Sarapshylar keńesiniń músheleri Ata Zańnyń 33 babyna engiziletin túzetýlerge qatysty pikirlerin bildirip, qazirgi júrgizilip jatqan úgit-nasıhat, halyqty aqparattandyrý jumystaryna keńinen toqtaldy. Keńes músheleri – zań ǵylymdarynyń doktorlary, professorlar Esbergen Alaýhanov pen Raısa Iýrchenko Qylmystyq kodekstiń 11-babynda kórsetilgen ólim jazasyna tyıym salynǵanyn atap ótip, mundaı jaza túrinen kóptegen álem elderiniń bas tartqanyn alǵa tartty.
«Aýyr qylmys jasaǵan adamdar ómir boıyna bas bostandyǵynan aıyrylady. Bul zańdaǵy eń aýyr jaza bolyp qala beredi. Mundaı jazaǵa tartylǵandardy merziminen buryn shartty túrde bosatýǵa tyıym salynady. Qazir qoǵam ózgerdi. Sáıkesinshe zań da ózgeredi. Biz zaıyrly, quqyqtyq memleketpiz. Ata Zańymyzda kórsetilgendeı qoǵamnyń árbir múshesiniń quqyqtyq saýaty, quqyqtyq mádenıeti óte joǵary bolýy kerek», dedi Esbergen Alaýhanov. Sonymen qatar, sarapshylar Konstıtýsııaǵa engiziletin ózgerister ishinde Konstıtýsııalyq, Joǵary jáne de ózge sýdıalarǵa Ortalyq saılaý komıssııasynyń múshesi jáne tóraǵasy bolýǵa, áskerı, ulttyq qaýipsizdik qyzmetkerleri, quqyq qorǵaý organdarynda qyzmet etetinderge saıası partııalarǵa kirýge, kásibı odaqtarǵa tirkelýge, saıası partııanyń úgit-nasıhat jumysyna qatysýǵa tyıym salynatyndyǵyn aıtyp, osy ózgeristerge qatysty oı-pikirlerin bildirdi.
Jıyn sońynda Adam quqyqtary jónindegi komıssııanyń músheleri men sarapshylary Memleket basshysynyń maquldaǵan zań jobasyn osy jyldyń 5 maýsymynda ótetin respýblıkalyq referendýmǵa shyǵarý týraly sheshimin biraýyzdan qoldady.
Dóńgelek ústel jumysyna sondaı-aq memlekettik organdar, úkimettik emes jáne halyqaralyq uıymdardyń, joǵary oqý oryndary men Qazaqstannyń ǵylymı qoǵamdastyǵynyń ókilderi qatysty.
