Abaı aýylyndaǵy aıryqsha keshen

О́tken senbide Abaı aýdanyna jo­lymyz tústi. Aýdan ortalyǵy Qa­raýylda kókpeńbek shynylary jaltyraǵan ádemi ǵımarat boı kóte­ripti. Shekesinde «Shyńǵystaý sport kesheni» dep ádiptelip jazylǵan. Aldy qaraqurym halyq. Keshenniń saltanatty ashylýyna kelgen meımandardy keńpeıil kóńilmen qarsy alyp jatyr. Aýyldyń aq kımeshekti ájeleri, asataıaq ustaǵan aqsaqaldary, saıdaýyt jigitter men kórkem qaryndastar merekege mereke qosqandaı, aınalany kóriktendirip jibergen. Kóktemniń sońǵy jaýǵan qaryn da eleń qylar emes. «Týǵan jerge – taǵzym» aksııasy aıasynda salynyp, aýdan jastarynyń ıgiligine berilgen «Shyńǵystaý» sport kesheniniń ashylýyna óńir basshysy Berdibek Saparbaevpen birge abaılyq aǵaı­yndarǵa aıryqsha tartý jasaǵan atymtaı azamat Shyńǵys Quljanov óziniń otbasymen qatysyp, saltanatty sáttiń kýási boldy. – Memleket basshysy Nur­sul­tan Nazarbaev buqaralyq sportty, ult densaýlyǵyn kóterýge erekshe den qoıyp otyrǵanyn bilesizder. Osy­ǵan oraı qabyldanǵan mem­lekettik baǵ­dar­lamalar halyqtyń sportpen aınalysýyna jol ashyp otyr. «Shyńǵystaý» kesheni de jastarymyzdyń sportqa jappaı bet burýyna, densaýlyqtaryn nyǵaıtýyna úlken múmkindik beredi. Osy keshende gir kóterip, ter tókken, sport úıirmelerine qatysqan balalarymyz erteń elimizdiń namysyn qorǵaıtyn chempıondar bolsyn! – dedi oblys ákimi Berdibek Saparbaev. О́ńir basshysy óz sózinde «Týǵan jerge – taǵzym» aksııasy­na belsendi atsalysqany úshin Qul­janovtar áýletine alǵys aıtty. Jobanyń quny – 120 mıllıon teńge. Atalǵan qarajatty taýyp berip, atamekeninen alys­ta júrse de kindik kesken altyn besik aýylyn umytpaǵan Shyń­ǵys Quljanov saýapty iske aı­nalǵan ıdeıanyń 2012 jyly London Olımpıadasy ótip jatqan kezde týǵanyn jetkizdi. – 2012 jyly otbasymmen Jı­debaıǵa demalysqa keldim. Sol ýaqytta Londonda jazǵy Olım­pııa oıyndary ótip jatty. Aýyl azamattary maǵan Qaraýyldaǵy ótken ǵasyrdyń otyzynshy jyldary salynǵan eski sport zalyn kórsetti. Tozyǵy jetken eski ǵı­maratty kórgende Abaı aýdanyna jańadan sport keshenin salyp berý týraly oı keldi. Qurylys jo­ba­laýshy mamandarǵa oıymdaǵy keshen­niń jobasyn jasatyp alǵan soń, oblys ákimi Berdibek Máshbekulyna kór­settim. Ol meniń usynysymdy qýat­tap, úlken qoldaý kórsetti. Myna zama­naýı ǵımarat – sol oıymyzdyń jemisi. Endigi ýaqytta aýdannyń jas­tary bos ýaqytyn ysyrap qylmaı, sportpen shuǵyldanyp, bolashaqta bıik tuǵyrlardy baǵyndyrady dep oılaımyn, – dedi mesenat Shyńǵys Quljanov. Jarty jyldan astam ýaqytta salynǵan «Shyńǵystaý» kesheninde boks jáne kúres zaldary, toǵyzqumalaq synyby, dene tárbıesimen shuǵyldanatyn jattyǵý zaly, sondaı-aq sportshylardyń jýyný-shaıynýyna arnalǵan monsha, kıim aýystyrý bólmeleri bar. Keshen sońǵy úlgidegi sporttyq qural-jabdyqtarmen qamtamasyz etilgen. «Shyńǵystaý» sport nysanynyń ashylý saltanatyna oraı, syńǵyrlaǵan ǵımaratta eki jarys qatar ótti. Atap aıtqanda, oblys quramasy men aýdan komandasynyń bylǵary qolǵap sheberleri arasynda joldastyq kezdesý, erler men áıelder kúresinen oblys birinshiligi uıymdastyryldy. Bul da zamanaýı ǵımarattyń aýqymdy jarys ótkizý múmkindigin kórsetedi. Keleshekte aýdan ortalyǵynyń ózinde iri respýblıkalyq, halyqaralyq jarys­tardy ótkizýdiń oraıy týdy deýge bolady. Ǵımarattyń ishki qabyrǵalary Qazaqstannyń atyn álemge tanytqan Olımpıada, Eýropa jáne Azııa chempıondarynyń sýretterimen ásemdelipti. Olardyń sapynda J.Úshkempirov, D.Turlyhanov, E.Ybyraıymov jáne taǵy basqa sport sańlaqtary bar. M.Taýtanov syndy Abaı aýdanynyń ataqty týmalary da bir bólek sap túzegen. Munyń bári jas jetkinshekterdi talaptandyratyny sózsiz. «Qazaqstan barysynda» Shyǵys óńiriniń namysyn jyrtqan belgili balýandar, Abaı aýdanynyń týmalary Aıbek Nuǵymarov pen Muhıt Tursynovtyń jattyqtyrýshysy Shyńǵys Tursynov mundaı sport kesheniniń nátıjesi erteń osy elden shyǵatyn sportshylardyń baǵyndyrǵan bıiktikterinen kórinetinin jetkizdi.   Al aýdannyń burynǵy eski boks jáne kúres zaly aýdan ákimshiligi tarapynan qaıta jóndeýden ótkizilip, aýdan ortalyǵynan shalǵaıda ornalasqan aýyl balalaryna arnalǵan shaǵyn ınternatqa aınalmaq. Sport kesheniniń ashylý saltanaty má­de­nıet úıinde «Qalamqas» halyqtyq án-bı ansambliniń konsertimen jalǵasty. Jergi­likti zııaly azamattardyń, halyqtyń tama­sha­laýymen ótken kesh joǵary deńgeıde uıym­dastyrylýymen jan jadyratty. Abaı aýdanynyń ardagerleri Hafız Ma­taev pen Násen Sembaev osy ıgilikti isti uıym­dastyrǵan oblys jáne aýdan basshylaryna, kásipkerge raqmet aıtyp, batasyn berdi. Dýman ANASh, «Egemen Qazaqstan». Shyǵys Qazaqstan oblysy, Abaı aýdany. ___________________ Sýretti túsirgen Esimhan Orynbaev.