Qazaq ónerin Eýropaǵa tanytty

Jaqynda Atyraýdaǵy D.Nurpeıisova atyndaǵy akademııalyq qazaq halyq aspaptary orkestri sheteldik gastrolden oraldy. Atyraýlyq orkestrdi gastroldik saparǵa bastap barǵan oblys ákiminiń orynbasary Shyńǵys Muqannyń aıtýynsha, qazaq ónerin shetel jurtshylyǵyna keńinen tanytý. Akademııalyq orkestr quramyndaǵy halyq aspaptaryn sheber meńgergen ónerpazdar naýryzdyń sońǵy on kúndiginde áýelgi gastroldik saparmen Túrkııanyń Manısa qalasynda óner kórsetken. Odan soń Ystambul qalasyndaǵy 5000 oryndyq «Totkapy» mádenıet ortalyǵynda da qazaqtyń án-kúıin qalyqtatty. Orkestrdiń budan keıingi gastroldyq sapary Eýropa elderinde, naqtylaı aıtqanda, Germanııanyń Berlın jáne Avstrııanyń Vena qalasynda sátti jalǵasypty. Kórkemdik jetekshi jáne bas dırıjer Oraq Jaýyrov «Eýropa elderinde uly kúıshi-sazger Qurmanǵazy men Dınanyń, Túrkesh pen Táttimbettiń kúmbirlegen kúılerine, Yqylastyń qobyz sarynyna dúbirlete qol soǵyldy. Biz sonymen birge, E.Qusaıynov, A.Saıjan, A.Jaıymov shyǵarmalarymen shektelmeı, sheteldik kompozıtorlardyń da týyndylaryn oryndadyq», deıdi. Kúı anasy Dınanyń esimin asqaqtatyp júrgen akademııalyq orkestr quramyndaǵy Amanjan Basyǵarıev, Marjan Tórehanova, Garıbjan Muqanǵalıev, Aqmaral Noǵaı­baea, Qaırat Kakımov syndy óner ıeleri tyńdarmandaryn qazaq án-kúılerimen sýsyndatypty. Joldasbek ShО́PEǴUL, «Egemen Qazaqstan». Atyraý oblysy.