Otyrys barysynda taraptar Transkaspıı halyqaralyq kólik baǵdaryn damytý perspektıvalaryn qarastyrdy. Qaıyrbek О́skenbaev bul baǵytta qazaqstandyq eksporttyń ulǵaıatynyn, onyń ishinde Qytaıdan tranzıttiń kólemi ulǵaıa beretinin, osy oraıda Grýzııa aýmaǵy arqyly tranzıttiń yńǵaılylyǵyn saqtaı otyryp, yntymaqtastyqty odan ári damytý kerektigin atap ótti.
«Transkaspıı baǵyty Grýzııa eksportynyń saýdasyn odan ári keńeıtýge katalızator bolady. Kaspıı teńizinde qolaıly básekege qabiletti tarıfti belgileýge yqpal etetin tórt parom salýdy josparlap otyrmyz», dedi mınıstr.
Eske sala ketsek, 31 naýryzda Grýzııa, Ázerbaıjan, Túrkııa jáne Qazaqstan Transkaspıı halyqaralyq kólik dálizin damytý týraly tórtjaqty málimdemege qol qoıǵan edi. Ol sondaı-aq eki el arasyndaǵy ózara saýda-sattyqty arttyrý úshin aıtarlyqtaı áleýet bar ekenin atap ótti.
Qazaqstandyq kompanııalar metallýrgııa, munaı-hımııa, tamaq jáne mashına jasaý, sondaı-aq farmasevtıka syndy birqatar salada óńdelgen taýarlar eksportyn arttyrýǵa daıyn. Jalpy eksporttyq áleýet 170 mıllıon dollarǵa baǵalanady. О́z kezeginde, úkimetaralyq komıssııa otyrysynda Grýzııanyń vıse-premeri, ekonomıka jáne turaqty damý mınıstri Levan Davıtashvılı eldiń sıyr etin, sút ónimderin, makaron ónimderin, ósimdik maıy men bıdaı unyn jetkizýge múddeli ekenin atap ótti. Qazaqstan eksporttaýshy kásiporyndardyń tizbesin usynýǵa, sondaı-aq ekonomıkanyń túrli salalarynda 40 ataý boıynsha Grýzııaǵa ónim eksportyn ulǵaıtýǵa daıyn ekenin jetkizdi.
Sonymen qatar, Qazaqstan astyq eksporttaýshylary naryq negizinde Grýzııa naryǵyna bıdaı jetkizýge daıyn. Sondaı-aq, otyrys barysynda taraptar avtomobıl kóligimen júk tasymaldaý úshin 2022 jylǵa ruqsat blankilerin jáne 2023 jylǵa aldyn ala kvota almastyrýdy belgiledi. Sonymen qatar, qazaqstandyq tarap grýzııalyq avıakompanııalarǵa Qazaqstanǵa turaqty reıs ushyrýdy usyndy.
Búgingi tańda otandyq «Eır Astana», «Fly Arystan» jáne «SCAT» avıakompanııalary Grýzııaǵa turaqty túrde 19 reıs oryndaıdy. Qazaqstan men Grýzııa Úkimetaralyq komıssııasynyń on birinshi otyrysy eki el arasyndaǵy dıplomatııalyq qatynastyń ornaǵanyna 30 jyl tolýyna oraı ótkizildi.
