Qazaqstandyq tennısshi ekinshi kezdesýin dúnıejúzilik reıtıngte 102-orynda turǵan amerıkalyq Loren Devıspen ótkizdi. Bul olardyń sporttyq jolyndaǵy ózara birinshi básekesi edi.
Birinshi partııada E. Rybakına 4:1 esebimen alǵa ketkenimen, qarsylasy tarazy basyn teńestirdi – 4:4. Degenmen, Elena taǵy bir breık jasap, setke dop bergende, óz múmkindigin múlt jibergen joq – 6:4. Ekinshi sette qazaqstandyq tennısshi 3:0 esebimen alǵa ketti. Sodan keıin osy basymdylyǵynan aıyrylǵan joq – 6:3. Bir jarymnan saǵattan asa ýaqytqa sozylǵan match barysynda E. Rybakına 6 eıs jasap, 4 breık-poıntty túgel paıdalandy. Qarsylasy 2 breıkten (8 breık-poınt) asa alǵan joq.
E. Rybakına júlde qory 2,5 mln eýrodan asatyn dodanyń shırek fınalyna shyǵý úshin álemniń 6-raketkasy, chehııalyq Karolına Plıshkova nemese reıtıngte 29-satydaǵy shveısarııalyq Hıl Belen Taıhmannyń bireýimen talasady.
Búgin sondaı-aq, Iýlııa Pýtınseva Rımde álemniń 10-raketkasy, ıspanııalyq Garbıne Mýgýrýsamen oınaıdy.
