«Aksııanyń maqsaty – qarýmen jasalatyn qylmystardyń aldyn alyp, qoǵamdyq qaýipsizdikti qamtamasyz etý. Onyń aıasynda Qurmanǵazy aýdandyq polısııa bólimine 8 adam erikti túrde zańsyz saqtalǵan 9 atys qarýyn syıaqy alý úshin tapsyrdy. Onyń ishinde 1892 jyly shyǵarylǵan «Mosına» markaly vıntovkasy da bar. Al, «Shpagın» pýlemet tapanshasy 1944 jyly zaýyttan shyǵarylǵany anyqtaldy. Mundaı eski qarýlardy atalardan qalǵan kóz retinde saqtap, keıingi urpaqqa muraǵa qaldyrýdy kózdeıtinder bar. Alaıda, bul - qarýdy zańsyz saqtaý joly ekenin umytpaý kerek. Zańsyz saqtalǵan atys qarýlar men oq-dárilerdi ishki ister organdaryna óz erkimen tapsyrǵan azamattar qylmystyq, ákimshilik jaýapkershilikke tartylmaıdy», dep habarlady departamenttiń baspasóz qyzmeti.
Osy oraıda, polısııa qyzmetkerleri adam ómirine qaýip tóndirý, zaqymdaný nemese jaraqattanýdy boldyrmaý úshin kezdeısoq tabylǵan jarylǵysh zattardy ózdiginen tasymaldamaı, «102» telefony arqyly habarlaý qajettigin qaperge salady.
