Ońashada syrlasatyn onyń qoly tıgen árbir zatpen búgin kórmede jaqyn tanystym. Kózimmen aımalap, jabyrqaǵan kóńildi jubattym. Azamattyń artynda aty qalady eken, qoldanǵan zaty qalady eken. Jarqyraǵan altyn saǵat toqtap tur, ıesin joqtap tur. Bálkim júrek saǵaty toqtaǵan kúni ol da soǵýyn toqtatqan bolar. Efırde kıgen kıimderi qazir qaıtyp keletindeı kútip tur. Ústinen Abaıdyń kitabyn túspegen jumys ústeli jumbaq bir kúıge bóleıdi. Aýada áli aǵanyń jazylmaǵan sózderi qalyqtap júrgendeı. Qımylsyz qalamy endi eshteńe aıtqysy kelmegendeı únsiz tunjyraıdy...
Ulttyq mýzeıde búgin qazaq jýrnalıstıkasynyń qaıratkeri Nurtileý Imanǵalıulynyń 70 jyldyǵyna arnalǵan «Baı-qýatty bolaıyq!» atty kórme ashyldy.
Qazaq televızııasynda 47 jyl qyzmet atqarǵan jýrnalıstıka ardageri Nurtileý Imanǵalıulynyń qoǵamdaǵy róli men sińirgen eńbegin jurtshylyqqa nasıhattaýdy maqsat etken respýblıkalyq kóshpeli kórmeniń urpaqqa berer ónegesi mol. El tiregi – elordadan bastalǵan kórmege tanymal jýrnalıster, Májilis depýtattary, zııaly qaýym men qanattas dostary, shákirtteri qatysty. Telejýrnalıstıkanyń tarlany jaıly esteliktermen bólisip júrekjardy sózderin arnap, rýhyna taǵzym etti.
«Bul kórmeni júzege asyrý óziniń ıdeıasy edi. Mereıtoıymdy halyqtyń ortasynda, shaǵyn kórmemdi birge alyp júrip ótkizsem dep josparlaǵan. Kórmede ómirde ózi paıdalanǵan zattary, efırde qoldanǵan qamshysy, asyǵy, shoqpary, fotoapparaty, tańdaýly kıimderi, eńbegine saı alǵan úlken marapattary, qolsaǵaty, jumys ústeli syndy dúnıeleri halyqqa usynyldy. Atalǵan shara 1 aı boıy elordada ótedi. Ol kóshpeli kórme bolǵandyqtan elimizdiń birneshe qalasyn sharlap, túıini týǵan jeri Taldyqorǵanda qoıylmaq. Qoly qalt etkende shyǵarmashylyqpen aınalysty. Jetpisine kitap daıyndap júrdi. Ony da jaqynda jaryqqa shyǵaratyn bolamyz.
«Jazmyshtan ozmysh joq», deıdi babalarymyz. Nurekeń 69 jasasa da mándi de maǵynaly ómir súrdi. Maqsatyna jetti. О́mir boıy óziniń súıikti isimen aınalysyp, sonyń shyńyna shyqty. Halqynyń qurmetine bólendi. Sońynan óshpes mura qaldyrdy. Jýrnalıstıkada qalyptastyrǵan mektebi óz aldyna bir tóbe deýge bolady», deıdi jýrnalıstiń jubaıy Qarlyǵash Sovetbekqyzy.
Taǵylymdy sharada Ulttyq Mýzeı dırektory Arystanbek Muhamedıuly bastap, jýrnalıstiń jubaıy Qarlyǵash Sovetbekqyzy, Májilis depýtattary aqyn Qazybek Isa, Janarbek Áshimjan, Amanjol Áltaı, Senat depýtaty Lázzat Súleımenova, «QAZAQSTAN» RTRK» AQ tóraǵasy Lázzat Tanysbaı, «Habar» Agenttigi» AQ Basqarma Tóraǵasy Berik Ýálı sóz sóılep, jyly estelikterimen bólisti.
