Jıynda mınıstr transport, ónerkásip, qurylys jáne áskerı tehnıka salalarynda júzege asyrylǵan jáne aldaǵy ýaqytta iske qosylatyn qazaq-túrik birlesken jobalary týraly mańyzdy aqparattarmen tanystyrdy.
Qaıyrbek О́skenbaev Transkaspıı halyqaralyq kólik baǵdaryn damytýǵa erekshe nazar aýdardy. Ol aǵymdaǵy jyldyń sáýir aıynda THKB Halyqaralyq qaýymdastyǵy qurylǵanyn atap ótti. Atalǵan uıym Qazaqstan, Ázirbaıjan, Grýzııa, Túrkııa, Ýkraına, Rýmynııa, Polsha jáne Qytaıdyń magıstraldyq ınfraqurylym ıeleri men tasymaldaýshylaryn biriktiredi.
«Jobaǵa qatysýshy memleketterdiń transporttyq vedomstvalary arasyndaǵy keńeıtilgen otyrys ótti. Basqosý nátıjesinde Transkaspıı halyqaralyq kólik baǵdaryn damytý boıynsha deklarasııaǵa qol qoıyldy. Qujat birlesken logıstıkalyq kompanııalar qurý, biryńǵaı logıstıkalyq tizbe qalyptastyrý men tarıf bekitý, avtokólik quraldarymen tasymaldaýshylardy tartý jáne t.b. bar. Sonymen qatar deklarasııa sheńberinde «Aqtaý teńiz porty» arnaıy ekonomıkalyq aımaǵy bazasynda saýda flotyn tolyqtyrý men konteıner habyn qurý da josparlanyp otyr. Investor retinde PSA Group, Maersk, MSC syndy álemdik konteıner operatorlaryn tartý kózdelýde», dedi mınıstr.
Atalǵan jobanyń damýyna Baký-Tbılısı-Kars temirjol jelisiniń turaqty túrde paıdalanýǵa berilýi de qosymsha serpin bermek. Bul jeli Túrkııaǵa baǵyttalǵan ońtaıly marshrýt qurýǵa jáne eýropalyq temirjol jelisine shyǵýǵa jol ashady.
«Baký-Tbılısı-Kars temirjol jelisi arqyly qoldanystaǵy jáne aldaǵy ýaqytta júzege asatyn birlesken ınfraqurylymdyq jobalardy Qytaıdan bastap Kaspıı teńizi arqyly Túrkııaǵa jáne Ońtústik Eýropa memleketterine logıstıkalyq tizbek qurýǵa múmkindik beredi», dep atap ótti QR IIDM basshysy.
Sonymen qatar Qaıyrbek О́skenbaev eki el arasyndaǵy turaqty áýe reısteriniń artqanyn da baıandady.
«Búginde Qazaqstannyń Aqtaý, Aqtóbe, Almaty, Atyraý, Nur-Sultan, Túrkistan jáne Shymkent qalalarynan Túrkııaǵa aptasyna 37 jolaýshylar reısi oryndalady. Qazaqstannan aptasyna Antalııa jáne Stambulǵa 24 áýe tasymaly júzege asyrylady. Al bıylǵy jyldyń 13 mamyrynan bastap Antalııa jáne Bodrýmǵa tasymal Qazaqstannyń 10 qalasynan (onyń ishinde Qaraǵandy, Qostanaı, Oral jáne О́skemen) júzege asyrylyp, ushý sany aptasyna 63 reıske artpaq. Nátıjesinde, memleketter arasyndaǵy aptalyq reıserdiń jalpy sany 124-ke deıin óspek», dedi mınıstr.
Sondaı-aq ol Qazaqstan Respýblıkasy Indýstrııa jáne ınfraqurylymdyq damý mınıtrliginiń usynysymen eki eldiń avıasııalyq bıligi arasynda ushý geografııasyn keńeıtý jáne reısterdiń sanyn ármen qaraı kóbeıtý máseleleri jaıynda kelissózder ótkizý usynylǵanyn aıtty. О́zara yntymaqtastyqty arttyrý boıynsha kelissózderdi ótkizýge qol jetkizildi. Basqosý bıylǵy jyldyń shilde aıynda Stambul qalasynda ótedi.
Áskerı-tehnıkalyq yntymaqtastyq «Aselsan» kompanııasymen áriptestik aıasynda sátti damýda. «Qazaqstan Aselsan ınjınırıng» JShS elektrondy-optıkalyq qurylǵylar men radıostansııalardyń keń spektrin óndiretin qazaq-túrik birlesken kásiporny. Kásiporyn qurylǵannan beri tapsyrys berýshilerge quny 160 mln. dollardan asatyn 16 myńnan astam ónim jetkizgen.
«Qazaqstan tarapy respýblıkanyń qarýly kúshterin zamanaýı tehnıkamen qamtamasyz etýge nıetti. Osyǵan oraı Túrkııamen aradaǵy áskerı-tehnıkalyq yntymaqtastyqty odan ármen nyǵaıtý kózdelip otyr», dedi mınıstrlik basshysy.
QR Prezıdentiniń Túrkııaǵa jasaǵan memlekettik saparynyń qorytyndysy boıynsha 11 ekijaqty qujatqa qol qoıyldy. IIDM tarapynan mınıstr Q. О́skenbaev halyqaralyq quramdastyrylǵan júk tasymaldary týraly Úkimetaralyq kelisimge qol qoıdy.
