qatań sharalar qabyldamaımyz. Degenmen mas­ka kııýdi jalǵastyra bere­miz», dedi Sý Szen-chan.

Osy árketterinen el Úkimeti osy aıdyń sońyna deıin kún saıyn dert juqtyrǵandardyń sany 10 myńǵa jetedi dep boljap otyr jáne birneshe aptadan keıin indet kúrt órshýi múmkin dep eskertti. Búginde jergilikti bılik koronavırýspen kúresýge qosymsha vaksınalar men ekspress-testter sanyn kóbeıtip, dert juqtyrǵandar men olarmen baılanysta bolǵan adamdardyń oqshaýlaný kúnderin azaıtý máselesin qarastyryp jatyr. Al elge kelgen sheteldikterge ka­ran­tın ýaqytyn eki aptadan 10 kúnge deıin qysqartty, bul ýa­qyt odan ári de qysqarýy múmkin.

Búginde Taıvan halqynyń 80 paıyzǵa jýyǵy tolyq vak­sı­nalanǵan jáne 60 paıyz­ǵa jýyǵy ekpeniń birinshi kom­ponentin alǵan, al maska taǵý talaptary saqtalady. Pandemııa bastalǵaly beri elde 47 100 adam ınfeksııa juqtyryp, indetten 856 adam qaıtys bolǵan.

Álemdi alańdatyp otyrǵan Shan­haıdaǵy jaǵdaıǵa toqta­lar bolsaq, jergilikti bılik «juma kúni qalada kovıd juqtyrǵan 12 adam qaıtys boldy» dep habarlady, bul bir kún burynǵy kórsetkishpen salystyrǵanda 11 adamǵa kóp. Al Qytaıdyń qarjy ortalyǵy bir kúnde koronavırýstyń 20 634 jańa jergilikti sımp­tomsyz jaǵdaıyn tirkedi, bir kún burynǵy málimet boıyn­sha 15 698 adamǵa eselengen. Sımptomdary bar jańa jaǵ­daı­lardyń jalpy sany beı­sen­bidegi kórsetkishten 1,931-den 2,736-ǵa jetti. Senbi kúni eldiń ulttyq densaýlyq saqtaý basqarmasy ótken juma kúni kovıd juqtyrǵandardyń sany 24 411 jetkenin habarlady, bul bir kún burynǵy kórsetkishpen salystyrǵanda 18 598-ge ósti. 

P.S. Jylyna 10 mln týrısti qabyldaıtyn Taıvannyń bul áreketine álem sarapshylary alańdap otyr. Derttiń órship, ál bermeı ketken kezinde shekarasyn bekitip, qatań karantın jarııalaǵan Shanhaı bıligine narazy bolǵandar da az emes. 23 mln halqy bar Taıvan bıliginiń qaterli dertpen kúresý saıasatynyń durys nemese burystyǵy keler kúnniń enshisinde...