Parlament • 28 Sáýir, 2022

Senat bıologııalyq qaýipsizdik týraly zań qabyldady

31 ret kórsetildi

Búgin Senattyń jalpy otyrysynda «Qazaqstan Respýblıkasynyń bıologııalyq qaýipsizdigi týraly» Zań qabyldandy, dep habarlaıdy Egemen.kz.



 

«Zań jobasynda negizgi bıologııalyq qaýipter eskerilgen. Birinshiden, asa qaýipti ınfeksııalardyń tabıǵı oshaqtaryna mán berilip otyr. Asa qaýipti ınfeksııalardyń oshaqtary el aýmaǵynyń jartysyna taralǵan. Mysaly, oba 10 oblystyń aýmaǵynda, týlıaremııa 12 oblystyń aýmaǵynda, gemorragııalyq qyzbalar 4 oblystyń jáne Shymkent qalasynyń aýmaǵyna taraǵan. Sondaı-aq eki myńdaı kúıdirgi boıynsha qolaısyz eldi mekender bar. Ekinshiden, qaýipti ınfeksııalardyń syrttan ákelinýi máselesine toqtalsaq, Qazaqstannyń halyqaralyq týrıstik iskerlik baılanystardy keńeıtýi nátıjesinde jyl saıyn tyrysqaqtyń ákelinýi jaǵdaılary tirkeledi», dedi Densaýlyq saqtaý mınıstri Ajar Ǵınııat.

Zań jobasy boıynsha bıologııalyq qaterge qarsy is-qımyldyń tıimdi júıesin mynadaı baǵyttardyń aıasynda qurý josparlanýda: Birinshi baǵyt - strategııalyq josparlaý, bıologııalyq qaýipsizdikti boldyrmaý, bıologııalyq qaýipsizdik salasyndaǵy basym ǵylymı-zertteý baǵyttaryn aıqyndaý jónindegi normatıvtik quqyqtyq aktilerdi ázirleý.

Ekinshi baǵyt - memlekettik basqarýdyń úılestirilgen vedomstvoaralyq júıesin qurý jáne onyń profılaktıkalyq fýnksııasyn kúsheıtý. Ýákiletti organ engiziledi, onyń negizgi mindeti - vedomstvoaralyq ózara is-qımyldy jáne memlekettik organdardyń is-qımyldarynyń kelisilýin qamtamasyz etý, bıologııalyq qaterlerdiń aldyn alý jónindegi ýaqtyly ári tıimdi sharalardy ázirleý úshin ártúrli salalardan aqparat jınaý jáne taldaý júrgizý.

Sonymen qatar, 13 múddeli ýákiletti organ, jergilikti atqarýshy organ ókilettikteriniń quzyretteri aıqyndalady. Profılaktıkalyq fýnksııany kúsheıtý aıasynda aldyn ala eskertýsiz asa qaýipti patogendermen jumys isteýge qatysty memlekettik baqylaýdy júzege asyrý, sondaı-aq bıologııalyq qaýipsizdik salasynda jedel nazar aýdarý jáne profılaktıka sharalary kózdeledi. Úshinshi baǵyt - beıindi qyzmetter men halyqtyń yqtımal tótenshe jaǵdaılarǵa daıyndyǵyn qamtamasyz etý.

«Árbir yqtımal qaýip úshin bıologııalyq qaýipsizdik salasynda nazar aýdarý hattamalary (ssenarııleri) ázirlenedi, onda memlekettik organdar men ózge de uıymdar is-qımyldarynyń, olardyń tótenshe jaǵdaılar kezinde vedomstvoaralyq ózara is-qımylynyń algorıtmderi jasalady. Asa qaýipti patogendermen jumys isteý úshin daıarlyqtan ótken bilikti mamandardan kadr rezervi qalyptastyrylady, qajet bolǵan jaǵdaıda olar asa qaýipti patogendermen jumys isteýge (tótenshe jaǵdaılar, pandemııa, basqa elderge kómek kórsetý) jumyldyrylady. Patogendi bıoagenttermen jumys isteıtin obektilerdi materıaldyq-tehnıkalyq jaraqtandyrý halyqaralyq standarttarǵa sáıkes keltiriledi. Ǵylymı-tehnıkalyq áleýet pen resýrstardy memlekettik qoldaý sharalaryn kúsheıtý josparlanyp otyr. Pandemııa sabaqtaryn eskere otyryp, zań jobasynda halyqtyń habardar bolý deńgeıin arttyrý jáne onyń qaýipti bıofaktorlardyń áserine nazar aýdarýǵa daıyndyǵy jónindegi sharalar qarastyrylǵan. Sondaı-aq kadrlyq áleýetti saqtaý jáne nyǵaıtý úshin yntalandyrý sharalary kózdelgen. Memlekettik uıymdardyń táýekelge neǵurlym beıim mamandary men qosalqy personalyna eńbekaqy tóleý arttyrylady, saýyqtyrý jónindegi járdemaqylar belgilenedi», dedi mınıstr.

Onyń sózine qaraǵanda, mıkroorganızmderdiń ulttyq jáne jumys kolleksııalarynyń qyzmetin retteý eskerilgen. Mıkroorganızmder kolleksııalaryn júrgizýdiń jalpy talaptary engiziledi, ulttyq jáne jumys kolleksııalarynyń maqsaty naqty anyqtalady. Mundaı kolleksııalar mıkroorganızmderdiń sıpattaryn zertteý, olardy júıeleý jáne olardyń teris áserin azaıtý joldaryn jasaý úshin mańyzdy.

«Negizgi zań jobasy joǵaryda kórsetilgen baǵyttardy iske asyrýǵa baǵyttalǵan 8 taraýdan jáne 32 baptan turady, sondaı-aq qoldanysqa engizý úshin alty aılyq ótpeli kezeńdi jáne patogendi bıoagenttermen jumys isteýge ruqsattardy resimdeý men qaıta resimdeý úshin qosymsha 6 aıdy kózdeıdi», dedi vedomstvo basshysy.

Munymen qosa palatanyń jalpy otyrysynda «Qazaqstan Respýblıkasynyń keıbir zańnamalyq aktilerine bıologııalyq qaýipsizdik máseleleri boıynsha ózgerister men tolyqtyrýlar engizý týraly» ilespe qujat eki oqylymda qaralyp, qabyldandy.

Ilespe zań jobasy 3 kodeks pen 11 zańdy qosa alǵanda, 14 zańnamalyq aktige ózgerister engizýdi kózdeıdi.



Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar